الەمدە كەز كەلگەن ۋاقىتتا جاڭا پاندەميا باستالۋى مۇمكىن – د د س ۇ باسشىسى

استانا. KAZINFORM - دۇنيەجۇزىلىك دەنساۋلىق ساقتاۋ ۇيىمىنىڭ (د د س ۇ) باس ديرەكتورى تەدروس ادانوم گەبرەيسۋس جەنيەۆادا الدىن الۋ تۋرالى كەلىسىم جوباسىن ازىرلەپ جاتقان ۇكىمەتارالىق كەلىسسوزدەر ورگانىنىڭ (IGNB) وتىرىسىندا سويلەگەن سوزىندە الەمدە كەز كەلگەن ۋاقىتتا جاڭا پاندەميا باستالۋى مۇمكىن ەكەنىن ەسكەرتتى، دەپ جازادى ت ا س س.

- قازىرگى H5N1 (قۇس تۇماۋىنىڭ) ءورشۋى بىزگە كەلەسى پاندەميانىڭ كەز كەلگەن ۋاقىتتا كەلە سالۋى مۇمكىن ەكەنىن كورسەتتى. ول كەز كەلگەن ۋاقىتتا كەلە الادى. ول ءبىزدى كۇتپەيدى، - دەپ اتاپ ءوتتى د د س ۇ باس ديرەكتورى.

11-شىلدەدە جەنيەۆادا وتكەن باسپا ءسوز ءماسليحاتىندا گەبرەيەسۋس بارلىق ەلدەردى قۇس تۇماۋىن قاداعالاۋدى كۇشەيتۋگە شاقىرىپ، كامبودجا مەن امەريكا قۇراما شتاتتارىندا ىندەتتىڭ سوڭعى جاعدايلارىنا نازار اۋداردى.

ول سونداي-اق تاۋەكەل توپتارىنا، اتاپ ايتقاندا، 60 جاستان اسقان ادامدار مەن مەديتسينا قىزمەتكەرلەرىن جىلىنا كەمىندە ءبىر رەت COVID-19-عا قارسى ۆاكسيناتسيالاۋ قاجەتتىگىن ەسكە سالدى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا الەمدە اپتا سايىن ورتا ەسەپپەن 1,7 مىڭ ادام قايتىس بولادى.