الەمدىك ب ا ق-تاعى قازاقستان: مالايزيامەن ىنتىماقتاستىق، تەننيستەگى جەتىستىك جانە ش ى ۇ قاۋىپسىزدىك كەڭەسى

وسى اپتادا شەتەلدىك باسىلىمدار ەلىمىزگە قاتىستى ءتۇرلى اقپارات تاراتتى. حالىقارالىق باسىلىمدار استانادا وتكەن ش ى ۇ-عا مۇشە مەملەكەتتەردىڭ قاۋىپسىزدىك كەڭەستەرى حاتشىلارىنىڭ كەزدەسۋى، ەلىمىزدىڭ مالايزيامەن تۇراقتى دامۋ جوبالارىن بىرىگىپ جاساۋداعى ىنتىماقتاستىعى جانە قازاقستاندىق تەننيسشىلەردىڭ جەتىستىگىن جازدى. الەمدىك ب ا ق قازاقستان تۋرالى تاعى نە جازدى - تولىعىراق Kazinform ءتىلشىسىنىڭ شولۋىنان وقىڭىز.

Daryo: قازاقستان تۇراقتى دامۋ باستامالارىن جۇزەگە اسىرۋدا مالايزيامەن ىنتىماقتاسادى

تۇراقتى دامۋ باستامالارىن ىلگەرىلەتۋ ءۇشىن قازاقستاننىڭ تۇرعىن ءۇي- كوممۋنالدىق شارۋاشىلىعى ورتالىعى جاقىندا Ecolos كومەگىمەن مالايزيانىڭ Ranhill حالىقارالىق كومپانياسىمەن كەلىسسوزدەر جۇرگىزە باستادى، دەپ حابارلادى وزبەكستاندىق daryo اگەنتتىگى.

باسىلىمنىڭ مالىمەتىنشە، تاراپتار اعىن سۋدى تازارتۋ قوندىرعىلارى جوبالارىنا جانە ينفراقۇرىلىمدى كومىرتەكسىزدەندىرۋگە باعىتتالعان باستامالارعا ەرەكشە نازار اۋدارا وتىرىپ، ىنتىماقتاستىقتىڭ ستراتەگيالىق باعىتتارىن تالقىلادى. تۇرعىن ءۇي-كوممۋنالدىق شارۋاشىلىق قازورتالىعى حالىقارالىق جانە جەكە ينۆەستيسيالاردى تارتۋ ارقىلى اعىن سۋدى تازارتۋ جوبالارىندا Ranhill جانە Ecolos كومپانيالارىنا قولداۋ كورسەتۋگە دايىن.

بۇل جوبانىڭ بۇكىل قازاقستان بويىنشا ەنگىزۋ پەرسپەكتيۆاسىمەن دەكاربونيزاتسيا سالاسىنداعى حالىقارالىق ىنتىماقتاستىقتىڭ ۇلگىسى بولۋ الەۋەتى بار. تاراپتار تۇرعىن ءۇي-كوممۋنالدىق شارۋاشىلىق قازورتالىعى تەحنيكالىق سپەتسيفيكاتسيانى ازىرلەيدى، ال Ranhill كومپانياسى Ecolos كومپانياسىمەن بىرلەسىپ، الدىن الا جوبانى ۇسىنادى دەپ كەلىستى. جوبانى بيۋدجەت قاراجاتىنا سۇيەنبەي، حالىقارالىق جانە جەكە ينۆەستيتسيالاردى تارتۋ ارقىلى جۇزەگە اسىرۋ جوسپارلانعان، - دەپ جازدى daryo.

The Times of Central Asia: قازاقستان تەننيسى: شەتەلدىك تالانتتار جانە بۇقارالىق باعدارلامالار

قازاقستاندىق تەننيسشىلەردىڭ جەتىستىكتەرى تۋرالى The Times of Central Asia جازدى. باسىلىم ەلەنا رىباكينا، ءامىر ومارحانوۆ، اسىلجان ارىستانبەكوۆانىڭ جەتىستىكتەرىنە توقتالدى.

اگەنتتىكتىڭ مالىمەتىنشە، ماسكەۋدە تۋعان قازاقستان ازاماتى ەلەنا رىباكينانىڭ وتكەن دەمالىستا Miami Open تۋرنيرىندە ءساتتى ونەر كورسەتىپ، فينالعا دەيىن جەتتى. قازاقستان تەننيس فەدەراتسياسى بۇل جەتىستىكتى لايىقتى دەڭگەيدە اتاپ وتكەنىمەن، ءبىراق الەمدىك دەڭگەيدە وتاندىق سپورتشىلاردىڭ توپ جارعانىن قالايدى.

تاماشا ەكى اپتا بولدى. كوپتەگەن قيىن ماتچتار، كەرەمەت كەزدەسۋلەر وتكەردىك، - دەپ كەلتىردى باسىلىم 24 جاستاعى رىباكينانىڭ ءسوزىن.

