الەمدىك ب ا ق- تاعى قازاقستان: قانداستار كوشىنىڭ ارتۋى، امۋر جولبارىسى مەن ۇ ق ش ۇ وقۋ-جاتتىعۋى

استانا. KAZINFORM - كەيىنگى اپتادا جاھانداعى ينتەرنەت-باسىلىمدار قازاقستانعا قاتىستى كوپتەگەن جاڭالىقتى ءبولىستى. ونىڭ ىشىندە ەلدەگى ەتنيكالىق قازاقتار سانىنىڭ ءوسۋى، ۇ ق ش ۇ اسكەري وقۋ-جاتتىعۋىنىڭ باعىتى، الماتىعا اكەلىنگەن امۋر جولبارىسىنىڭ جاي-كۇيى مەن ونەركاسىپتەگى مەتاندى ازايتۋعا جاسالعان قادام ەرەكشە اتالعان.

تولىعىراق Kazinform ءتىلشىسىنىڭ شولۋىنان وقىڭىز.

Daryo: جىل باسىنان بەرى قازاقستانعا 12 مىڭ قانداس ورالعان

2024-جىلى 12325 ەتنيكالىق قازاق تاريحي وتانىمەن تابىسىپ، قانداس مارتەبەسىن الدى. ەڭبەك جانە حالىقتى الەۋمەتتىك قورعاۋ مينيسترلىگى تاراتقان مالىمەتكە سۇيەنسەك، قونىس اۋدارعانداردىڭ كوبى قىتاي، وزبەكستان، تۇرىكمەنستان، موڭعوليا، رەسەيدەن كەلگەن. اقپاراتتى Daryo ينتەرنەت-باسىلىمى جاريا ەتتى.

ەلگە ورالعان ازاماتتاردىڭ:

45,6 پايىزى - قىتايدان

39,2 پايىز - وزبەكستاننان

5,5 پايىز - تۇرىكمەنستاننان

5,4 پايىز - موڭعوليادان

3,1 پايىزى رەسەيدەن كەلگەن.

قانداستاردى قونىستاندىرۋ بويىنشا ەڭبەك كۇشى تاپشى وڭىرلەر انىقتالعان. ولار - اقمولا، اباي، قوستاناي، پاۆلودار، شىعىس جانە سولتۇستىك قازاقستان وبلىستارى.

قازاقستاندا ەتنيكالىق قازاقتاردىڭ كەلۋ ءۇردىسى 1991-جىلدان بەرى بار. بۇگىندە 1 ميلليون 140,7 مىڭ ەتنيكالىق قازاق ەلگە كەلگەن. 2020-جىلدان باستاپ اتالعان ازاماتتارعا مادەني-تاريحي بايلانىستى بىلدىرەتىن «قانداس» ستاتۋسى بەرىلدى. 2023-جىلى «ءبىر تەرەزە» قاعيداتى ارقىلى قانداس مارتەبەسىن بەرۋ پيلوتتىق جوباسى ىسكە قوسىلدى.

ەتنيكالىق قازاقتاردىڭ تاريحي وتانىنا ورالۋىنا ارنالعان باعدارلاما قازاقستان بيلىگى ءۇشىن يميدجدىك جانە دەموگرافيالىق بالانس ءۇشىن ماڭىزدى. ونىڭ بىرنەشە سەبەبىن ايتايىق.

بىرىنشىدەن، باعدارلاما ەڭبەككە قابىلەتتى توپقا ءتيىمدى - تاريحي وتانىنا ورالعان ازاماتتاردىڭ 58 پايىزى ەڭبەككە قابىلەتتى جاستا.

ەكىنشىدەن، قونىس اۋدارعانداردىڭ 32,4 پايىزى - بالالار مەن جاس وسپىرىمدەر، ياعني كەلەشەك دەموگرافيالىق ءوسىمدى قامتاماسىز ەتەدى.

ۇشىنشىدەن، قازاقستانداعى حالقى از سولتۇستىك وڭىرلەردە تۇرعىن سانىن ارتتىرۋعا كومەگى زور.

