الەۋمەتتىك جەلىدە كىمدەر ساياسي پىكىرتالاسقا قۇمار؟
استانا. قازاقپارات - الەۋمەتتىك جەلىدە ساياسي پىكىرتالاستارعا كىمدەر ءجيى ارالاسادى؟ ا ق ش پەن ازيانىڭ جەتى ەلىن قامتىعان حالىقارالىق زەرتتەۋ بۇل سۇراققا تىڭ جاۋاپ ۇسىندى، دەپ حابارلايدى El.kz ينتەرنەت پورتالى.
زەرتتەۋ ناتيجەسى كوپشىلىكتى تاڭعالدىردى: جەلىدەگى ساياسي بەلسەندىلىككە كوبىنە ينتەللەكتى جوعارى ادامدار ەمەس، كەرىسىنشە ەموتسياعا بەرىلگىش، مازاسىز جانە ءوزىن كورسەتۋگە بەيىم تۇلعالار كوبىرەك تارتىلاتىنى انىقتالعان.
بۇل زەرتتەۋدىڭ ناتيجەلەرى Humanities and Social Sciences Communications جۋرنالىندا جاريالاندى.
كىمدەر پىكىرتالاسقا بەيىم؟
عالىمداردىڭ ايتۋىنشا، جەلىدە ساياسي جاڭالىقتارمەن ءبولىسىپ، ءار پوستقا پىكىر قالدىرىپ، قىزۋ ايتىسقا كىرىسەتىندەر - كوبىنەسە:
پسيحوپاتيا بەلگىلەرى بار (مىسالى، سالقىنقاندى، اشۋعا تەز بوي الدىرعىش، وزگەنىڭ پىكىرىنە ءمان بەرمەيتىندەر)؛
FoMO- عا شالدىققاندار (ياعني، بىردەڭەدەن قالىپ قويامىن دەپ مازاسىزداناتىندار).
ولار ۇنەمى الەۋمەتتىك جەلىدە وتىرادى، جاڭالىقتى قالت جىبەرمەيدى، ءتىپتى ءبارىن ءوز باقىلاۋىندا ۇستاعىسى كەلەدى.
ال اقىلدى ادامدار شە؟
زەرتتەۋ كورسەتكەن تاعى ءبىر قىزىقتى تۇجىرىم - ويلاۋ قابىلەتى جوعارى، سىني ويلاي بىلەتىن ادامدار مۇنداي پىكىرتالاسقا سيرەك ارالاسادى. ولار ەموتسياعا ەرىك بەرمەيدى، اقپاراتتى سۇزگىدەن وتكىزىپ بارىپ قانا ءوز ويىن بىلدىرەدى. ال اناليز جاساۋ قابىلەتى تومەن ادامدار كەرىسىنشە، تەز اشۋلانىپ، بىردەن پىكىر جازۋعا قۇمار كەلەدى.
زەرتتەۋدە كەي ەلدەردە نارتسيسسيزم، ياعني ءوزىن بارىنەن بيىك ساناۋ دا جەلىدەگى ساياسي بەلسەندىلىككە اسەر ەتەتىنى ايتىلعان. ءبىراق بۇل بارلىق ەلدەرگە بىردەي ەمەس. مۇنى عالىمدار ءار ەلدەگى مادەني ەرەكشەلىكتەرمەن بايلانىستىرادى.
ايتا كەتۋ كەرەك، وسى زەرتتەۋگە قاتىسقان عالىمدار بۇعان دەيىن دە قىزىقتى تۇجىرىم جاساعان: ەگەر سمارتفوندا ينتەرنەتتى ەكى اپتا پايدالانباساڭىز، مي قىزمەتى شامامەن 10 جىلعا جاسارادى ەكەن.