قازاقستاندىق تەننيسشى فينالعا جەتكەنشە بەس كەزدەسۋدە جەڭىسكە جەتىپ، اقتىق سىندا امەريكالىق دانيەل كوللينزدەن جەڭىلىپ قالدى. الەمنىڭ ءتورتىنشى راكەتكاسى رىباكينا 2022 -جىلى ۋيمبلدوننىڭ جەڭىمپازى اتاندى، ال وتكەن جىلى اۆستراليا اشىق چەمپيوناتىندا ەكىنشى ورىن العان بولاتىن.

ەڭ تالانتتى تەننيسشىلەر قاتارىندا ءامىر ومارحانوۆ بار، ول بيىل جاسوسپىرىمدەر اراسىندا اۆستراليا اشىق چەمپيوناتىنىڭ شيرەك فينالىنا شىققان تۇڭعىش قازاقستاندىق ويىنشى بولدى. ايەلدەر اراسىندا بيىل مەلبۋرن قالاسىندا وتكەن جاسوسپىرىمدەر اراسىنداعى جۇپتىق تۋرنيردە اسىلجان ارىستانبەكوۆا شيرەك فينالعا شىقتى، - دەپ جازدى The Times of Central Asia.

Anadolu: قازاقستان پرەزيدەنتى ش ى ۇ زاماناۋي سىن-قاتەرلەر مەن قاۋىپتەرگە قارسى قولداناتىن ءادىس- تاسىلدەرىن كۇشەيتۋى قاجەت دەپ مالىمدەدى

تۇركيانىڭ Anadolu اگەنتتىگى ەلوردادا وتكەن ش ى ۇ-عا مۇشە مەملەكەتتەردىڭ قاۋىپسىزدىك كەڭەستەرى حاتشىلارىنىڭ كەزدەسۋى تۋرالى جازدى. باسىلىمنىڭ مالىمەتىنشە، سارسەنبى كۇنى قازاقستان پرەزيدەنتى شانحاي ىنتىماقتاستىق ۇيىمىنىڭ (ش ى ۇ) زاماناۋي سىن-قاتەرلەر مەن قاۋىپتەرگە قارسى قولداناتىن ءادىس-تاسىلدەرىن كۇشەيتۋى قاجەت ەكەنىن ايتتى.

مەملەكەتتەرىمىزدىڭ شىرقىن بۇزاتىن تەرروريزم، ەكسترەميزم جانە سەپاراتيزم ارەكەتتەرىنىڭ بەلەڭ الۋىنا جول بەرۋگە بولمايدى، - دەپ كەلتىردى تۇركيالىق اگەنتتىك قاسىم-جومارت توقايەۆتىڭ ءسوزىن.

Anadolu توقايەۆ قازاقستاننىڭ ۇسىنىسى بويىنشا ش ى ۇ قىزمەتىن جەتىلدىرۋ ۇدەرىسى باستالعانىن ايتا كەلە، ايماقتىق جانە حالىقارالىق قاۋىپسىزدىكتىڭ ءتيىمدى قۇرالى رەتىندە ۇيىمنىڭ الەۋەتىن ىسكە اسىرۋ قاجەتتىگىن اتاپ وتكەنىن جازدى.

The Times of Central Asia: قازاقستان پرەزيدەنتى ايماقتىق قاۋىپ-قاتەرلەرگە توقتالدى

قازاقستان پرەزيدەنتى قاسىم-جومارت توقايەۆ ش ى ۇ-عا مۇشە ەلدەر: قىتاي، رەسەي، ءۇندىستان، قىرعىزستان، تاجىكستان، پاكىستان، يران، وزبەكستان جانە قازاقستاننىڭ قاۋىپسىزدىك كەڭەستەرىنىڭ حاتشىلارىمەن كەزدەسۋى تۋرالى The Times of Central Asia دا جازدى.

باسىلىم بۇعان دەيىنگى اگەنتتىكتىڭ مالىمەتىمەن قوسا، قازاقستان پرەزيدەنتىنىڭ 2025-2027 -جىلدارعا ارنالعان تەرروريزمگە، سەپاراتيزمگە جانە ەكسترەميزمگە قارسى ءىس-قيمىل جونىندەگى ش ى ۇ ىنتىماقتاستىق باعدارلاماسىن ازىرلەۋ، سونداي-اق ش ى ۇ-نىڭ 2024-2029 -جىلدارعا ارنالعان ەسىرتكىگە قارسى ستراتەگياسىن قابىلداۋ قاجەتتىگىن ايتقانىن حابارلادى.

...ترانسۇلتتىق ۇيىمداسقان قىلمىسقا، زاڭسىز ەسىرتكى اينالىمىنا جانە كيبەرقاۋىپسىزدىك سىن- قاتەرلەرىنە قارسى كۇرەس قازاقستاننىڭ ش ى ۇ-عا ءتوراعالىق ەتۋ كەزەڭىندەگى ەڭ باستى باسىمدىقتاردىڭ ءبىرى سانالادى، - دەپ جازدى The Times of Central Asia توقايەۆتىڭ بايانداماسىنا سىلتەمە جاساي وتىرىپ.

اۆتور

راحيلا تلەۋوۆا