الماتىنىڭ تاۋ بوكتەرىندە ەكى زاڭسىز نىسان ءسۇرىلدى
الماتى. KAZINFORM - سوت شەشىمىمەن «تاۋلى قىرات» ىقشام اۋدانىندا قۇرىلىسى اياقتالماعان ەكى ءۇي بۇزىلدى.
قالا قۇرىلىسىن باقىلاۋ باسقارماسىنىڭ مالىمەتىنشە، جەكە تۇلعا رۇقساتسىز تاۋ بوكتەرىندە ءۇي سالعان. سونىمەن قاتار قۇرىلىس جۇمىستارى كەزىندە اتالعان اۋماقتارعا جول سالۋ ءۇشىن تاۋ بوكتەرىنىڭ ەتەگى كەسىلىپ، ەكوجۇيەگە زالال كەلتىرىلگەن.
باسقارما جەر ۋچاسكەلەرىن باستاپقى قالپىنا كەلتىرۋ تۋرالى نۇسقاما بەرىپ، مەنشىك يەسىنە قاتىستى اكىمشىلىك شارالار قابىلداعان. الايدا نۇسقامادا كورسەتىلگەن تالاپتار ورىندالماعاندىقتان، باسقارما سوتقا ماجبۇرلەپ بۇزۋ تۋرالى تالاپ- ارىز بەرگەن.
- 2024 -جىلى 17-قازاندا مەدەۋ اۋداندىق سوتى تالاپ-ارىزدى قاناعاتتاندىرىپ، سوت قاۋلىسى الماتى قالاسىنىڭ ادىلەت دەپارتامەنتىنە ورىنداۋعا جىبەرىلگەن. سوت شەشىمىن ورىنداۋ ماقساتىندا جۋىردا مەنشىك يەسى زاڭسىز نىسانداردى ءوزى بۇزىپ تاستادى، - دەپ حابارلادى باسقارمادان.
اۆتور
دوسبول اتاجان