الەمدە جىل سايىن 18 ميلليون ادام جۇرەك- قان تامىرلارى اۋرۋلارىنان كوز جۇمادى

بۇگىن - دۇنيەجۇزىلىك جۇرەك كۇنى. الەمدە جىل سايىن 18 ميلليوننان اسا ادام جۇرەك- قان تامىر اۋرۋلارىنان كوز جۇمادى. مۇنداي ستاتيستيكانى كارديولوگيا جانە ىشكى اۋرۋلار عىلىمي- زەرتتەۋ ينستيتۋتىنىڭ كارديولوگى بوتاگوز قىستاۋوۆا كەلتىردى، دەپ حابارلايدى قازاقپارات ءتىلشىسى.

كارديولوگيا جانە ىشكى اۋرۋلار عىلىمي- زەرتتەۋ ينستيتۋتىنىڭ كونسۋلتاتسيالىق- دياگنوستيكالىق ورتالىعىنىڭ كارديولوگى، جوعارى ساناتتى دارىگەر، مەديتسينا عىلىمدارىنىڭ كانديداتى بوتاگوز قىستاۋوۆانىڭ ايتۋىنشا، بيىل دۇنيەجۇزىلىك جۇرەك كۇنىنىڭ ۇرانى «جۇرەك - ءومىر سۇرۋگە ارنالعان».

بۇل كۇندى وتكىزۋدىڭ ماقساتى - قوعامنىڭ نازارىن دەنساۋلىقتى ساقتاۋ ماسەلەلەرىنە اۋدارۋ، جۇرەك- قان تامىرلارى اۋرۋلارىنىڭ الدىن الۋدىڭ ماڭىزدىلىعىن اتاپ ءوتۋ.

«جىل سايىن الەمدە 18 ميلليوننان استام ادام جۇرەك- قان تامىرلارى اۋرۋلارىنان قايتىس بولادى. اعزالاردىڭ، ورگانيزم جۇيەلەرىنىڭ جاعدايى جانە ادامنىڭ ءومىر ءسۇرۋ ۇزاقتىعى جۇرەكتىڭ جانە بۇكىل جۇرەك- قانتامىرلارى جۇيەسىنىڭ دۇرىس جۇمىس ىستەۋىنە بايلانىستى. جۇرەك- قان تامىرلارى اۋرۋلارىنىڭ الدىن الۋ دەنساۋلىق پەن ۇزاق ءومىر ءسۇرۋدى قامتاماسىز ەتۋدە شەشۋشى ءرول اتقارادى»، - دەيدى دارىگەر.

كارديولوگتىڭ ايتۋىنشا، جۇرەك اۋرۋىمەن قازىر بالالار مەن جاستار دا ءجيى اۋىراتىن بولعان.

ماماننىڭ سوزىنشە، ادامداردىڭ جۇرەك اۋرۋىنا شالدىعۋىنا بىرنەشە فاكتور اسەر ەتەدى. ەڭ ءبىرىنشىسى - ءومىر سالتىنىڭ وزگەرۋى. سوسىن فيزيكالىق قوزعالىستىڭ ازايۋى، زياندى تاماقتانۋ، قانت پەن تۇزدى شەكتەن تىس قولدانۋ كوپ اسەر ەتەدى.

«سوندىقتان، ماي، تۇز جانە قانتتى شەكتەيتىن تەڭدەستىرىلگەن راتسيوندى ۇستانۋ كەرەك. كوكونىس، جەمىس- جيدەك جانە قۇرامىندا ماگنيي بار تاعامداردى كوبىرەك تۇتىنعان ابزال. تۇراقتى جاتتىعۋلار جۇرەك پەن قان تامىرلارىن نىعايتادى. قالىپتى سالماقتى ساقتاعان ءجون. تەمەكى شەگۋدەن جانە الكوگولدى ىشىمدىك ىشۋدەن باس تارتۋ كەرەك - تەمەكى شەگۋ جانە شامادان تىس ىشىمدىك ءىشۋ جۇرەك پەن قان تامىرلارى اۋرۋلارىنىڭ قاۋپىن ارتتىرادى»، - دەيدى دارىگەر.

اۆتور

الما مۇقانوۆا