الەمدىك رەيتينگىدە قازاقستاننىڭ ۋنيۆەرسيتتەرى قالاي باعالانىپ ءجۇر

استانا. KAZINFORM - عىلىم جانە جوعارى ءبىلىم مينيسترلىگى قازىرگى كەزدە قازاقستاننىڭ قاي ۋنيۆەرسيتتەرى الەمدىك وزىق وقۋ ورىندارىنىڭ رەيتينگىندە جوعارى باعالانىپ جۇرگەنىن حابارلادى.

- بيىل شىققان QS World University Rankings 2026 ناتيجەلەرىنە سايكەس، رەيتينگكە قازاقستاننىڭ 20 جوعارى وقۋ ورنى ەندى. رەيتينگكە ەنگەن ءۇش جاڭا ۋنيۆەرسيتەت - ش. ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتى، م. قوزىبايەۆ اتىنداعى سولتۇستىك قازاقستان ۋنيۆەرسيتەتى جانە شاكارىم ۋنيۆەرسيتەتى. بۇل وقۋ ورىندارى العاش رەت الەمدىك رەيتينگكە كىردى. ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى العاش رەت جۇمىس بەرۋشىلەر اراسىنداعى بەدەل ينديكاتورى بويىنشا الەمنىڭ ۇزدىك 100 ۋنيۆەرسيتەتىنىڭ قاتارىنا كىردى. سونداي-اق ءال-فارابي اتىنداعى قازاق ۇلتتىق ۋنيۆەرسيتەتى جانە باسقا دا 5 ۋنيۆەرسيتەت وقىتۋشىلار مەن ستۋدەنتتەردىڭ ءبىلىم بەرۋ پروتسەسىندەگى بايلانىسى بويىنشا 100 ۇزدىك قاتارىنان ورىن الدى. بۇل كورسەتكىش وقۋ پروتسەسىنىڭ ساپاسى مەن جەكە قاتىناسقا نەگىزدەلگەن ءبىلىم بەرۋدىڭ ماڭىزىن بىلدىرەدى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

ۆەدومستۆو اقپاراتىنا قاراعاندا، جاڭا رەيتينگتە Abai University 628-ورىندى يەلەنىپ، بىلتىرمەن سالىستىرعاندا بىردەن 43 پوزيتسياعا جوعارى كوتەرىلدى (671-680 ارالىعى). وسىلايشا، ۋنيۆەرسيتەت الەمنىڭ ۇزدىك 650 جوعارى وقۋ ورنىنىڭ قاتارىنا كىرىپ، قازاقستاننىڭ الدىڭعى قاتارلى ۇزدىك 5 ۋنيۆەرسيتەتىنىڭ ءبىرى رەتىندە ءوز ورنىن نىعايتتى.

بۇدان بۇرىن حابارلانعانداي، عىلىم جانە جوعارى ءبىلىم ءمينيسترى ساياسات نۇربەك مەملەكەتتىك ۋنيۆەرسيتەتتەردە وقۋ اقىسى وسپەيتىنىن ايتتى.