المازبەك اتامبايەۆ باس بوستاندىعىنان ايىرۋ جازاسىنا كەسىلدى

بىشكەك. KAZINFORM - بىشكەكتىڭ پەرۆومايسكي اۋداندىق سوتى قىرعىزستاننىڭ ەكس-پرەزيدەنتى المازبەك اتامبايەۆتى 2019 -جىلدىڭ تامىزىندا قوي-تاش وقيعاسىنا بايلانىستى مۇلكىن تاركىلەپ، مەملەكەتتىك ناگرادالارىنان ايىرۋ ارقىلى 11 جىل 6 ايعا باس بوستاندىعىنان ايىرۋعا سىرتتاي ۇكىم شىعاردى، دەپ حابارلايدى Kazinform ءتىلشىسى.

جەرگىلىكتى ب ا ق حابارلاۋىنشا، ءىس بويىنشا باسقا ايىپتالۋشىلار، سونىڭ ىشىندە بۇرىنعى دەپۋتاتتار مەن شەنەۋنىكتەرگە قاتىستى كەلەسى ۇكىمدەر شىعارىلدى:

راۆشان جەەنبەكوۆ پەن فاريد نيازوۆقا - 7 جىل 8 ايعا باس بوستاندىعىنان ايىرۋ، سوت زالىندا قاماۋعا الىندى؛
يرينا كارامۋشكينا - 7 جىل 6 ايعا باس بوستاندىعىنان ايىرۋ، سوت زالىندا قاماۋعا الىندى؛
فارحاد باابيەۆ - 5  جىل 6 اي، سوت زالىندا قاماۋعا الىندى؛
قانات ساعىمبايەۆ، مەەربەك ميسكەمبايەۆ، قانات وسموناليەۆ، قۇندىز جولدۋبايەۆا - ءارقايسىسىنا 5 جىل پروباتسيالىق قاداعالاۋ؛ 
اسەل كودۋرانوۆا، امانگەلدى كاكەبايەۆ، نوورۋز قاپاربەك ۋۋلى جانە مارات شامەنوۆ - ءارقايسىسىنا 3 جىل پروباتسيالىق قاداعالاۋ؛ 
يسابەك ابدىعازيەۆ، ابدۋلدا سۋرانچيەۆ، توروحان تىنىمسەيىتوۆ، يۋري ۆاسيلەۆ - ءىس بويىنشا ەسكىرۋ مەرزىمىنىڭ وتۋىنە بايلانىستى جازاسىز قالدىرىلدى؛
اسقاربەك شاديەۆ مۇلكى تاركىلەنىپ، 3 جىل مەملەكەتتىك قىزمەتتە جۇمىس ىستەۋگە تىيىم سالىنىپ، 15 جىل 6 ايعا باس بوستاندىعىنان ايىرىلدى.
سوت سونداي-اق ا. اتامبايەۆ پەن ا. شاديەۆتى ءارقايسىسىنا 5 ميلليارد 439 ميلليون سوم تولەۋگە مىندەتتەدى.
بۇعان دەيىن حابارلانعانداي، مەملەكەتتىك ايىپتاۋ قىرعىزستاننىڭ بۇرىنعى پرەزيدەنتى ا. اتامبايەۆتى 11 جىلعا باس بوستاندىعىنان ايىرۋدى سۇراعان.

ەسكە سالا كەتسەك، 2019 -جىلدىڭ 7-تامىزىندا قىرعىز رەسپۋبليكاسىنىڭ مەملەكەتتىك ۇلتتىق قاۋىپسىزدىك كوميتەتىنىڭ ارنايى جاساق ماماندارى بۇرىنعى پرەزيدەنت المازبەك اتامبايەۆتى ۇستاۋ وپەراتسياسىن جۇرگىزدى.

الايدا، وقيعاعا اتامبايەۆتىڭ جاقتاستارى ارالاسىپ، ارنايى جاساقتى ونىڭ ۇيىنە كىرگىزبەگەن. اتامبايەۆتى ۇستاۋ ءۇشىن ەكىنشى رەت ارەكەت جاساعان كەزدە، جاپپاي تارتىپسىزدىكتەر باستالعان. قاقتىعىستا ادام شىعىنى بولعان.

بۇدان تىس، قىرىقتان استام ادام زارداپ شەككەن.

اۆتور

زارينا تۋعانبايەۆا