الماتىنى تۇراقتى دامۋ جولىنا شىعارۋعا تىرىستىم - ەربولات دوسايەۆ الماتىلىقتارمەن قوشتاستى

الماتى. KAZINFORM - بۇگىن الماتى ءماسليحاتىنىڭ جينالىسىندا ەربولات دوسايەۆ ءوز جۇمىسىن قورىتىندىلاپ، الماتى تۇرعىندارىنا ۇندەۋ جاسادى.

- ەڭ الدىمەن، تۋعان قالاما ەلىمىزدىڭ ەڭ قيىن كەزەڭدەرىنىڭ بىرىندە قىزمەت ەتۋگە سەنىم مەن مۇمكىندىك بەرگەنى ءۇشىن مەملەكەت باسشىسى قاسىم-جومارت توقايەۆقا شىن جۇرەكتەن ريزاشىلىعىمدى بىلدىرەمىن. بۇل مەن ءۇشىن ەرەكشە مارتەبە جانە ۇلكەن جاۋاپكەرشىلىك بولدى. العاشقى جۇمىس كۇننەن باستاپ وسى جوعارى سەنىمدى اقتاۋ ءۇشىن بارلىق ءبىلىمىم مەن تاجىريبەمدى سالىپ، الماتىنى تۇراقتى دامۋ جولىنا شىعارۋعا تىرىستىم. وتكەن ءۇش جىلدان استام ۋاقىت مەن ءۇشىن كۇردەلى سىناقتار مەن ماڭىزدى جەتىستىكتەرگە تولى كەزەڭ بولدى. قالانىڭ دامۋىنا جانە تۇرعىنداردىڭ ءومىر ءسۇرۋ ساپاسىن ارتتىرۋعا باعىتتالعان ناقتى وزگەرىستەر ۋاقىتىنا اينالدى، - دەدى ەكس-اكىم.

ەربولات دوسايەۆ مەملەكەت باسشىسىنىڭ تاپسىرماسىمەن الماتىنىڭ بولاشاق دامۋىن ايقىندايتىن 20 دان استام ستراتەگيالىق قۇجات قابىلدانعانىن اتاپ ءوتتى. ولاردىڭ قاتارىندا الماتى قالاسىنىڭ 2030 -جىلعا دەيىنگى دامۋ باعدارلاماسى، الماتىنىڭ 2040 -جىلعا دەيىنگى جاڭا باس جوسپارى، قالانىڭ كولىك قاڭقاسىنىڭ ماستەر- جوسپارى جانە باسقا دا ماڭىزدى قۇجاتتار بار.

- كەيىنگى 3 جىلدا قالانىڭ بۇكىل ينجەنەرلىك ينفراقۇرىلىمىن اۋقىمدى مودەرنيزاتسيالاۋ باستالدى. 540 ك م سۋ قۇبىرى جانە كارىز جۇيەلەرى جاڭارتىلدى، 75 ك م جاڭا جول سالىنىپ، 650 كم جول جوندەلدى. وتكەن ءۇش جىلدا الماتى ەكونوميكاسى دان استام ءوسىپ، 29 تريلليون تەڭگەدەن استى. ال الماتى بيۋدجەتىنىڭ كىرىسى 2022 -جىلمەن سالىستىرعاندا 2,2 ەسە ءوسىپ، 2,5 تريلليون تەڭگەگە جەتتى. ءبىزدىڭ باستى مىندەتىمىز - الماتىلىقتاردىڭ ءومىر ساپاسىن جاقسارتۋ بولدى، - دەدى ول.

سونداي-اق ەربولات دوسايەۆ ءوزى قالانى باسقارعان ءۇش جىل ىشىندە قالادا 57 وقۋ ورنى جانە 12 دەنساۋلىق ساقتاۋ نىسانى سالىنعانىن نە جاڭارتىلعانىن ايتتى.

- بۇگىن وسى مۇمكىندىكتى پايدالانا وتىرىپ، قيىن-قىستاۋ ساتتەردە بەلسەندى اتسالىسىپ، قولداۋ كورسەتكەندەرىڭىز ءۇشىن بارشاڭىزعا شىن جۇرەكتەن العىس بىلدىرەمىن. مەن ءومىر ءسۇرۋ ساپاسى جوعارى جانە جايلى قالالىق ورتاسى بار، ەڭ زاماناۋي ءارى دامىعان مەگاپوليس رەتىندە الماتىنىڭ بولاشاعىنا شىن جۇرەكتەن سەنەمىن، - دەپ قورىتىندىلادى ەكس-اكىم.

ەسكە سالايىق، بۇگىن مەملەكەت باسشىسىنىڭ جارلىعىمەن ەربولات دوسايەۆ الماتى قالاسىنىڭ اكىمى قىزمەتىنەن كەتتى.