الەمدىك ب ا ق- تاعى قازاقستان: جاڭا «التىن ادام» ، نيقابقا تىيىم جانە پارومدىق رەيستەر

استانا. KAZINFORM- اپتا ىشىندە جاھانداعى اقپارات تاراتۋشى ينتەرنەت-باسىلىمدار قازاقستانداعى وقيعالاردى قاپى جىبەرمەدى. ونىڭ ىشىندە قوعامدىق ورىندا نيقاب كيۋدى شەكتەيتىن زاڭ جوباسى، شەكارا ماڭىنداعى ءورت قاۋىپسىزدىگى تۇرعىسىندا قىتايمەن كەلىسىم قاۋزالعان.

ازەربايجان مەن قازاقستان اراسىندا تۇراقتى پارومدىق رەيستەر اشىلاتىنى جانە الماتى وبلىسىندا ساق داۋىرىنە جاتاتىن التىن جۇزىك ەرەكشە نازارعا تۇسكەن. تولىعىراق kazinform ءتىلشىسىنىڭ شولۋىنان وقىڭىز.

anadolu:قازاقستاندا بەت جاباتىن كيىمگە تىيىم سالىنادى

قازاقستان پارلامەنتى ءماجىلىسى قوعامدىق ورىندا ادامنىڭ بەت-الپەتىن تولىق جاباتىن كيىم-كەشەك كيۋگە تىيىم سالاتىن زاڭ جوباسىن ماقۇلدادى. ەندى قۇجات پرەزيدەنتكە قول قويۋعا جىبەرىلگەن. بۇل جونىندە Anadolu اگەنتتىگى جازدى.

ىشكى ىستەر مينيسترلىگى ازىرلەگەن قاۋىپسىزدىككە قاتىستى زاڭ جوباسىنىڭ ءبىر بولىگىنە قۇقىقتىق نورما ەنگىزىلەتىنىن ايتقان ەدى. قۇجاتتا قوعامدىق ورىندا نيكاب سەكىلدى ادامنىڭ بەت- ءجۇزىن تۇتاس جاباتىن كيىمدەرگە تىيىم سالۋ قاراستىرىلعان. دەگەنمەن، شەكتەۋدىڭ ءبىرقاتار ەرەكشەلىگى بار. اتاپ ايتقاندا، زاڭ تالاپتارىن ورىنداۋ ءۇشىن، مەديتسينالىق ماقساتتا، توتەنشە جاعدايلار كەزىندە، اۋا رايى قولايسىز بولعاندا نەمەسە سپورتتىق جانە مادەني شارالارعا قاتىسقان كەزدە بەت-ءجۇزدى جاباتىن كيىم كيۋگە رۇقسات ەتىلەدى.

مۇنداي شەكتەۋ ورتالىق ازيادا بۇرىننان بار. 2023-جىلى وزبەكستاندا اتالعان شەكتەۋمەن مازمۇنداس تالاپ زاڭ اياسىندا قابىلداندى. وتكەن جىلى تاجىكستاندا ۇلتتىق مادەنيەتكە جات دەپ تانىلعان كيىمدەردى كيۋ مەن ساتۋعا زاڭ جۇزىندە شەكتەۋ قويىلدى. ال بيىل قىرعىزستان ادامنىڭ بەت-الپەتىن انىقتاۋعا مۇمكىندىك بەرمەيتىن كيىم كيۋگە تىيىم سالعان بولاتىن.

Trend: «قۇرىق-اليات-قۇرىق» باعىتىندا تۇراقتى پارومدىق رەيس ىسكە قوسىلادى

قازاقستاندا العاش رەت «قۇرىق-اليات-قۇرىق» باعىتىندا تۇراقتى پارومدىق رەيس ىسكە قوسىلماق. بۇل جاڭالىق ماڭعىستاۋ وبلىسىنىڭ اكىمى نۇرداۋلەت قيلىباي مەن «Georgian Industrial Group» كومپانياسى ديرەكتورلار كەڭەسىنىڭ ءتوراعاسى داۆيد بەجۋاشۆيلي كەزدەسۋىنەن بەلگىلى بولدى. قوس تاراپتىڭ اقپاراتىن Trend باسىلىمى جەتكىزدى.

