الەمدىك كوشباسشىلار ترامپ-پۋتين كەلىسسوزىنىڭ ناتيجەلەرىنە قاتىستى پىكىر ءبىلدىردى

ستانا. KAZINFORM - ەۋروپالىق كوشباسشىلار ا ق ش پەن رەسەي پرەزيدەنتتەرى اراسىنداعى ۋكراينانىڭ بارلىق ەنەرگەتيكالىق ينفراقۇرىلىمى بويىنشا دەرەۋ اتىستى توقتاتۋ جانە كەلىسسوزدەردى جالعاستىرۋ تۋرالى كەلىسىمگە وڭ باعا بەردى.

ا ق ش-تىڭ ارنايى وكىلى ستيۆ ۋيتكوفف سەيسەنبى كۇنى كەشكە ساۋد ارابياسى رەسەي مەن ا ق ش اراسىنداعى جەكسەنبى، 23-ناۋرىزدا كەلەسى كەلىسسوزدەردى وتكىزەتىنىن مالىمدەدى، دەپ حابارلايدى DW News.

كەلىسسوزدەردىڭ كەلەسى كەزەڭىندە اتىستى قارا تەڭىزدى قوسا العاندا، تولىق توقتاتۋ جانە بىتىمگەرشىلىك كەلىسىمگە كەلۋ ماسەلەلەرى تالقىلانادى.

گەرمانيانىڭ قىزمەتتەن كەتىپ بارا جاتقان كانتسلەرى ولاف شولتس ۋكراينانىڭ ەنەرگەتيكالىق ينفراقۇرىلىمىنداعى اتىستى توقتاتۋدى ماڭىزدى العاشقى قادام دەپ اتادى، ءبىراق كەلەسى قادام اتىستى تولىق توقتاتۋ بولۋى كەرەك ەكەنىن مالىمدەدى، دەپ حابارلايدى Global Banking and Finance.

- كەلەسى قادام ۋكرايناداعى اتىستى تولىق جانە مۇمكىندىگىنشە تەزىرەك توقتاتۋ بولۋى كەرەك. ارينە، مۇنىمەن كەلىسەتىنىمىز انىق، - دەدى ولاف شولتس.

شولتس ۋكرايناسىز جانە ونىڭ ەركىنە قارسى شەشىم قابىلدانباۋ كەرەكتىگىن قايتالادى.

فرانسيا پرەزيدەنتى ەممانيۋەل ماكرون بۇل پىكىردى قۋاتتاپ، ۋكراينانى ودان ءارى قولدايتىنىن راستادى. ول ترامپ-پۋتين كەلىسسوزدەرىن «دۇرىس باعىتتا ءجۇرىپ جاتىر» دەپ قۇپتادى، دەپ حابارلايدى Global Times.

- العاشقى قادامدار جاسالدى، ءبىراق ءبىزدىڭ ماقساتىمىز وزگەرىسسىز قالدى - تولىقتاي ورىندالاتىن، ولشەنەتىن جانە تەكسەرىلەتىن اتىستى توقتاتۋ جانە كەپىلدىكتەرى بار ۇزاق جانە بەرىك بەيبىتشىلىكتى قامتاماسىز ەتەتىن بەيبىت كەلىسسوزدەردى باستاۋ»، - دەدى ە. ماكرون.

ۋكراينا پرەزيدەنتى ۆلاديمير زەلەنسكي «ەگەر اتىستى ءىشىنارا توقتاتۋ بولسا، بۇل وڭ ناتيجە بولاتىنىن» مويىندادى، دەپ حابارلادى Newsweek.

الايدا ول كەلىسسوزدەردە تولىق اشىقتىق قاجەتتىگىن اتاپ ءوتتى.

- اڭگىمەنىڭ نە تۋرالى ەكەنىن ءتۇسىنۋىمىز كەرەك، ەگجەي-تەگجەيى قانداي؟ ءبىز تولىق حاباردار بولامىز جانە سەرىكتەستەر بىزبەن ءبارىن تالقىلايدى دەپ ۇمىتتەنەمىن، - دەدى ول.

كەيىنىرەك ۆلاديمير زەلەنسكي تىلشىلەرگە بەرگەن سۇحباتىندا ەنەرگەتيكالىق ينفراقۇرىلىم بويىنشا اتىستى توقتاتۋدى قولداپ، اق ۇيدەن رەسەيمەن ناقتى نە تالقىلانعانى تۋرالى تۇسىنىك العىسى كەلەتىنىن اتاپ ءوتتى، دەپ حابارلايدى Yahoo News.

- مەنىڭ ويىمشا، ەگەر ءبىز پرەزيدەنت ترامپپەن سويلەسىپ، رەسەيلىكتەردىڭ امەريكالىقتارعا نە ۇسىنعانىن نەمەسە امەريكالىقتاردىڭ رەسەيلىكتەرگە نە ۇسىنعانىن ەگجەي-تەگجەيلى بىلسەك، دۇرىس بولار ەدى، - دەدى ۆ. زەلەنسكي.

وسىعان دەيىن پۋتين مەن ترامپ تەلەفون ارقىلى سويلەسكەنىن جازدىق.

اقوردانىڭ باسپا ءسوز قىزمەتى قازاقستان پرەزيدەنتىنىڭ وسى كەلىسسوزدەردىڭ قورىتىندىسىن قولدايتىنىن جەتكىزدى.