الماتىنى قالىڭ قار باستى
الماتى. KAZINFORM - الماتىدا تولاسسىز قار جاۋىپ جاتىر. كوممۋنالدىق قىزمەت جولعا رەاگەنت سەۋىپ، 450-دەن استام ارنايى تەحنيكا شىعاردى.
الماتى اكىمدىگىنەن ءمالىم ەتكەندەي، كوكتايعاقتىڭ الدىن الۋ جانە جول قاۋىپسىزدىگىن قامتاماسىز ەتۋ ماقساتىندا قار جاۋار الدىندا جولدار 180 تەكشە مەتر سۇيىق رەاگەنتپەن وڭدەلدى. جولعا قۇم-تۇز قوسپاسىن سەبۋگە 152 ارنايى تەحنيكا جۇمىلدىرىلدى، ساعات 17:00-دەگى جاعداي بويىنشا 1250 توننا كوكتايعاققا قارسى ماتەريال پايدالانىلدى.
- قاردىڭ جينالىپ قالۋىن تەزدەتىپ جويۋ ءۇشىن قاۋىپتى جول ۋچاسكەلەرىندە، ءتۇسۋ جانە كوتەرىلۋ ايماقتارىندا، جولايرىقتاردىڭ بۇرىلىس بولىكتەرىندە 46 جەدەل بريگادا كۇشەيتىلگەن رەجيمدە جۇمىس ىستەپ جاتىر. ولار تاۋلىك بويى كەزەكشىلىك ەتەدى، - دەپ حابارلادى اكىمدىكتەن.
كۇندىزگى ۋاقىتتا قار تازالاۋ جۇمىستارىنا 455 تەحنيكا جانە 1060 جول جۇمىسشىسى تارتىلدى. سونداي-اق، جاياۋ جۇرگىنشىلەر جولدارىن، قوعامدىق ورىنداردى، قوعامدىق كولىك ايالدامالارىن جانە جەر ءۇستى وتكەلدەرىن مەحانيكالاندىرىلعان تازالاۋ ءۇشىن 95 شاعىن كولەمدى تەحنيكا قولدانىلادى.
«قازگيدرومەت» مالىمەتىنشە، بۇگىن قار كەشكى 20:00-گە دەيىن 5-6 م م- گە دەيىن جەتۋى مۇمكىن. قار 31 -قاڭتار كۇنى تاعى جاۋىپ، تاعى 3 م م قوسىمشا جاۋىن-شاشىن ءتۇسۋى ىقتيمال.
30 -قاڭتار كۇنى اۋا تەمپەراتۋراسى شامامەن 0 گرادۋس بولادى. 31- قاڭتارعا قاراعان ءتۇنى تەمپەراتۋرا 6-…8- گرادۋسقا دەيىن تومەندەپ، كۇندىز 2…4- گرادۋس ارالىعىندا ساقتالادى.
الماتى قالاسىنىڭ كوممۋنالدىق ينفراقۇرىلىمدى دامىتۋ باسقارماسى قالا تۇرعىندارى مەن قوناقتارىن جولدا مۇقيات بولۋعا، جول قوزعالىسى ەرەجەلەرىن ساقتاۋعا جانە جول ءجۇرۋ كەزىندە اۋا رايىن ەسكەرۋگە شاقىرادى.
الماتى حالىقارالىق اۋەجايى اۋا رايىنىڭ ناشارلاۋىنا بايلانىستى اۋەجايدىڭ وندىرىستىك قىزمەتتەرى كۇشەيتىلگەن رەجيمدە جۇمىس ىستەپ جاتقانىن حابارلادى.
- كەشىگۋلەردى بارىنشا ازايتۋ ءۇشىن بارلىق قاجەتتى شارالار قابىلدانادى. جولاۋشىلاردان رەيستەردىڭ اعىمداعى ستاتۋسىن ۇشار الدىندا اۋەجاي مەن اۋەكومپانيالاردىڭ رەسمي سايتتارىنان تەكسەرۋدى سۇرايمىز، - دەپ حابارلادى اۋە ايلاعىنان.
وسىعان دەيىن اۋا رايىنىڭ بۇزىلۋىنا بايلانىستى اباي مەن شىعىس قازاقستان وبلىستارىندا جولدىڭ جابىلعانى تۋرالى جازعان ەدىك.
اۆتور
دوسبول اتاجان