باسقوسۋدا كاسپيي تەڭىزىندەگى پارومدىق تاسىمالدى دامىتۋعا باعىتتالعان ينۆەستيتسيالىق جوبا تالقىلانعان. ينۆەستور كاسپيي تەڭىزى ارقىلى تۇراقتى جۇك تاسىمالىن قامتاماسىز ەتۋ ماقساتىندا ارنايى كەمەلەر ساتىپ العان. بيىل قىركۇيەكتەن باستاپ بۇل كەمەلەر قازاقستاندىق MSC Middle Corridor Maritime كومپانياسىنىڭ باسقارۋىنا ءوتىپ، قازاقستان العاش رەت «قۇرىق- اليات-قۇرىق» باعىتىندا تۇراقتى رەيستەردى جۇزەگە اسىرۋدى كوزدەپ وتىر. مارشرۋت ايىنا 8- 9 رەت قاتىنايدى دەگەن جوسپار بار. ءبىر كەمە ءبىر ۋاقىتتا 54 فۋرانى تاسىمالداي الادى.

2027-جىلعا دەيىن كومپانياعا جىل سايىن ەكى كەمە، ءتورت پاروم قوسىلماق. باسقا دا پاروم وپەراتورلارىمەن ىنتىماقتاستىقتى كەڭەيتۋ بويىنشا كەلىسسوزدەر جۇرگىزىلۋدە..

كەزدەسۋ بارىسىندا وبلىس اكىمى جوبانىڭ وڭىرلىك لوگيستيكانى دامىتۋعا زور سەرپىن بەرەتىنىن اتاعان. سونىمەن قاتار تاراپتار ينۆەستيتسيالىق ىنتىماقتاستىقتى، ونىڭ ىشىندە ونەركاسىپتىك ينفراقۇرىلىمدى دامىتۋ، اگروونەركاسىپ سالالارىنداعى سەرىكتەستىك ماسەلەسىن تالقىلاعان. داۆيد بەجۋاشۆيلي ماڭعىستاۋ وڭىرىندە ءبىرقاتار جوبانى جۇزەگە اسىرۋعا نيەتتى ەكەنىن جەتكىزدى.

سينحۋا: قازاقستان مەن قىتاي شەكارا ماڭىنداعى ورمان ورتىمەن كۇرەستى كۇشەيتەدى

قازاقستانمەن شەكارالاس شىڭجاڭ-ۇيعىر اۆتونوميالىق ولكەسىنىڭ ىلە-قازاق اۆتونوميالىق وكرۋگىندە دالا ءورتىنىڭ تۇتانۋ ىقتيمالدىعى جوعارى. اتالعان ايماققا شىڭجاڭ ورمان ءورت ءسوندىرۋ باس كومانداسىنىڭ جاساعى جاۋاپتى. ولار قازاقستان-قىتاي اراسىنداعى 800 شاقىرىم شەكارا سىزىعى بويىندا ءورت قاۋىپسىزدىگىن قاداعالاپ وتىر. مالىمەتتى قىتايلىقسينحۋا تاراتتى.

شەكارا ماڭىنداعى ءورت سوڭعى رەت ءۇش جىل بۇرىن بولعان. سول كەزدە وقيعا ورنىنا 130 دان استام مامان، 30 دان استام كولىك، 800 ءورت ءسوندىرۋ جابدىعى مەن كوممۋنيكاتسيا قۇرىلعىسى قولدانىلعان. ناتيجەسىندە، ءورت 4 كۇن ىشىندە ءسوندىرىلدى.

بيىل ماۋسىم ايىندا ىلە ءورت ءسوندىرۋ جاساعى مەن قازاقستان ءورت سوندىرۋشىلەرىنىڭ وكىلدەرى بىرلەسكەن وقۋ-جاتتىعۋعا قاتىستى. ونىڭ شەڭبەرىندە ءورت ءسوندىرۋ جانە قۇتقارۋ بارىسىندا تۋىندايتىن ماسەلەلەر پىسىقتالىپ، الداعى جوسپار ناقتىلانعان.

«ەگەر قىتاي مەن قازاقستان شەكاراسىندا ءورت شىقسا، ءبىزدىڭ تاراپ باستاماشى بولىپ، قۇتقارۋ وپەراتسياسىنا بەلسەنە قاتىسۋى ءتيىس. قاجەت بولعان جاعدايدا قازاقستاندىق تاراپتىڭ ءوتىنىشى بويىنشا ترانسشەكارالىق ءورت ءسوندىرۋ وپەراتسياسىن جۇزەگە اسىرۋعا بولادى»، - دەلىنگەن ىلە ءورت ءسوندىرۋ جاساعىنىڭ اقپاراتىندا.

