الەمدىك ب ا ق-تا: توقايەۆتىڭ ماقالاسى، قازاقستان «قارا تىزىمنەن» شىقتى

مامىردىڭ سوڭعى اپتاسىندا حالىقارالىق باسىلىمدار ەلىمىز تۋرالى كوپ ماتەريال تاراتتى. اسىرەسە، الەم نازارى مەملەكەت باسشىسى قاسىم-جومارت توقايەۆتىڭ Euronews-تا جاريالانعان ماقالاسىن جارىسا ءبولىستى. بۇدان بولەك وسى اپتادا ەۋروپالىق كوميسسيا قازاقستاننان ە و ەلدەرىنە ۇشۋعا قويىلعان بارلىق شەكتەۋدى الىپ تاستاعانى، سونداي-اق ەلىمىزدە وڭدەۋ ونەركاسىبىن اۆتوماتتاندىرۋ جولدارى قاراستىرىلعانىن حابارلادى.

وسى تۋرالى تولىعىراق جانە بۇدان باسقا ەڭ ماڭىزدى ماقالالارعا Kazinform ءتىلشىسى شولۋ جاسادى.

Euronews: ورتا دەرجاۆالار كوپجاقتى كوزقاراس يدەياسىنا بەرىك

وسى اپتادا Euronews قازاقستان پرەزيدەنتى قاسىم-جومارت توقايەۆتىڭ ورتا دەرجاۆالاردىڭ ءرولى تۋرالى ماقالاسىن جاريالادى. حالىقارالىق باسىلىم مەملەكەت باسشىسىنىڭ ماقالاسىن تولىق ۇسىنعان.

قازاقستان سياقتى ەلدەر جاڭا كۇشپەن العا شىعىپ، قاتىسۋشى رەتىندە عانا ەمەس، سونىمەن قاتار جاھاندىق ارەناداعى جاۋاپتى ويىنشى رەتىندەگى ءوز ءرولىن كورسەتە ءبىلۋى كەرەك. توتەنشە گەوساياسي تۋربۋلەنتتىلىك پەن تۇراقتى قاقتىعىستارعا تولى بۇگىنگى الەمدە كوپجاقتى شەشىمدەر وتە ماڭىزدى. ەۋروپا، تاياۋ شىعىس جانە افريكاداعى سوعىستار جۇزدەگەن مىڭ ادامنىڭ ءومىرىن قيىپ، كليماتتىڭ وزگەرۋى ميلليونداعان ادامدى اش، جالاڭاش جانە باسپاناسىز قالدىرىپ جاتىر. بۇل قاقتىعىستار شەشىلمەيتىندەي بولىپ كورىنەدى، - دەپ ءبولىستى Euronews.

Anadolu Agency: قازاقستان سياقتى ەلدەر جاھاندىق ارەنادا جاۋاپتى ويىنشى رەتىندە ءرولىن كورسەتۋى ءتيىس - توقايەۆ

پرەزيدەنتتىڭ ماقالاسى Euronews-تە جاريالانعانى تۋرالى Anadolu Agency دە حابارلادى.

اگەنتتىكتىڭ مالىمەتىنشە، توقايەۆ ەۋروپاداعى، تاياۋ شىعىستاعى جانە افريكاداعى سوعىستار جۇزدەگەن مىڭ ادامنىڭ ءومىرىن قياتىنىن، ال كليماتتىڭ وزگەرۋى ميلليونداعان ادامداردى اش، جالاڭاش جانە باسپاناسىز قالدىراتىنىن اتاپ ءوتتى.

بۇل قاقتىعىستار شەشىلمەيتىندەي بولىپ كورىنەدى. وسى جاھاندىق الاۋىزدىق اياسىندا ءداستۇرلى دەرجاۆالار - الەمنىڭ ەكونوميكالىق جانە ساياسي الپاۋىتتارىنىڭ بىرىگىپ جۇمىس ىستەۋ مۇمكىندىگى ازايىپ بارادى، - دەپ قازاقستان پرەزيدەنتىنىڭ ماقالاسىنان ءۇزىندى كەلتىردى باسىلىم.

The Times of Central Asia: قازاقستان مەن ە و اۋىل شارۋاشىلىعى ونىمدەرىنىڭ ساۋداسىن ۇلعايتۋعا ۇمتىلۋدا

2023 -جىلى قازاقستان ە و ەلدەرىنە 650 مىڭ توننا بيداي، سونداي-اق زىعىر، راپس تۇقىمدارى مەن وڭدەلگەن ءداندى داقىلداردى ەكسپورتتادى. بۇل تۋرالى The Times of Central Asia قازاقستاننىڭ اۋىل شارۋاشىلىعى ءمينيسترى ايداربەك ساپاروۆ پەن ەۋروپالىق وداقتىڭ اۋىل شارۋاشىلىعى جونىندەگى كوميسسارى يانۋش ۆويتسەحوۆسكيدىڭ كەلىسسوزىنە سىلتەمە جاساپ حابارلادى.

