الەۋمەتتىك كومەككە بولىنگەن ءار تەڭگەگە تاڭبا سالىنادى

استانا. KAZINFORM - ۇلتتىق بانك ءتوراعاسىنىڭ ورىنباسارى بەرىك شولپانقۇلوۆ سەنات ۇيىمداستىرعان دوڭگەلەك ۇستەلدە تەڭگەنى بوياۋ تەحنولوگياسى الەۋمەتتىك تولەمدەر جۇيەسىنە ەنگىزىلەتىنىن ءمالىم ەتتى.

- قارجى مينيسترلىگىمەن، كولىك مينيسترلىگىمەن جول سالۋ جوبالارى، سۋبسيديا بويىنشا جۇمىس ىستەپ جاتىرمىز. قازىر ەڭبەك جانە حالىقتى الەۋمەتتىك قورعاۋ مينيسترلىگى دە كىرىسىپ جاتىر. الەۋمەتتىك كومەك كەپىلدى تۇردە الۋشىعا جەتۋ كەرەك. بولىنگەن اقشانى الەۋمەتتىك كومەك الۋشى العانىنا كوز جەتكىزۋگە تاڭبالانعان سيفرلىق تەڭگە مۇمكىندىك بەرەدى، وزىنە تيەسىلى اقشانىڭ ءىزىن تاپپاي قالمايدى، - دەدى ۇلتتىق بانك وكىلى.

سونداي-اق، ول «اكىمشىلەندىرىلگەن قوسىلعان قۇن سالىعى» تەتىگىنىڭ ەكسپورتتاۋشىلاردىڭ جۇمىسىن جەڭىلدەتەتىنىن ايتتى.

- سيفرلىق تەڭگە قارجى تەحنولوگياسىنىڭ دامۋىنا جاۋاپ دەپ ايتۋعا بولادى. اعىمداعى ترەندتەرگە جاۋاپ رەتىندە ازىرلەپ ىسكە قوستىق. قازىر «اكىمشىلەندىرىلگەن قوسىلعان قۇن سالىعى» تەتىگىن ىسكە قوستىق. قوسىلعان قۇن سالىعىن تولەۋشىلەر ول جوباعا كىرگىسى كەلەدى. ويتكەنى قوسىلعان قۇن سالىعىن وتەپ بەرۋ مەرزىمى 65 كۇننەن 5 كۇنگە دەيىن قىسقارادى. ءتىپتى 1 مينۋتقا دەيىن قىسقارتۋ ماسەلەسى قارالىپ جاتىر.

مەملەكەتتىك كىرىستەر كوميتەتى بۇل تەتىكتى ازىرگە قولمەن ينتەگراتسيالاپ جاتىر. جىل اياعىنا دەيىن تولىق اۆتوماتتاندىرۋدى جوسپارلاپ وتىرمىز، - دەدى ول سەناتورلاردىڭ سۇراعىنا جاۋاپ بەرە وتىرىپ.

بۇعان دەيىن ۇلتتىق بانك مامىر ايىندا ۇلتتىق قوردان 1 ميلليارد دوللار ساتۋى مۇمكىن ەكەنىن جازعان ەدىك.