الەمدەگى ەڭ باي ادامداردىڭ داۋلەتى ارتا تۇسكەن

الەمدەگى ەڭ باي ادامداردىڭ داۋلەتى $90,5 تريلليونعا جەتتى. الەمدە باي-ماناپتار بايىعان ۇستىنە باي ءتۇستى. بىلتىر ەڭ اۋقاتتى ادامداردىڭ داۋلەتى 90 تريلليون دوللاردان اسقان. ال 23 ميلليون ادامنىڭ دۇنيە-مۇلكى ءبىر ميلليون دوللاردان اسادى.

بۇلاردىڭ كوبى ا ق ش، جاپونيا، گەرمانيا جانە قىتاي ازاماتتارى. بىلتىر ءبىر عانا امەريكانىڭ وزىندە 560 مىڭ ميلليونەر پايدا بولىپ، اۋقاتتى امەريكالىقتاردىڭ سانى 8 ميلليونعا جۋىقتاعان. وعان فەدەرالدى قور جۇيەسىنىڭ پايىزدىق مولشەرلەمەنى تومەندەتۋى سەبەپ. سودان اكسيالار وسكەن. اۋقاتتى ادامداردىڭ كوبەيۋىنە جاساندى ينتەللەكتىڭ قارقىندى دامۋى دا اسەر ەتكەن. ءبىر ءتاۋىرى ەسەپسىز اقشانى ەل-جۇرتتىڭ يگىلىگىنە جۇمسايتىندار بار. الەمدەگى ەڭ باي 20 ادامنىڭ قاتارىنداعى امەريكالىق بيلل گەيتس 200 ميلليارد دوللارىن افريكا حالقىنىڭ دەنساۋلىعى مەن ءىلىم-ءبىلىم الۋىنا جۇمسايتىنىن جاريا ەتتى. ءبىراق مايكروسوفت كومپانياسىنىڭ نەگىزىن قالاۋشى كاسىپكەردىڭ اقشاسى بۇعان جەتپەيدى. قازىرگى داۋلەتى 117 ميلليارد دوللار شاماسىندا. ءبىراق بيلل گەيتس مىرزا قايىرىمدىلىق قورىنا قارجىنى الداعى 20  جىلدا سالۋعا نيەت تانىتىپ وتىر.

https://24.kz