الەمدەگى ەڭ ۇلكەن فۋتبول ستاديونى قانداي بولادى؟

استانا. قازاقپارات - ماروككودا الەمدەگى ەڭ ءىرى فۋتبول ستاديونىنىڭ جوباسى تانىستىرىلدى. جوبا قۇنى 455 ميلليون دوللارعا باعالانىپ وتىر. 

كاسابلانكا قالاسىندا سالىناتىن كورول حاسان II اتىنداعى ستاديون 115 مىڭ ورىنعا ەسەپتەلگەن جانە ول الەمدەگى ەڭ ۇلكەن فۋتبول ارەناسى بولماق. ستاديون 2030 -جىلعى فۋتبولدان الەم چەمپيوناتىنا ارنالىپ سالىنادى. ماروككو سول چەمپيوناتتىڭ بىرلەسكەن يەسى رەتىندە ءتۋرنيردىڭ فينالدىق ماتچىن ءدال وسى ستاديوندا وتكىزۋدى جوسپارلاپ وتىر. سونىمەن قاتار، فينالدى وتكىزۋگە يسپانياداعى مادريد قالاسىنىڭ «سانتياگو بەرنابەۋ» جانە بارسەلوناداعى «كامپ نوۋ» ستاديوندارى دا ۇمىتكەر.

2030 -جىلعى الەم چەمپيوناتى العاش رەت ءۇش قۇرلىقتا - ەۋروپا، افريكا جانە وڭتۇستىك امەريكادا - وتەتىن بولادى. تۋرنير فۋتبولدىڭ 100 جىلدىعىنا وراي ۇيىمداستىرىلادى.

قازىرگى تاڭدا ەڭ ۇلكەن فۋتبول ارەناسى - سولتۇستىك كورەيانىڭ پحەنيان قالاسىنداعى «1-مامىر» ستاديونى، ول 114 مىڭ كورەرمەندى سىيدىرادى. دەگەنمەن، الەمدەگى ەڭ ۇلكەن ستاديون - ءۇندىستاننىڭ احماداباد قالاسىنداعى نارەندرا مودي اتىنداعى ستاديون، وندا 132 مىڭ ادام سياتىن ورىن بار، ءبىراق وندا فۋتبول ەمەس، كريكەت ويىندارى وتەدى.

Grand Stade Hassan II ستاديونىن سالۋعا دايىندىق جۇمىستارى 2023 -جىلدىڭ قازان ايىندا باستالدى. ستاديون 100 گەكتار اۋماقتا سالىنادى.

جوبانى پاريجدىك Oualalou + Choi ارحيتەكتۋرالىق ستۋدياسى جانە سپورتتىق ديزاين سالاسىنىڭ كوشباسشىسى Populous كومپانياسى ازىرلەگەن. ستاديوننىڭ شاتىرى ماروككولىق داستۇرلەردەن شابىت العان جانە ۇلكەن شاتىر ءتارىزدى ەتىپ جاسالعان. نەگىزگى ستاديون اينالاسىندا شاعىن سپورت الاڭدارى مەن كەشەندەر ورنالاساتىن باقتار بولادى. تابيعي-سپورتتىق وازيس كاسابلانكادان 38 شاقىرىم سولتۇستىكتە سالىنادى. جوبانىڭ قۇنى 455 ميلليون دوللارعا باعالانىپ وتىر.