الەمدە قانداي ماماندىقتارعا سۇرانىس كوپ؟

استانا. قازاقپارات - الەمنىڭ ەڭبەك نارىعى ءبىز ويلاعاننان دا جىلدام وزگەرىپ جاتىر، دەپ حابارلايدى 24kz.

وعان، ارينە، دەموگرافيالىق ءوسىم مەن تەحنولوگيالىق جەتىستىكتەر سەبەپ. دۇنيەجۇزىلىك ەكونوميكالىق فورۋم ساراپتاماسىنا ساي، كوپ ۇزاماي كەڭسە جانە اكىمشىلىك قىزمەتتە جۇرگەندەر جاپپاي قىسقارۋعا ۇشىراۋى مۇمكىن. سوندا جاقىن بولاشاقتا قانداي ماماندىقتار سۇرانىسقا يە بولادى؟ ساراپشىلاردىڭ بولجامى قانداي؟

بۇگىنگى كاپيتاليستىك قوعامدا اقپاراتتى تالداۋ ماڭىزى وراسان زور. سايكەسىنشە، ونى يگەرە الاتىن مامانعا دەگەن سۇرانىس تا جوعارى. ءبىر عانا مىسال. قارجى ينستيتۋتتارى ءتۇرلى نارىقتا ساۋدا جاساۋ ءۇشىن الدىن الا زەرتتەپ، تابىسقا كەنەلۋدىڭ مۇمكىندىگىن قاراستىرۋ كەرەك. ال ونىمەن مالىمەتتەردى ساراپتاۋشى اينالىسادى. ياعني، اۋقىمدى دەرەكتەردى تالداۋ ارقىلى يننوۆاتسيالارعا جول اشاتىن ءارى بيزنەس-شەشىمدەر تۋرالى اقپار بەرەتىن ۇردىستەر مەن زاڭدىلىقتاردى انىقتايدى. سوندىقتان دا وسى سالانىڭ ماماندارىنا سۇرانىس پەن ولارعا ۇسىنىلاتىن جالاقى دا بۇگىندە الەم بويىنشا وتە جوعارى. كومپيۋتەر مەن ماتەماتيكاعا قاتىسى بار ماماندىقتار. بۇل سەكتورعا باعدارلاماشىلار، اقپاراتتىق قاۋىپسىزدىك ساراپشىلارى جانە IT ينجينيرينگ كىرەدى.

روبوتتىق تەحنولوگيانىڭ دامۋىنا سەپتىگىن تيگىزىپ وتىرعان IT سالانىڭ ماماندارىنا ۇنەمى سۇرانىس جوعارى. ويتكەنى ينتەرنەت كەڭىستىكتىڭ مۇمكىندىكتەرىن ارتتىرۋ وسى سالا وكىلدەرىنىڭ قولىندا. ورتاشا جىلدىق جالاقىلارى شامامەن 120 مىڭ دوللار. مەديتسينادا روبوتتار كەڭىنەن قولدانىلا باستاعانىنا قاراماستان، ازىرگە دارىگەرلەردىڭ ورنىن باسۋى ەكىتالاي. ءتىپتى IBM سەكىلدى الپاۋىتتار حيرۋرگ قۇلتەمىردى جاساپ شىعۋعا كىرىسكەنىمەن، بۇل جوبانىڭ جەمىسىن جاقىن بولاشاقتا كورەتىنىمىزگە كۇمان كوپ. فۋتۋرولوگتاردىڭ ءوزى وسىلاي دەيدى. سوندىقتان ادام بالاسىنىڭ دەنساۋلىعىن كۇتۋ مەديتسينا قىزمەتكەرلەرىنىڭ قولىندا قالا بەرمەك. كەيىنگى جىلدارى الەمدە دەموگرافيالىق ءدۇمپۋ ورىن العانىن ەسكەرسەك، اق حالاتتىلارعا سۇرانىس جىل وتكەن سايىن ارتپاسا كەمىمەگەن.

ال، دۇنيەجۇزىلىك ەكونوميكالىق فورۋمى سۇرانىسقا يە بولاتىن ماماندىقتار تىزىمىنە ەمەس، ادام داعدىلارىنا ءمان بەرىپ وتىر. «جۇمىس ورىندارىنىڭ بولاشاعى» اتتى بايانداماسىنىڭ 2023 -جىلعى ەسەبىنە سايكەس، 2027 -جىلعا قاراي ادامنىڭ اناليتيكالىق، شىعارماشىلىق ويلاۋ داعدىلارى الەمدە وتە جوعارى باعالانادى. كوشباسشىلىق قابىلەتى بار، الەۋمەتكە اسەر ەتە الاتىن جانە ءبىلىمىن جەتىلدىرۋدەن جالىقپايتىندار دا سۇرانىستان شەت قالمايدى. سونىمەن قاتار، اتالعان ەسەپكە سايكەس، 2027 -جىلعا دەيىن 10 قىزمەتكەردىڭ التاۋى ءبىلىمىن قايتا شىڭداۋىنا تۋرا كەلەدى. «سەبەبى تەحنولوگيا قارىشتاپ دامىعان سايىن كومپانيالاردىڭ ءبىلىم بەرۋ باعدارلامالارى جىلدام ەسكىرىپ قالۋدا»، - دەيدى ماماندار.