الەمدىك نارىقتا بيدايدىڭ قىمباتتاعانى ديقاندارىمىزعا قولايلى - ەكونوميست

استانا. قازاقپارات - الەمدىك نارىقتا بيداي مەن ارپا قۇنى كۇن ساناپ قىمباتتاپ بارادى. بۇل تۋرالى اۋىل شارۋاشىلىعى مينيسترلىگى حابارلادى. قارا تەڭىزدەگى بيدايدىڭ ءار تونناسى 250 دوللارعا جەتتى.

«بۇل ديقاندارىمىزعا قولايلى»، - دەيدى ساراپشىلار. دەگەنمەن شيكىزاتتى ساتۋدا تۇيتكىلدەر جوق ەمەس. ول قانداي تۇيتكىلدەر؟ حالىقارالىق استىق كەڭەسىنىڭ مالىمەتى بويىنشا بيىل ەگىن جيناۋ جۇمىستارى باستالعاندا قارا تەڭىزدەگى رەسەيلىك بيدايدىڭ باعاسى 216 دوللار بولعان. سوندا لوگيستيكا شىعىنىن الىپ تاستاعاندا قازاقستاندىق ءونىمنىڭ ءار تونناسى 61 مىڭ تەڭگە ەدى. ەندى 74-81 مىڭ تەڭگە شاماسىندا. بۇل وتاندىق ديقاندار ءۇشىن قولايلى.

ساپارباي جوبايەۆ، ەكونوميست:

- ەۋروپادا قۋاڭشىلىق وتكەن جىلى. بيىلعى سۋ تاسقىندارى. ءسويتىپ، كوپ جەردە بيداي، استىقتىڭ ونىمدەرى بولماي قالدى. ءسويتىپ، ونى وڭتۇستىككە، اۆستراليا، وڭتۇستىك افريكا، برازيليا، ارگەنتينادا جۇمىس قىلعان ەدى. ولاردا دا ونشا ءونىم بولماي قالدى. الەمدىك باعا 250 دوللارعا جەتسە، بۇل ءبىزدىڭ قازانىمىز قاينايدى دەگەن ءسوز.

بيىل ەلىمىزدە 26 ميلليون توننا شاماسىندا ءداندى داقىل جينالدى. بۇل - رەكوردتىق كورسەتكىش. بىلتىردان قالعان تاعى 4 ميلليون توننا ءونىم بار. الەمدىك نارىقتاعى باعا ءتيىمدى بولعانىمەن، سىرتقا ساتۋ وڭاي بولماي تۇر. بۇرىن ەكسپورتتىڭ تەڭ جارتىسى ورتالىق ازيا ەلدەرىنە تيەسىلى ەدى. «قازىر سۇرانىس تومەندەدى، ويتكەنى بيىلعى ءونىم ساپاسى تومەندەپ كەتتى»، - دەيدى ەكسپورتتىق كومپانيا وكىلدەرى.

رۋستام مانسىروۆ، ەكسپورتتىق كومپانيا ديرەكتورى:

- ءونىم وتە مول، ءبىراق ساپاسى 4-سۇرىپتى. وعان سۇرانىس جوقتىڭ قاسى. قازىر وزبەكستاننىڭ وزىندە مۇنداي استىق جەتىپ ارتىلادى. نارىقتا ساپالى ءونىم جەتىسپەي تۇر. بىزگە ەڭ ءتيىمدىسى - قىتايعا ساتۋ. الايدا وعان ينفراقۇرىلىم ايتارلىقتاي دايىن ەمەس.

اۋىل شارۋاشىلىعى مينيسترلىگى ءونىمدى رەسەي ارقىلى تاسىمالداۋ ماسەلەسىن پىسىقتاپ جاتىر. كورشى ەل تاراپى جۋىردا كەي داقىلداردىڭ ترانزيتىنە رۇقسات بەرىلگەنىن حابارلادى. دەگەنمەن استىق ۆاگونداردان كەمەگە تىكەلەي جەتكىزىلۋى كەرەك.

24.kz