الەمدىك ب ا ق- تاعى قازاقستان: شەتەلدىك ينۆەستيتسيا، جۇك تاسىمالى جانە ليۋكسەمبۋرگپەن بايلانىس

قازان ورتاسىندا قازاقستان جايلى اقپاراتتار الەمدەگى ءتۇرلى باسىلىمداردا ءجيى ۇشىراستى. قازاقستان پرەزيدەنتى قاسىم-جومارت توقايەۆتىڭ شەتەلدىك ينۆەستيتسيالار جونىندە ايتقانى، وزگە ەلدەرگە جۇك تاسىمالىنىڭ ارتقانى، ليۋكسەمبۋرگپەن جۇرگىزىلگەن جاڭا كەلىسىمدەر مەن رەسپۋبليكا اۋماعىنداعى ەڭ ۇزىن كوپىردىڭ قۇرىلىسى ءسوز بولىپتى.

تولىعىراق Kazinform ءتىلشىسىنىڭ شولۋىنان وقي الاسىز.

Daryo: قازاقستان 400 ميلليارد دوللار تىكەلەي شەتەلدىك ينۆەستيتسيا تارتتى

قازاقستان پرەزيدەنتى قاسىم-جومارت توقايەۆ استانادا وتكەن فورۋمدا ەلدىڭ گۇلدەنۋى جانە قوعامنىڭ دەموكراتيالىق ۇمتىلىستارى بويىنشا جۇرگىزىلىپ جاتقان ساياسي رەفورمالار تۋرالى ايتا كەلىپ، مەملەكەت 400 ميلليارد دوللار شەتەلدىك ينۆەستيتسيا تارتقانىن تىلگە تيەك ەتتى. بۇل جاڭالىقتى وزبەكستاندىق Daryo باسىلىمى ءبولىستى.

اۋەلى توقايەۆ اەس قۇرىلىسى بويىنشا جاقىندا وتكەن رەفەرەندۋم قازاقستاننىڭ دەموكراتيالىق قۇندىلىقتارعا ادالدىعىن كورسەتكەنىن اتاپ ءوتتى. ول سونداي-اق رەفورمالار ىشكى تۇراقتىلىقتى دا، ەكونوميكالىق ءوسىمدى دە قامتاماسىز ەتەتىنىن العا تارتقان.

وسى ورايدا قازاقستان تىكەلەي شەتەلدىك ينۆەستيتسيا رەتىندە 400 ميلليارد دوللار تارتقانى جانە 2029-جىلعا قاراي ينۆەستيتسيالىق كەڭەستىڭ باسشىلىعىمەن جاڭا ينۆەستيتسيالىق تسيكلدى ىسكە قوسۋ ارقىلى قوسىمشا 150 ميلليارد دوللار تارتۋدى جوسپارلاپ وتىرعانى ايتىلدى.

- ءبىز ينۆەستورلارعا كەشەندى مەملەكەتتىك قولداۋ كورسەتۋدىڭ جانە جەدەل شەشىم قابىلداۋدىڭ ماڭىزدىلىعىن جاقسى تۇسىنەمىز، - دەپ مالىمدەگەن مەملەكەت باسشىسى.

بۇعان دەيىن قازاقستان پرەزيدەنتى قاسىم- جومارت توقايەۆ ەلدىڭ وڭىرلىك ساياساتقا جانە ورتالىق ازياداعى كورشىلەرىمەن ىنتىماقتاستىقتى نىعايتۋعا بەيىلدىگىن راستاعان. ول ءوزارا ءىس-قيمىلدى كەڭەيتۋ ءوڭىردىڭ بارلىق ەلدەرى ءۇشىن پايدالى ەكەنىن اتاپ ءوتىپ، مەملەكەت باسشىلارى ىنتىماقتاستىعىنىڭ اياسىندا كەيىنگى 10 جىلدا ورتالىق ازيادا ەلەۋلى وزگەرىستەر بولعانىن ارقاۋ ەتتى.

Trend: جۇك تاسىمالداۋعا وتىنىمدەر 3,5 ەسە ءوستى

2024-جىلدىڭ ءۇشىنشى توقسانىندا ATI. SU حالىقارالىق بيرجاسىنىڭ پلاتفورماسىندا قازاقستاننان باسقا ەلدەرگە جۇك تاسىمالداۋعا تۇسكەن وتىنىمدەر سانى 3,5 ەسەدەن استام وسكەن. بۇنى Trend جاريا ەتتى.