CentralAsia: قازاقستانعا نيدەرلاندىدان ەكى امۋر جولبارىسى جەتكىزىلدى

ورمان شارۋاشىلىعى جانە جانۋارلار دۇنيەسى كوميتەتىنىڭ ءتوراعاسى دانيار تۇرعامبايەۆ ايتۋىنشا، گوللانديالىق ورتالىقپەن جاسالعان مەموراندۋم ءونىمدى جۇمىسقا سەبەپ بولعان. بۇل جايىندا CentralAsia باسىلىمى حابارلادى.

قازاقستان تاراپى نيدەرلاندىدان الدىرعان 2 جولبارىستى جابايى تابيعاتتاعى پوپۋلياتسيانى قالپىنا كەلتىرۋ ماقساتىندا پايدالانباق. قازىر جابايى اڭدار الماتى وبلىسىنداعى «ىلە-بالقاش» مەملەكەتتىك تابيعي رەزەرۆاتىنا جىبەرىلدى.

بوگدانا جانە كۋما ەسىمدى قوس جولبارىستىڭ ەلگە كەلۋى دۇنيەجۇزىلىك جابايى تابيعات قورى (WWF) مەن ب ۇ ۇ- نىڭ دامۋ باعدارلاماسى اياسىندا جۇزەگە اسقان. قونىس اۋدارۋ پروتسەسى ورمان شارۋاشىلىعى جانە جانۋارلار دۇنيەسى كوميتەتى مەن نيدەرلاندى ورتالىعى اراسىنداعى مەموراندۋمعا قول قويۋدان باستالىپ، جولبارىستاردىڭ تۇقىمىن كوبەيتۋ ءۇشىن اقىسىز نەگىزدە اكەلىنگەن.

- «ىلە-بالقاش» رەزەرۆاتىنىڭ ۇدەمەلى دامۋى تابيعاتتى قورعاۋ سالاسىنداعى بولاشاق ەكولوگيالىق باستامالار مەن ماڭىزدى قادامدار ءۇشىن بەرىك نەگىز بولادى، - دەدى ورمان شارۋاشىلىعى جانە جانۋارلار دۇنيەسى كوميتەتىنىڭ ءتوراعاسى دانيار تۇرعامبايەۆ.

الداعى جوسپار - 70 جىل بۇرىن ورتالىق ازيادا جويىلىپ كەتكەن جولبارىس تۇقىمىن قايتا كوبەيتۋ. كەلەر جىلى رەسەي فەدەراتسياسىنان دا جولبارىستار اكەلۋ جوسپارلانعان.

Anadolu: ۇ ق ش ۇ وقۋ-جاتتىعۋىنا دايىندىق جالعاسىپ جاتىر

وقۋ-جاتتىعۋ ۇجىمدىق قاۋىپسىزدىك جۇيەسىن نىعايتۋعا جانە ۇ ق ش ۇ- نىڭ جاۋاپكەرشىلىك ايماعىندا تۇراقتىلىقتى قامتاماسىز ەتۋگە باعىتتالادى. جاڭالىقتى Anadolu اگەنتتىگى ءبولىستى.

الماتى وبلىسىنىڭ «جاعالاۋ» وقۋ پوليگونى بازاسىندا ۇ ق ش ۇ- نىڭ بىتىمگەرلىك كۇشتەرىنىڭ «مىزعىماس باۋىرلاستىق-2024» كوماندالىق-شتابتىق وقۋ-جاتتىعۋىن وتكىزۋ جوسپارلانعان. بۇل تۋرالى ق ر قورعانىس مينيسترلىگىنىڭ باسپا ءسوز قىزمەتى حابارلادى.

- وقۋ-جاتتىعۋ جەتەكشىسى - قازاقستان رەسپۋبليكاسى قارۋلى كۇشتەرى دەسانتتىق-شابۋىلداۋ اسكەرلەرىنىڭ قولباسشىسى گەنەرال- مايور الماز جۇماكەيەۆ. 26-30-قىركۇيەك ارالىعىندا ۇ ق ش ۇ- عا مۇشە ەلدەردەن - بەلارۋس، قىرعىزستان، رەسەي جانە تاجىكستاننان اسكەري قۇرالىمدار كەلەدى. ولاردى قايتا توپتاستىرۋ اسكەري- كولىكتىك اۆياتسيا بورتىمەن جانە اۆتوموبيل كولىگىمەن جۇزەگە اسىرىلادى، - دەلىنگەن رەسمي مالىمەتتە.