تاسس: تاعى ءبىر «التىن ادام» تابىلۋى مۇمكىن

ءال-فارابي اتىنداعى قاز ۇ ۋ- دىڭ ارحەولوگيالىق ەكسپەديتسياسى ساق داۋىرىنە جاتاتىن التىن اشەكەيلەردى تاپتى. قازبا جۇمىستارى تاريح فاكۋلتەتىنىڭ دەكانى، پروفەسسور دوسبول بايعوناقوۆتىڭ جەتەكشىلىگىمەن الماتى وبلىسىنىڭ ۇيعىر اۋدانىندا جۇرگىزىلگەن. بۇل تۋرالى رەسەيلىك تاسس اقپارات اگەنتتىگى حابارلادى.

توعىزبۇلاق-1 قورعانىنان تابىلعان ساق داۋىرىنە جاتاتىن التىن اشەكەيلەر 1969-جىلى ەسىك قالاسىنىڭ ماڭىنان تابىلعان ايگىلى «التىن ادامنىڭ» اشەكەيلەرىنە ۇقساس. سوندىقتان عالىمدار كەزەكتى «التىن ادام» تابىلۋى مۇمكىن دەگەن تۇجىرىمدا.

قارادالا وڭىرىندە وسىنداي شامامەن 50 ساق قورعانى ورنالاسقان. ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى ەكى اي ىشىندە سولاردىڭ التاۋىن زەرتتەدى. ولاردىڭ ايتۋىنشا، قورىمدار سول زاماننىڭ بيلىك وكىلدەرىنە تيەسىلى.

«بۇل جەردە دە «التىن ادام» جەرلەنگەن بولۋى مۇمكىن دەگەن بولجام بار. الايدا كوپتەگەن قورعان ەرتە زاماندا-اق تونالىپ كەتكەن. سوعان قاراماستان، بۇلار - سول ءداۋىردىڭ بيلەۋشى توپتارىنىڭ قورىمدارى. قورعاندار ەليتالىق ساناتقا جاتادى. الدىن- الا باعالاۋ بويىنشا تابىلعان التىن بۇيىمدار ب. ز. د. IV- III عاسىرلارعا جاتادى»، - دەدى ەكسپەديتسيا جەتەكشىسى دوسبول بايقوناقوۆ.

توعىزبۇلاق اۋىلىنىڭ ماڭىندا ەرتە تەمىر داۋىرىنە جاتاتىن قورعاندار زەرتتەلگەن. ماماندار اۋىلدىڭ وڭتۇستىك بولىگىندە ورنالاسقان جانە 20 دان استام قورعاننان تۇراتىن توعىزبۇلاق-1 جانە توعىزبۇلاق-2 قورىمدارىندا دالالىق زەرتتەۋلەر جۇرگىزگەن. ارحەولوگيالىق نىسانداردىڭ نەگىزگى بولىگى تىزبەكتەلە ورنالاسقان، سولتۇستىكتەن وڭتۇستىككە باعىتتالعان ەليتالىق قورعاندارعا جاتادى. توعىزبۇلاق-2 قورىمى اۋىلدىڭ سولتۇستىگىندە ورنالاسقان، جالپى سانى 30 دان اساتىن ءتۇرلى قورعانداردان تۇرادى.

3-قورعاننىڭ ۇيىندىسىنەن ادامنىڭ سۇيەك قالدىقتارى، التىن پلاستينالار تابىلدى. ولاردىڭ اراسىندا ارىستاننىڭ سۋرەتى سالىنعان التىن جۇزىك ەرەكشەلەنەدى. مۇنداي ارتەفاكتىلەر سيرەك كەزدەسەدى.

«سالماعى 8 گرامعا جۋىق جۇزىك التىن قۇيماسىنان جاسالعان. جۇزىكتەگى ارىستاننىڭ بەينەسى سينكرەتيزممەن تىعىز بايلانىستى. ءبىر قاراعاندا ايەلدىڭ ءجۇزىن، ارىستاننىڭ تۇمسىعى مەن جالىن، ءتىپتى بۇقانى، قوشقاردى كورۋگە بولادى، ولاردىڭ تاڭباسى ەجەلگى تايپالاردا كەڭ تاراعان»، - دەلىنگەن حابارلامادا.