كونديتەرلىك ونىمدەر، ەت جانە ءسۇت ونىمدەرىمەن قاتار، شەتەلدىكتەر التاي بالىن، الما پاستيلاسىن، جەمىس-جيدەك تىسكەباسارلارىن جانە ۇلتتىق تاتتىلەردى دە جوعارى باعالايدى، دەپ حابارلايدى 24KZ.
بۇل تۋرالى ساۋدا ساياساتىن دامىتۋ ورتالىعى - QazTrade ەكسپورتتى جەدەلدەتۋ دەپارتامەنتىنىڭ اعا مەنەدجەرى الىبەك قاۋشەنوۆ ايتتى. قازىر ازىق-تۇلىك ونىمدەرىنىڭ ىشىندە كونديتەرلىك ونىمدەر، ەت جانە ءسۇت ونىمدەرى وتە تانىمال. جالپى، شەتەلدىك ساتىپ الۋشىلاردىڭ قىزىعۋشىلىعى جوعارى. ول ۇيرەنشىكتى تاۋارلارمەن عانا شەكتەلمەيدى. التايدىڭ تابيعي بالىنا، الما پاستيلاسىنا، جەمىس-جيدەك تىسكەباسارلارىنا، ءتىپتى كەيبىر ۇلتتىق ونىمدەرگە دە قىزىعۋشىلىق زور، - دەدى ول.
قازاقستاندىق ونىمدەر الەمنىڭ بارعان سايىن كوپ ەلىنىڭ نارىعىنا شىعىپ جاتىر. وتاندىق وندىرۋشىلەر ورتالىق ازيا مەن كورشىلەس مەملەكەتتەردەن بولەك، قىتاي، كورەيا، ەۋروپالىق وداق ەلدەرى جانە تاياۋ شىعىس نارىقتارىنا دا جول اشۋدا. قازاقستاندىق وندىرۋشىلەردىڭ ساۋدا گەوگرافياسى بىرتىندەپ كەڭەيىپ كەلەدى. بۇرىنعىداي تەك ورتالىق ازيا نەمەسە پوستكەڭەستىك ەلدەرمەن عانا شەكتەلمەيمىز.
قازىر قىتاي، كورەيا، ەۋروپالىق وداق ەلدەرى جانە تاياۋ شىعىس باعىتىندا دا جۇمىس ءجۇرىپ جاتىر. ماسەلەن، جۋىردا ءبىر كومپانيا كۇنباعىس ءدانىن ءۇندىستان نارىعىنا شىعاردى. سونداي-اق جاقىندا تۇرىكمەنستانعا بارىپ، «حالك» سۋپەرماركەتتەر جەلىسىندە قازاقستاندىق ونىمدەر سورەسىن اشتىق. جەرگىلىكتى ساتىپ الۋشىلاردىڭ قىزىعۋشىلىعى جوعارى. قازىر جاڭا جەتكىزىلىمدەر بويىنشا كەلىسسوزدەر جۇرگىزىپ جاتىرمىز، - دەدى الىبەك قاۋشەنوۆ.
ماماننىڭ ايتۋىنشا، قازاقستاندىق ونىمدەردىڭ باستى ارتىقشىلىقتارىنىڭ ءبىرى - تابيعيلىعى مەن ساپالى شيكىزاتى. شەتەلدىك ساتىپ الۋشىلار ءداستۇرلى تاۋارلارمەن قاتار، ۇلتتىق تاعامدارعا دا قىزىعۋشىلىق تانىتىپ كەلەدى. بۇرىن نەگىزىنەن كونديتەرلىك ونىمدەرگە سۇرانىس بولسا، قازىر ۇلتتىق تاعامدارعا دا قىزىعۋشىلىق ارتىپ كەلەدى. ماسەلەن، شەتەلدىك ساتىپ الۋشىلار «بايان سۇلۋ» كومپانياسىنىڭ جەنتىن ۇناتىپ قالدى.
سونداي-اق بالىق ونىمدەرىنە دە سۇرانىس بار. مىسالى، پولشاعا كوكسەركە بالىعىن جەتكىزۋ جونىندە كوپتەگەن ءوتىنىم ءتۇسىپ جاتىر، - دەدى الىبەك قاۋشەنوۆ. وسىلايشا، شەتەل نارىعىندا قازاقستاندىق ونىمدەردىڭ ءتۇر-ءتۇرى كوبەيىپ كەلەدى. ءداستۇرلى ازىق-تۇلىكپەن قاتار، ۇلتتىق ءدامى مەن ەرەكشەلىگى بار ونىمدەرگە دە سۇرانىس ارتىپ وتىر.