ۇ ق ش ۇ- عا مۇشە مەملەكەتتەردىڭ بىتىمگەرلىك كونتينگەنتتەرى - ارنايى دايىندالعان اسكەري، پوليتسيالىق جانە ازاماتتىق پەرسونال، سونداي-اق ولاردىڭ كۇش-قۇرالدارى. ءاربىر بىتىمگەرلىك وپەراتسيادا ۇجىمدىق قاۋىپسىزدىك كەڭەسىنىڭ شەشىمىمەن ورىندالاتىن مىندەتتەردىڭ كولەمىنە جانە شيەلەنىس ايماعىنداعى ناقتى جاعدايعا اسكەريلەر قۇرامى، قۇرىلىمى مەن سانى ايقىندالادى.

- وقۋ-جاتتىعۋ ۇجىمدىق قاۋىپسىزدىك جۇيەسىن نىعايتۋعا جانە ۇ ق ش ۇ- نىڭ جاۋاپكەرشىلىك ايماعىندا تۇراقتىلىقتى قامتاماسىز ەتۋگە باعىتتالعان. بىرلەسكەن مانيەۆر باۋىرلاس ەلدەردەن كەلگەن قاتىسۋشىلارعا ۇيلەسىمدىلىكتى، پراكتيكالىق داعدىنى ارتتىرۋعا جانە دالالىق ماشىقتى نىعايتۋعا مۇمكىندىك بەرەدى. پراكتيكالىق ءىس-قيمىل بارىسىندا داعدارىس ايماعىن شيەلەنىستەن كەيىنگى رەتتەۋ جانە گۋمانيتارلىق كومەك كورسەتۋ جونىندەگى بىتىمگەرلىك وپەراتسياسى پىسىقتالاتىن بولادى، - دەدى الماز جۇماكەيەۆ.

Trend: «قازمۇنايگاز» مەتان شىعىندىسىن ازايتۋ ءۇشىن كانادامەن بايلانىس ورناتپاق

25-قىركۇيەكتە «قازمۇنايگاز» ا ق- نىڭ باسقارما ءتوراعاسى اسحات حاسەنوۆ كانادالىق General Magnetic Canada Inc. (GMCI) كومپانياسىنىڭ باسشىسى الفرەد ديۋررمەن كەزدەستى. كەزدەسۋ بارىسىندا قوس تاراپ تومەن كومىرتەكتى دامىتۋ بويىنشا ىنتىماقتاستىق تۋرالى كەلىسسوز جۇرگىزىپ، مەتان بويىنشا جاھاندىق مىندەتتەمەنى ورىنداۋ ماسەلەسىن تالقىلادى. بۇل جونىندە Trend جازدى.

«قازمۇنايگاز» - OGMP 2.0 سەرىكتەستىگىنە قوسىلعان جانە بۇل باستامانى قولداعان قازاقستانداعى العاشقى ۇلتتىق كومپانيا. الداعى ءۇش جىلدا كومپانيا ءوندىرۋشى كاسىپورىنداردا مەتاننىڭ اعۋ جولىن (LDAR) تۇگەندەپ، شىعارىندىلاردىڭ بازالىق دەڭگەيىن انىقتاۋدى جوسپارلاپ وتىر. قازىرگى ۋاقىتتا مەتان دەڭگەيىن ولشەۋ ءۇشىن Carbon Limits جانە Tetra Tech سەكىلدى سەرىكتەستەرمەن بىرلەسىپ جۇمىس ىستەۋدە.

تاراپتار GMCI كومپانياسىمەن ىنتىماقتاستىق ورناتۋ مەتان شىعارىندىسىن باقىلاۋعا جانە قازاقستاننىڭ ەنەرگەتيكا سەكتورىنىڭ تۇراقتى دامۋىنا ۇلەس قوساتىنىنا سەنىم ءبىلدىردى.