سالا ءمينيسترىنىڭ ايتۋىنشا، قازىر پرەمەر-ءمينيستردىڭ ورىنباسارىنىڭ توراعالىعىمەن جۇمىس توبى قۇرىلىپ، بەلسەندى جۇمىس جۇرگىزۋدە. ونىڭ قۇرامىنا پرەزيدەنت اكىمشىلىگىنىڭ، ستراتەگيالىق جوسپارلاۋ جانە رەفورمالار اگەنتتىگىنىڭ، ۇلتتىق ەكونوميكا جانە قارجى مينيسترلىكتەرىنىڭ، سونداي-اق باسقا دا ورتالىق مەملەكەتتىك ورگانداردىڭ وكىلدەرى كىرگەن.
- نورماتيۆتىك-قۇقىقتىق اكتىلەرگە ساراپتاما جۇرگىزىلىپ، وتباسىنىڭ الەۋمەتتىك ءال-اۋقاتىن باعالاۋ ادىستەمەسى پىسىقتالدى. قازىرگى كەزدە وتباسىلاردىڭ ناقتى ماتەريالدىق جاعدايىن ەسكەرە وتىرىپ، ءتيىستى تۇزەتۋلەر ەنگىزىلىپ جاتىر، - دەدى مينيستر اسقاربەك ەرتايەۆ.
سونىمەن بىرگە جاساندى ينتەللەكت جانە سيفرلىق دامۋ مينيسترلىگىمەن بىرلەسىپ، مەملەكەتتىك ورگانداردىڭ اقپاراتتىق جۇيەلەرىندەگى دەرەكتەردى وزەكتەندىرۋ بويىنشا ريەۆيزيا جۇرگىزىلىپ جاتىر.
ءوڭىر اكىمدىكتەرى جانىنان جۇمىس شتابتارى قۇرىلىپ، جاردەماقى الۋشىلاردىڭ ماتەريالدىق جاعدايىن تەكسەرۋ قولعا الىنعان.
- قاراشا ايىندا مۇقتاجدىق پرينتسيپتەرىن 2027 -جىلعى 1-قاڭتاردان باستاپ كەزەڭ-كەزەڭمەن ەنگىزۋ مەحانيزمدەرىن جەتىلدىرۋ جۇمىستارى اياقتالادى. بيىلعى جەلتوقساندا وتباسىنىڭ سيفرلىق كارتاسى ەكىنشى دەڭگەيدەگى بانكتەردىڭ جۇيەسىمەن ينتەگراتسيالانادى. حالىق اراسىندا رەفورمانىڭ ماقساتتارى جانە ونى ەنگىزۋ ءتارتىبى تۋرالى بەلسەندى اقپاراتتىق-ءتۇسىندىرۋ جۇمىستارى تۇراقتى جۇرگىزىلىپ جاتىر، - دەدى اسقاربەك ەرتايەۆ.
جالپى وتباسىنىڭ الەۋمەتتىك ءال-اۋقاتىن باعالاۋ ادىستەمەسى ازاماتتاردىڭ ناقتى جاعدايىنا قاراي پىسىقتالادى. اتاپ ايتقاندا، ادامداردىڭ تابىسىن جانە كرەديتتىك مىندەتتەمەلەرىن، ونىڭ ىشىندە يپوتەكالىق قارىزداردى باعالاۋ تاسىلدەرى وزگەرتىپ جاتىر.
اۆتوموبيل مەن اۋىل شارۋاشىلىعى تەحنيكاسىنىڭ بار-جوعى جانە جاعدايى ەسكەرىلەدى. وتباسىنىڭ اسىراۋعا جۇمسالاتىن شىعىنداردى، سونداي-اق وتباسىنىڭ جالعىز اسىراۋشىسى مەن جالعىز تۇرعىن ءۇيىنىڭ بولۋىن ەسكەرۋ كوزدەلىپ وتىر.
- مۇقتاجدىق پرينتسيپتەرىن ەنگىزۋدىڭ پيلوتتىق جوباسى 2027 -جىلى 1-قاڭتاردا ىسكە قوسىلادى. ءبىرىنشى- ەكىنشى كەزەڭ قاڭتار-اقپان ايلارىندا، ءۇشىنشى- ءتورتىنشى كەزەڭ - اقپان، ءساۋىر ايلارىندا جۇزەگە اسىرىلادى. مەملەكەت باسشىسى اتاپ كوسرەتكەندەي، پيلوتتىق جوبانى مۇقيات تەكسەرىستەن وتكىزۋدىڭ ءبىرىنشى كەزەڭىندە الەۋمەتتىك كومەكتى وڭتايلاندىرۋدىڭ تيىمدىلىگى قارالاتىن بولادى. ناتيجەسىنە قاراي بۇل جۇمىستى كەڭ اۋقىمدا قولدانۋعا كىرىسەمىز، - دەدى ەڭبەك جانە حالىقتى الەۋمەتتىك قورعاۋ ءمينيسترى.
كەشە مەملەكەت باسشىسى قاسىم-جومارت توقايەۆ ءوز جولداۋىندا نەگىزسىز جاردەماقىلاردىڭ كوبەيۋى مەملەكەتتىك باسقارۋدىڭ السىزدىگىن كورسەتەتىنىن ايتقان ەدى.