الەمدەگى ەڭ قارت مارافونشى ءۇندىستاندا جول اپاتىنان قازا تاپتى

استانا. قازاقپارات - 1911-جىلى ءۇندىستاندا دۇنيەگە كەلگەن فاۋدجا سينگح «سالدەلى تورنادو» لاقاپ اتتى 89 جاسىندا مارافونعا قاتىسىپ، جۇگىرە باستاعاندا العان. ول ايەلى مەن ۇلىن جوعالتقاننان كەيىن انگلياعا كوشىپ بارىپ، جارىستارعا قاتىسقان، دەپ حابارلايدى DW.

- جۇگىرۋ مەنى ومىرگە قايتا اكەلدى. ول ماعان مەيىرىم تانىتىپ، بارلىق جارا مەن قايعىمدى ۇمىتتىردى، - دەگەن ەدى ول CNN تەلەارناسىنا بەرگەن سۇحباتىندا.

بالا كەزىندە، ياعني 5 جاسقا دەيىن اياعىنداعى اقاۋعا بايلانىستى جۇرە الماعان سينگح 42 شاقىرىمدىق مارافوندى توعىز رەت جۇگىرىپ وتكەن. جەكە رەكوردىن ول 2003 -جىلى تورونتو مارافونىندا ورناتىپ، قاشىقتىقتى 5 ساعات 40 مينۋتتا جۇگىرىپ وتكەن. ال سوڭعى رەت 2013-جىلى گونكونگتە 10 شاقىرىمدىق جارىسقا قاتىسقان. بۇل وقيعا لوندوندا وتكەن 2012-جىلعى وليمپيادادا الاۋ ۇستاعان ساتىنەن ءبىر جىل كەيىن بولعان.

114 جاستاعى فاۋدجا سينگح رەسمي تۇردە گيننەستىڭ رەكوردتار كىتابىنا ەنبەسە دە، الەمدەگى ەڭ قارت مارافونشى رەتىندە تانىلدى. سەبەبى ونىڭ تۋعانىن راستايتىن تۋۋ تۋرالى كۋالىگى بولماعان. سوعان قاراماستان، ول 100 جاسقا تولعاندا ۇلى بريتانيا پاتشايىمى II ەليزاۆەتادان قۇتتىقتاۋ حاتىن العان.

ءۇندىستان پوليتسياسىنىڭ مالىمەتىنشە، بەلگىسىز كولىك پەندجاب شتاتىنداعى تۋعان اۋىلى بياس ماڭىندا جاياۋ كەتىپ بارا جاتقان سينگحتى قاعىپ كەتكەن. ول اۋرۋحانادا باس سۇيەگى مەن قابىرعاسىنا تۇسكەن اۋىر جاراقاتتاردان كوز جۇمعان.

ايتا كەتەيىك، بۇعان دەيىن برازيليادا الەمدەگى ەڭ قارت ايەل 116 جاسىندا قايتىس بولعانىن جازدىق.