الەمنىڭ ءار تۇكپىرىندە ءتۇرلى ەكسترەميستىك كۇشتەردىڭ بەلسەندىلىگى ارتىپ كەلە جاتقانى بايقالادى - پرەزيدەنت

استانا. KAZINFORM - راديكالدى يدەولوگيانى دارىپتەۋ جانە كسەنوفوبيا وتىن تۇتاتۋ ءۇشىن حالىقارالىق تۇراقسىزدىقتى پايدالانىپ قالعىسى كەلەتىندەردىڭ ارەكەتى انىق كورىنىپ وتىر. بۇل تۋرالى مەملەكەت باسشىسى قاسىم-جومارت توقايەۆ «بىرلىك. جاسامپازدىق. ورلەۋ» تاقىرىبىمەن ءوتىپ جاتقان قازاقستان حالقى اسسامبلەياسىنىڭ كەزەكتى 33-سەسسياسىندا ايتتى.

«ءبىز جاھاندىق كاتاكليزم بەلەڭ الىپ، ءتۇرلى مەملەكەتتەر اراسىندا اسكەري-ساياسي، ساۋدا-ەكونوميكالىق تەكەتىرەس، ءتىپتى مادەني-گۋمانيتارلىق تارتىس كۇشەيىپ بارا جاتقانىنا كۋا بولىپ وتىرمىز. راديكالدى يدەولوگيانى دارىپتەۋ جانە كسەنوفوبيا وتىن تۇتاتۋ ءۇشىن حالىقارالىق تۇراقسىزدىقتى پايدالانىپ قالعىسى كەلەتىندەردىڭ ارەكەتى انىق كورىنۋدە. كەيبىر مەملەكەتتەردىڭ گەوستراتەگيالىق امبيتسياسىنان ەتنو ءدىني استار ىزدەۋگە تىرىساتىنداردىڭ، ءتىپتى، ونى وركەنيەتارالىق قاقتىعىس رەتىندە كورسەتكىسى كەلەتىندەردىڭ ءۇنى قاتتى شىعا باستادى. سونىڭ سالدارىنان قازىر الەمنىڭ ءار تۇكپىرىندە ءتۇرلى ەكسترەميستىك كۇشتەردىڭ بەلسەندىلىگى ارتىپ كەلە جاتقانى بايقالىپ وتىر»، - دەدى پرەزيدەنت.

مەملەكەت باسشىسى لاڭكەستىك قاۋىپ-قاتەرلەر تاعى دا العى شەپكە شىققانىنا نازار اۋدارتتى.

«تاياۋدا ماسكەۋ ىرگەسىندە جۇرتتى قانعا بوكتىرگەن لاڭكەستىك وقيعا جۇرەگىمىزگە وتە اۋىر ءتيدى. كوپتەگەن ازاماتتار قايعىلى وقيعانىڭ قۇرباندارىنا جاناشىرلىق، تىلەۋلەستىك تانىتىپ، رەسەيدىڭ قازاقستانداعى ەلشىلىگى مەن كونسۋلدىعى عيماراتتارىنىڭ الدىنا گۇل شوقتارىن قويدى. الەمنىڭ بارلىق دەرلىك ەلدەرى وسىنداي كورىنىسكە كۋا بولدى. قازاقستان حالىقارالىق قۇقىقتى جانە گۋمانيستىك يدەالداردى بەرىك ۇستاناتىن ەل رەتىندە العاشقىلاردىڭ ءبىرى بولىپ بىرىككەن ۇلتتار ۇيىمىنا مۇشە مەملەكەتتەردى بەيبىت حالىققا جاسالعان سۇمدىق قاتىگەز ارەكەتتى ايىپتاۋعا شاقىردى. بارشا ادامزات ءوزارا ديالوگ ورناتىپ، كۇش بىرىكتىرۋ ارقىلى عانا حالىقارالىق قاتىناس سالاسىنداعى كۇيرەۋ مەن ىدىراۋ ۇردىسىنە توتەپ بەرەدى، بەرەكەسىزدىك پەن سەنىمسىزدىكتى ەڭسەرە الادى»، - دەدى قاسىم-جومارت توقايەۆ.

اۆتور
مارلان جيەمباي