الەۋمەتتىك ماڭىزى بار ازىق-تۇلىك تاۋارلارى ترانزيتىنە باقىلاۋ كۇشەيدى
استانا. KAZINFORM - ساۋدا كوميتەتى زاڭسىز جۇمىرتقا تاسىمالى مەن الەۋمەتتىك ماڭىزى بار ازىق-تۇلىك تاۋارلارى ترانزيتىنە باقىلاۋدى كۇشەيتتى
ساۋدا جانە ينتەگراتسيا مينيسترلىگىندە ەلىمىزدىڭ ىشكى نارىعىنا زاڭسىز جولمەن اكەلىنگەن جۇمىرتقالاردى ساتۋ ماسەلەسى جانە ۋاقىتشا شەكتەۋ شارالارى ەنگىزىلگەن الەۋمەتتىك ماڭىزى بار ازىق-تۇلىك تاۋارلارىنىڭ ءترانزيتىن باقىلاۋ تەتىكتەرىن پىسىقتاۋ جونىندە كەڭەس ءوتتى. اتالعان كەڭەس ساۋدا كوميتەتىنىڭ ءتوراعاسى ايدار ابىلدابەكوۆتىڭ توراعالىعىمەن ءوتتى.
2025 -جىلدىڭ 4-ساۋىرىندە اۋىل شارۋاشىلىعى ءمينيسترىنىڭ 101-بۇيرىعىنا سايكەس، ىشكى نارىقتاعى باعانى تۇراقتاندىرۋ جانە دەمپينگتىڭ الدىن الۋ ماقساتىندا قازاقستان رەسپۋبليكاسىنىڭ اۋماعىنا تاۋىق جۇمىرتقالارىن اكەلۋگە ۋاقىتشا تىيىم سالىنعان بولاتىن.
كەڭەس جۇمىسىنا اۋىل شارۋاشىلىعى مينيسترلىگى، قارجى مينيسترلىگى مەملەكەتتىك كىرىستەر كوميتەتى، قارجىلىق مونيتورينگ اگەنتتىگى، دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتى، اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتى، ۇلتتىق قاۋىپسىزدىك كوميتەتىنىڭ شەكارا قىزمەتى مەن قازاقستان قۇس وسىرۋشىلەر وداعىنىڭ وكىلدەرى قاتىستى.
جيىندى وتكىزۋگە قازاقستان قۇس وسىرۋشىلەر وداعىنان تۇسكەن وتىنىشتەر نەگىز بولدى. وندا كەيبىر ساۋدا ورىندارىندا مەملەكەتتىك باقىلاۋسىز ەركىن ساتىلىپ جاتقان يمپورتتىق جۇمىرتقالاردىڭ زاڭسىز اكەلىنۋ جاعدايلارى تۋرالى اقپارات كورسەتىلگەن. 2025 -جىلدىڭ ماۋسىم ايىندا جۇرگىزىلگەن مونيتورينگ ناتيجەسىندە ەلىمىزدىڭ ءبىرقاتار وڭىرلەرىندە تاڭبالانباعان نەمەسە كونتراباندالىق سيپاتقا يە ونىمدەردىڭ ساتىلىپ جاتقانى انىقتالعان. بۇل جاعدايلار ىشكى نارىقتاعى ادال باسەكەگە نۇقسان كەلتىرىپ، تۇتىنۋشىلاردىڭ قاۋىپسىزدىگىنە ءقاۋىپ توندىرەدى.
ساۋدا كوميتەتىنىڭ ءتوراعاسى ايدار ابىلدابەكوۆ مەملەكەتتىك ورگانداردىڭ ءوزارا ءىس-قيمىلىن كۇشەيتۋ، ارەكەتتەرىن ۇيلەستىرۋ، سونداي-اق بۇزۋشىلىقتارعا جەدەل دەن قويۋعا مۇمكىندىك بەرەتىن ءتيىمدى مونيتورينگ تەتىكتەرىن ەنگىزۋدىڭ ماڭىزدىلىعىن اتاپ ءوتتى.
كەڭەس قورىتىندىسى بويىنشا الەۋمەتتىك ماڭىزى بار ازىق-تۇلىك تاۋارلارىنىڭ اينالىمىن باقىلاۋ جۇيەسىن جەتىلدىرۋ جانە ۋاقىتشا شەكتەۋ شارالارى ەنگىزىلگەن ونىمدەر بويىنشا ۋاكىلەتتى مەملەكەتتىك ورگاندار اراسىندا ءتيىمدى ءوزارا ءىس- قيمىلدى قامتاماسىز ەتۋ جونىندە بىرلەسكەن جۇمىستى جالعاستىرۋ تۋرالى ورتاق شەشىم قابىلداندى.