قازاقستاندىق وندىرۋشىلەردىڭ ە و-عا مال شارۋاشىلىعى ونىمدەرىن ەكسپورتتاۋعا ءالى ليتسەنزياسى بولماسا دا، قازاقستاندىق بالىق ەۋروپاداعى ساتىپ الۋشىلار اراسىندا ۇلكەن سۇرانىسقا يە. قازاقستاننىڭ 70 بالىق وڭدەۋ كاسىپورنىنىڭ 18 ى ءوز ونىمدەرىن ەۋرووداق ەلدەرىنە ەكسپورتتاۋ قۇقىعىنا يە بولدى. 2023 -جىلى قازاقستاننىڭ بالىق ونىمدەرىنىڭ ەكسپورتى قۇنى 85 ميلليون دوللار بولاتىن 25 مىڭ توننانى قۇرادى. شامامەن 11 مىڭ توننا ە و ەلدەرىنە، سونىڭ ىشىندە گەرمانيا، نيدەرلاند، دانيا جانە ليتۆاعا جالپى سوماسى 60 ميلليون دوللارعا ەكسپورتتالدى، - دەپ جازدى باسىلىم.

Centralasia.news: قازاقستاندا وڭدەۋ ونەركاسىبىن اۆتوماتتاندىرۋ ماسەلەسى تالقىلاندى

قازاقستان ۇكىمەتى رەسپۋبليكانىڭ وڭدەۋ ونەركاسىبىن دامىتۋ ماسەلەلەرىن تالقىلادى. وسى سەكتورداعى ءوندىرىس كولەمى اعىمداعى جىلدىڭ قاڭتار-ءساۋىر ايلارىندا 5,2 پايىزعا ۇلعايىپ، 7,1 تريلليون تەڭگەگە جەتتى جانە 5,6 ميلليارد دوللار بولاتىن وڭدەۋ ونەركاسىبى تاۋارلارى ەكسپورتتالدى. نەگىزگى كاپيتالعا سالىنعان ينۆەستيتسيالار 403,2 ميلليون تەڭگەنى قۇراپ، 19,9 پايىزعا ءوستى، دەپ جازادى Centralasia.news پرەمەر-ءمينيستردىڭ باسپا ءسوز قىزمەتىنە سىلتەمە جاساپ.

باسىلىمنىڭ مالىمەتىنشە، ەڭ ۇلكەن ۇلەستى مەتاللۋرگيا ونەركاسىبى، ماشينا جاساۋ جانە ازىق-تۇلىك ءوندىرىسى الادى. پرەمەر-مينيستر وڭدەۋ سەكتورى كەز كەلگەن مەملەكەتتىڭ ونەركاسىبىن تابىستى دامىتۋدىڭ نەگىزى ەكەنىن، سوندىقتان ەل ەكونوميكاسىنىڭ قۇرىلىمىنداعى وڭدەۋ ۇلەسىن ۇلعايتۋ قاجەتتىگىن اتاپ وتكەن.

Trend: ەۋروپالىق كوميسسيا قازاقستاننان ە و ەلدەرىنە ۇشۋعا قويىلعان بارلىق شەكتەۋدى الىپ تاستادى

مۇنداي شەشىم ەۋروپالىق وداقتىڭ (ە و) 27 ەلىنىڭ اۆياتسيالىق بيلىك وكىلدەرىنىڭ قاتىسۋىمەن ەۋروپالىق كوميسسيانىڭ ۇشۋ قاۋىپسىزدىگى كوميتەتى وتىرىسىنىڭ قورىتىندىسى بويىنشا قابىلدانعان. بۇل تۋرالى ازەربايجاندىق Trend اگەنتتىگى ق ر كولىك مينيسترلىگىنە سىلتەمە جاساپ حابارلادى.

كوميتەت وتىرىسىندا كولىك ۆيتسە-ءمينيسترى تالعات لاستايەۆ باستاعان قازاقستاننىڭ اۆياتسيالىق بيلىك دەلەگاتسياسى ەلدەگى ۇشۋ قاۋىپسىزدىگى جونىندەگى ىستەردىڭ اعىمداعى جاي-كۇيى تۋرالى تىڭدادى... قازاقستاندىق دەلەگاتسيا بۇرىن انىقتالعان ەسكەرتۋلەردى جويۋ بويىنشا قابىلدانعان ءىس-قيمىلداردى ۇسىندى، ولاردى ەۋروكوميسسيا وڭ باعالادى، - دەپ جازدى باسىلىم.

Trend مالىمەتىنشە، ە و-عا مۇشە 27 مەملەكەت قابىلداعان كوميتەت وتىرىسىنىڭ شەشىمىنە سايكەس، ۇشۋ قاۋىپسىزدىگىن قامتاماسىز ەتۋدەگى ەلەۋلى پروگرەستى ەسكەرە وتىرىپ، قازاقستان مەن قازاقستاندىق تاسىمالداۋشىلاردان ەۋروپالىق وداق ەلدەرىنە ۇشۋعا بارلىق شەكتەۋ الىنىپ تاستالدى.

اۆتور

راحيلا تلەۋوۆا