- 2024-جىلدىڭ ءۇشىنشى توقسانىندا ATI. SU پلاتفورماسىندا قازاقستاننان باسقا ەلدەرگە جۇك تاسىمالداۋعا وتىنىمدەر سانى 262 پايىزعا ءوستى. مۇنداي سەرپىندى ەكى نەگىزگى ەكسپورتتىق باعىت - رەسەي مەن بەلارۋس. ماسەلەن، رەسەيگە تاسىمالداۋعا وتىنىمدەر سانى ءبىر جىلدا 263 پايىزعا جانە ەكىنشى توقسانمەن سالىستىرعاندا 218 پايىزعا ارتتى. بەلارۋسقا جۇكتەردى جەتكىزۋگە سۇرانىس ءبىر جىل ىشىندە 641 پايىزعا جەتكەن، - دەلىنگەن حابارلامادا.

ATI. SU- دىڭ قازاقستاندىق وكىلدىگىنىڭ ديرەكتورى رەناتا زوبوۆانىڭ ايتۋىنشا، مۇنداي ءوسىمنىڭ ەكى نەگىزگى سەبەبى بار. بىرىنشىدەن، ەكى ەلدىڭ تەمىر جولدارىنداعى قۋاتتىلىقتىڭ تاپشىلىعىنان قازاقستان مەن رەسەي اراسىندا تەمىر جولمەن جۇك تاسىمالداۋ كولەمى تومەندەدى. سەبەبى قازاقستاندا ترانسكاسپي حالىقارالىق كولىك باعىتى بويىنشا تەمىر جول تاسىمالى كولەمى وسكەن. ءبىرىنشى جارتىجىلدىقتا قازاقستان، رەسەي جانە بەلارۋس ارقىلى وتەتىن ەۋرازيالىق تەمىر جول باعىتىنداعى ترانزيتتىك جۇك اعىنى وتكەن جىلعا قاراعاندا 66 پايىزعا ارتتى. وسىنىڭ ءبارى قازاقستاندىق جەتكىزۋشىلەردى رەسەي مەن بەلارۋسقا جۇك جەتكىزۋ ءۇشىن اۆتوموبيلدى بەلسەندى پايدالانۋعا ماجبۇرلەدى. ەكىنشىدەن، اتالعان ءۇش ەلدە دە سيفرلىق لوگيستيكالىق سەرۆيستەر بەلسەندى دامۋدا.

قالعان ەكسپورتتىق باعىتتار بويىنشا سۇرانىس 2024-جىلدىڭ سوڭىنا دەيىن تۇراقتى بولماق.

Anadolu: قازاقستان مەن ليۋكسەمبۋرگ ەكونوميكالىق بايلانىستاردى جاقسارتۋعا نيەتتى

قازاقستان پرەمەر-ءمينيسترىنىڭ ورىنباسارى، سىرتقى ىستەر ءمينيسترى مۇرات نۇرتىلەۋ ليۋكسەمبۋرگكە رەسمي ساپارمەن باردى. اقپاراتتى Anadolu اگەنتتىگى تاراتتى.

ساپار بارىسىندا قازاقستاندىق سىرتقى ساياسات ۆەدومستۆوسىنىڭ باسشىسى ليۋكسەمبۋرگ پرەمەر-ءمينيسترى ليۋك فريدەنمەن جانە ليۋكسەمبۋرگ پرەمەر-ءمينيسترىنىڭ ورىنباسارى، سىرتقى ىستەر جانە سىرتقى ساۋدا ءمينيسترى كساۆە بەتتەلمەن كەزدەسۋلەر وتكىزدى.

تاراپتار ەكىجاقتى ىنتىماقتاستىقتىڭ نەگىزگى ماسەلەلەرىن، سونداي-اق قارجى تەحنولوگيالارى، «جاسىل» ەنەرگەتيكا، فارماتسيەۆتيكا جانە كولىكتىك ينفراقۇرىلىمدىق جوبالار ارقىلى تۇراقتى دامۋ باعىتتارىن تالقىلادى. ەكى ەلدىڭ بيزنەس-قوعامداستىعى ءۇشىن ەكونوميكالىق بايلانىستاردى تەرەڭدەتۋ جانە مۇمكىندىكتەردى كەڭەيتۋ قاجەتتىگى دە ايتىلعان.

