الەمنىڭ كەي ەلدەرى 4 كۇندىك جۇمىس اپتاسىنا كوشۋگە نيەتتى

استانا. قازاقپارات- الەمنىڭ ءبىرقاتار ەلى اپتاسىنا 4 كۇن عانا جۇمىس ىستەمەك. بۇل تاجىريبەنى سىناقتان وتكىزىپ كورگەندەر دە از ەمەس. ناتيجەسىندە جاپونيا، وڭتۇستىك كورەيا بيلىگى ونى ءبىرجولا ەنگىزۋدى شەشىپ، ءبىرقاتار ءىس-شارانى قولعا الا باستاعان.

جاپونيا پارلامەنتى 4 كۇندىك جۇمىس اپتاسىن ەنگىزبەكشى. قازىر كۇنشىعىس ەلىندە كۇنىنە 12 ساعات جۇمىس ىستەۋ قالىپتى جاعداي سانالادى. ءبىراق ونىڭ كەرى سالدارى كوپ ەكەنى ءجيى ايتىلادى. وسىعان بايلانىستى ەلدە «كاروسي» اتتى ۇعىم قالىپتاسقان. بۇل جاپون تىلىنەن اۋدارعاندا، جۇمىس ۋاقىتىنان ارتىق جۇمىس ىستەۋدىڭ كەسىرىنەن ءوز وزىنە قول جۇمساۋ دەگەندى بىلدىرەدى. دەرەككە سۇيەنسەك جىل سايىن 54 ادام كوز جۇمادى ەكەن. جەرگىلىكتى بيلىك 2025 -جىلعا قاراي ونىڭ سانىن 30 پايىزعا قىسقارتۋعا نيەتتى. بۇل ءۇشىن اپتاسىنا 60 ساعاتتان استام جۇمىس ىستەيتىندەردىڭ %5- ىن قىسقارتۋدى كوزدەپ وتىر.

كەي كومپانيالار ءوز قىزمەتكەرلەرىنە جۇمىستان ەرتە كەتۋگە مۇمكىندىك بەرگەن. 2021 -جىلى Microsoft كومپانياسى وسى ەلدەگى قىزمەتكەرلەرىن ءبىر ايعا 32 ساعاتتىق جۇمىس اپتاسىنا كوشىرىپ، تاجىريبە جاساپ كورگەن. ناتيجەسىندە قىزمەتكەرلەردىڭ وندىرىستىك قۋاتى 40 پايىزعا ءوسىپ، بىرلەستىكتىڭ جارىق پەن جىلۋعا كەتەتىن قارجىسى ازايعان.

وڭتۇستىك كورەيا دا 4 كۇندىك جۇمىس اپتاسىنا كوشۋدى قۇپ كورەدى. Yonhap اقپارات اگەنتتىگىنىڭ دەرەگى بويىنشا، كيەنگيدو پروۆينسياسىندا ءار 2 اپتا سايىن، قىزمەتكەرلەر 4 كۇندىك جۇمىس اپتاسىن نەمەسە ءار اپتا سايىن جارتى كۇندىك جۇمىس كەستەسىن تاڭداي الادى.

ساراپشىلاردىڭ ايتۋى بويىنشا، بۇل قىزمەتكەردىڭ فيزيكالىق شارشاۋ مەن كۇيزەلىستى ازايتۋعا كومەكتەسەدى. 2023 -جىلعى حالىقارالىق Gallup جوباسى ازىرلەگەن كورسەتكىش بويىنشا، وڭتۇستىك كورەيا جۇمىس كەستەسى ەڭ تىعىز، ءارى جۇمىس ۋاقىتى كوپ ەلدەردىڭ العاشقى بەستىگىندە بولدى.

بيىل جىل باسىندا بريتانيالىق كومپانيالار 4 كۇندىك جۇمىس اپتاسىنا ۋاقىتشا كوشىپ سىناق جۇرگىزدى. 6 ايلىق پيلوتتىق جوباعا 61 مەكەمە قاتىستى. ولاردىڭ 89 پايىزىنىڭ از جۇمىس ىستەپ، كوپ شارۋا تىندىرۋعا بولاتىنىنا كوزدەرى جەتكەن. قىزمەتكەرلەرى جالاقىنى تولىق العان. كۇيزەلىستەن ارىلىپ، جۇمىسقا دەگەن قۇلشىنىستارى ارتقان. وسىعان بايلانىستى تاجىريبە اياقتالعاننان كەيىن، سىناققا قاتىسقان ءار ەكىنشى بىرلەستىك 4 كۇندىك كەستەگە ءبىرجولا كوشكەن.

ال ەۋروپا ەلدەرىنىڭ ىشىندە بەلگيا بىلتىر ءبىرىنشى بولىپ 4 كۇندىك جۇمىس اپتاسىنا كوشتى. ءبىراق قىزمەتكەرلەردىڭ 4 نە 5 كۇندىك جۇمىس كەستەسىنىڭ ءبىرىن تاڭداپ الۋعا مۇمكىندىگى بار. ەڭ باستىسى تاپسىرىلعان شارۋانىڭ ۋاقىتىندا اياقتالۋىنا ءمان بەرىلەدى. جۇمىس كۇنى قىسقارعانىمەن، جالاقى مولشەرى وزگەرمەدى. بۇل تاجىريبەنى بيىل اقپاندا گەرمانيا دا ەنگىزىپ، 50-گە تارتا كومپانيا 4 كۇندىك جۇمىس اپتاسىنا كوشتى.

اۆتورى: فاريزا جانعانايەۆا

24.kz