الەمنىڭ مىقتى اسكەرلەرى رەيتينگىندە وزبەكستان 65-ورىندا تۇر
الەم ەلدەرى ارميالارىنىڭ جىل سايىنعى رەيتينگىندە وزبەكستاننىڭ قارۋلى كۇشتەرى 65-ورىنعا يە بولدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
الەمدەگى ەڭ مىقتى اسكەرلەردىڭ رەيتينگىن Global Firepower تالداۋ ورتالىعى ۇسىندى. تىزىمگە 145 مەملەكەت ەنگەن.
مۇندا وزبەكستان ءۇش پوزيتسياعا سىرعىپ، 65-ورىنعا تۇراقتادى. وسىدان ءبىر جىل بۇرىن اتالعان ەل رەيتينگىدە 62- ورىندا تۇرعان ەدى. جوعارىدا كەلتىرىلگەن مالىمەتتەرگە سايكەس، وزبەكستاننىڭ قورعانىس بيۋدجەتى 796 ميلليون دوللارعا باعالاندى. قىزمەتكە جارامدى ادامي رەسۋرستاردىڭ جالپى سانى - 13,7 ميلليون، ال اسكەري قىزمەتشىلەر سانى - 68 مىڭ.
ورتالىق ازيا ەلدەرى اراسىندا قازاقستان ارمياسىنىڭ پوزيتسياسى ىلگەرى. ەلىمىز رەيتينگىدە 58-ورىندا تۇر. تۇرىكمەنستان – 83، قىرعىزستان – 100، تاجىكستان بولسا 107-ورىنعا جايعاستى.
الەمدەگى ەڭ مىقتى ارميالاردىڭ ۇشتىگىنە ا ق ش، رەسەي جانە قىتاي ەندى. سونداي-اق العاشقى وندىققا ءۇندىستان، وڭتۇستىك كورەيا، ۇلى بريتانيا، جاپونيا، تۇركيا، پاكىستان جانە يتاليا كىردى.
Global Firepower رەيتينگى 60-تان استام ءتۇرلى فاكتورلار نەگىزىندە قۇرىلادى. اسكەري سالانى قارجىلاندىرۋ كولەمى، اسكەر جانە بولىمدەردىڭ سانى، ولاردىڭ ماتەريالدىق-تەحنيكالىق جاراقتاندىرىلۋى، ەلدىڭ كولىك ينفراقۇرىلىمى مەن گەوگرافيالىق ورنالاسۋى دا ەسكەرىلەدى.
اۆتور
الما مۇقانوۆا