وتباسىلاردىڭ كەلىسىمىمەن بانكتەر وتباسىلىق شوتتار مەن دەپوزيتتەر تۋرالى دەرەكتەردى ۇسىنادى. بۇل تۋرالى قۇرىلتايدىڭ جالپى وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆ ءمالىم ەتتى.
ونىڭ ايتۋىنشا، قازىرگى ۋاقىتتا الەۋمەتتىك سالادا قاجەتتىلىككە نەگىزدەلگەن قاعيدات ەنگىزىلىپ جاتىر. سوعان سايكەس مەملەكەتتىك قولداۋ تەك شىنىمەن مۇقتاج ازاماتتارعا عانا كورسەتىلەدى.
وتباسىنىڭ ءال-اۋقاتىن باعالاۋ ءۇشىن «وتباسىنىڭ سيفرلىق كارتاسىنا» جۇيەسى قولدانىلادى. ول مەملەكەتتىك دەرەكقورلاردان اقپارات جيناقتاپ، 50 دەن استام كورسەتكىش نەگىزىندە وتباسىنىڭ جاعدايىن سەگىز نەگىزگى باعىت بويىنشا باعالايدى.
- بۇل رەتتە جۇمىسپەن قامتىلۋى، تابىس دەڭگەيى، جىلجىمالى جانە جىلجىمايتىن مۇلىك، قارىز كولەمىن، ءبىلىم دەڭگەيىن جانە باسقا دا كورسەتكىشتەر قامتىلادى. وسى ورايدا قارجىلىق جانە الەۋمەتتىك جاعدايى تۋرالى وسى جالپى كورىنىسكە سۇيەنە وتىرىپ، جۇيە وعان بەلگىلى ءبىر ساناتتى تاعايىندايدى، - دەپ ءتۇسىندىردى ەرتايەۆ.
ول «ا» ساناتى جوعارى تابىس دەڭگەيىن، ال «ۆ» ساناتى اۋقاتتى ەكەنىن بىلدىرەتىنىن ناقتىلادى. جاڭا جۇيە اياسىندا ءدال وسى ساناتتارعا بايلانىستى وزگەرىستەر بولادى.
سونىمەن قاتار، 2027-جىلعى 1-قاڭتاردان باستاپ باعالاۋ تەتىگى كەڭەيتىلەدى. مينيستر اتاپ وتكەندەي، ەكىنشى دەڭگەيلى بانكتەر جاردەماقى الۋشىلار مەن ولاردىڭ وتباسى مۇشەلەرىنىڭ كەلىسىمىمەن بانك شوتتارى مەن دەپوزيتتەر تۋرالى اقپاراتتى ۇسىناتىن بولادى. قارجىلىق جاعدايدى باعالاۋ كەزىندە كىرىستەر مەن شىعىستار دا ەسكەرىلەدى.
ول دەرەكقور جۇيەسى كۇن سايىن جاڭارتىلىپ وتىراتىندىقتان، وتباسىنىڭ قارجىلىق جاعدايى اي سايىن قارالاتىنىن جەتكىزدى.
- ەگەر وتباسى قازان ايىندا «ب» ساناتىندا بولىپ، جەلتوقساندا بەلگىلى ءبىر تاۋەكەلدەرگە بايلانىستى «س» ساناتىنا اۋىسسا، وندا بۇل وتباسىعا مەملەكەتتىك قولداۋ شارالارى دەرەۋ ءارى پرواكتيۆتى تۇردە بەكىتىلەدى. بۇل اقپاراتتى جۇيەلى تۇردە جاڭارتۋعا، ادامداردىڭ قارجىلىق جانە الەۋمەتتىك جاعدايىن ەسكەرۋگە، سونداي-اق ولاردىڭ ءال-اۋقات دەڭگەيىن قايتا باعالاۋ ءۇشىن ۋاقتىلى ارەكەت ەتۋگە مۇمكىندىك بەرەدى، - دەدى مينيستر.
بۇعان دەيىن حابارلانعانداي، ۇكىمەت جاردەماقىلار تولەۋ شارتتارىن بەكىتتى.
وسى ورايدا 2027-جىلعى 1-قاڭتاردان باستاپ قولدانىسقا ەنگىزىلەتىن قۇجاتقا ءتيىستى جاردەماقىلار قامتىلعان.
اتاپ ايتقاندا، پرەمەر-مينيستر ولجاس بەكتەنوۆ اتاۋلى الەۋمەتتىك قولداۋدىڭ جاڭا جۇيەسىندە مەملەكەت ءوز-ءوزىن قامتاماسىز ەتە المايتىن جاندارعا عانا قولداۋ كورسەتەتىنىن ءمالىم ەتتى.