پرەمەر-مينيستر ليۋك فريدەن «ليۋكسەمبۋرگ قازاقستاندى ىسكەرلىك ىنتىماقتاستىقتىڭ ەلەۋلى الەۋەتىن ەسكەرە وتىرىپ، ورتالىق ازياداعى سەنىمدى سەرىكتەس رەتىندە قاراستىراتىنىن» اتاپ ءوتىپ، سونداي-اق ەكونوميكانىڭ نەگىزگى سەكتورلارىن جاڭعىرتۋعا، وزىق تەحنولوگيالاردى ەنگىزۋدە قازاقستاندىق تاراپتى قولداۋعا دايىن ەكەنىن ءبىلدىردى.

ءوز كەزەگىندە قازاقستاننىڭ سىرتقى ىستەر ءمينيسترى ليۋكسەمبۋرگ قازاقستاننىڭ ەۋروپالىق وداقتاعى ماڭىزدى سەرىكتەسى بولىپ سانالاتىنىن جەتكىزگەن.

تاراپتار ساۋدا-ەكونوميكالىق بايلانىستاردى جاقسارتىپ، سونداي-اق ورتالىق ازياداعى قاۋىپسىزدىك پەن تۇراقتىلىق ماسەلەلەرىندەگى ىنتىماقتاستىققا نازار اۋدارىپ، قازاقستان مەن ەۋروپالىق وداقتىڭ ءوزارا ءىس-قيمىلىنا زەر سالعان. سونىمەن قاتار، حالىقارالىق كۇن تارتىبىندەگى وزەكتى ماسەلەلەر جونىندە پىكىر الماسقان.

ليۋكسەمبۋرگتىڭ سىرتقى ىستەر ءمينيسترى بەتتەل ءوز ەلىنىڭ استانانىڭ وڭىرلىك قاۋىپسىزدىكتى نىعايتۋداعى كۇش- جىگەرىن جوعارى باعالايتىنىن اتاپ ءوتتى. ليۋكسەمبۋرگتىڭ قازاقستانمەن حالىقارالىق قاۋىپسىزدىك جانە ورنىقتى دامۋ ماسەلەلەرى بويىنشا ىنتىماقتاستىقتى كەڭەيتۋگە دايىندىعى تۋرالى حابارلاندى.

كەزدەسۋ سوڭىندا تاراپتار نەگىزگى وڭىرلىك جانە جاھاندىق سىن-قاتەرلەردى شەشۋ ءۇشىن بارلىق دەڭگەيدەگى ەكىجاقتى قارىم-قاتىناستاردى نىعايتۋعا جانە حالىقارالىق ۇيىمدار شەڭبەرىندە بەلسەندى ءوزارا ءىس-قيمىل جاساۋعا نيەت تانىتتى.

جالپى، 2005-جىلدان باستاپ ليۋكسەمبۋرگتەن قازاقستان ەكونوميكاسىنا تىكەلەي ينۆەستيتسيالار كولەمى 2,9 ميلليارد دوللاردى قۇرادى.

CentralAsia: قازاقستاننىڭ ەڭ ۇزىن كوپىرىنىڭ بەرىكتىگىن 15 اۋىر جۇك كولىگى سىنادى

شىعىس قازاقستان وبلىسىندا ۇزىندىعى 1316 مەترلىك بۇقتىرما سۋ قويماسى ارقىلى وتەتىن ەكى جولاقتى كوپىر سىناقتان ءساتتى ءوتتى. جاڭالىقتى قازاقستاننىڭ كولىك مينيسترلىگىنە سىلتەمە جاساي وتىرىپ، CentralAsia ءبولىستى.

بۇل - ازىرگە قازاقستانداعى ەڭ ۇزىن كوپىر سانالادى. مىقتىلىعىن تەكسەرۋ ءۇشىن جالپى سالماعى 450 توننا جۇك تيەلگەن 15 ساموسۆال پايدالانىلعان. ارنايى داتچيكتەر كوپىردىڭ قاۋىپسىزدىك-نورماتيۆتىك تالاپتارعا سايكەستىگىن راستاپ، دەفورماتسيا، ءدىرىل جانە جۇكتەمەنى ءبولۋ كورسەتكىشتەرىن تىركەپتى.

كوپىر وبلىستىڭ جارما، قاتونقاراعاي، كۇرشىم، كوكپەكتى، زايسان جانە التاي اۋداندارىنىڭ اراسىن جالعايدى. وسىلايشا، وڭىرلەر اراسىندا بايلانىس جاقسارىپ، ۇزدىكسىز كولىك قوزعالىسىن قامتاماسىز ەتپەك.