الماتىنىڭ ەكس-اكىمى ەربولات دوسايەۆ نەسىمەن ەستە قالدى
الماتى. قازاقپارات - 2022 -جىلى الماتى اكىمىنىڭ قىزمەتىنە كىرىسكەن ەربولات دوسايەۆ 3 جىل 4 اي جۇمىس ىستەدى. وسى ۋاقىت ىشىندە ەلىمىزدىڭ ەڭ ءبىرى مەگاپوليسىن باسقارعان ول نەسىمەن ەستە قالدى؟
ەربولات اسقاربەك ۇلى دوسايەۆ 1970 -جىلى 21-مامىردا الماتى قالاسىندا دۇنيەگە كەلگەن. 1987 -جىلى و. جاۋتىكوۆ اتىنداعى رەسپۋبليكالىق فيزيكا- ماتەماتيكالىق مەكتەپ- ينتەرناتىن، كەيىن الماتى ەنەرگەتيكالىق ينستيتۋتىن، باۋمان اتىنداعى ماسكەۋ مەملەكەتتىك تەحنيكالىق ۋنيۆەرسيتەتىن ءبىتىردى.
ءوز مانسابىندا ءبىرقاتار جوعارى لاۋازىمداردى اتقارعان. ولاردىڭ قاتارىندا قارجى ءمينيسترى، دەنساۋلىق ساقتاۋ ءمينيسترى، ۇلتتىق ەكونوميكا ءمينيسترى، ق ر ۇلتتىق بانكىنىڭ ءتوراعاسى جانە باسقا دا جاۋاپتى قىزمەتتەر بار. تولىعىراق Kazinform اگەنتتىگىنىڭ دەرەكقور ايدارىنان وقي الاسىزدار.
2022 -جىلى 31-قاڭتار كۇنى ەربولات دوسايەۆ الماتى قالاسىنىڭ اكىمى قىزمەتىنە تاعايىندالدى. ال باقىتجان ساعىنتايەۆ مەملەكەت باسشىسىنىڭ جارلىعىمەن قىزمەتىنەن بوساتىلدى. ول الماتى اكىمى لاۋازىمىنا 2019 -جىلى تاعايىندالعان بولاتىن.
جاڭا اكىمنىڭ باستى مىندەتتەرىنىڭ ءبىرى - قاڭتار وقيعاسى كەزىندە جاپا شەككەن كاسىپكەرلەرگە كومەك بەرۋ، بۇلىنگەن مەملەكەتتىك، الەۋمەتتىك نىسانداردى قالپىنا كەلتىرۋ جانە قالا قاۋىپسىزدىگىن كۇشەيتۋ بولدى. سوندىقتان العاشقى كۇندەرى ەربولات دوسايەۆ بيزنەس وكىلدەرىمەن كەزدەسىپ، شىعىن وتەۋدى جەدەلدەتۋ ماسەلەلەرىن تالقىلادى.
بىرنەشە كۇننەن كەيىن ۇكىمەتتىڭ كەڭەيتىلگەن وتىرىسىندا ەربولات دوسايەۆ الماتى قالاسىن قالپىنا كەلتىرۋ جانە ودان ءارى دامىتۋ تۋرالى ايتتى. ونىڭ جوسپارىندا قالا ەكونوميكاسىن وسۋىنك، بيزنەستى قولداۋعا، جاڭا جۇمىس ورىندارىن اشۋعا، ءبىلىم بەرۋ مەكەمەلەرىندە قاۋىپسىزدىكتى كۇشەيتۋگە باسىمدىق بەرىلدى.
ال 2022 -جىلدىڭ سوڭىندا الماتى اكىمى زارداپ شەككەن 1,6 مىڭنان استام كاسىپورىنعا 16,2 ميلليارد تەڭگە كولەمىندە وتەماقى تولەنگەنىن، ال جەكە تۇلعالارعا 613,5 ميلليون تەڭگە سوماسىندا مۇلىكتىڭ زالالى وتەلگەنىن اتاپ ءوتتى. 2023 -جىلى قازان ايىندا قاڭتار وقيعاسىنان كەيىن قاتتى زاقىم كەلگەن قالا اكىمدىگىنىڭ عيماراتىن قالپىنا كەلتىرۋ جۇمىستارى اياقتالدى.
سىنعا اكەلگەن قالا حالقىمەن كەزدەسۋلەر
ەربولات دوسايەۆ الماتىلىقتار ەسىندە قالانىڭ ءار اۋدانىندا وتكەن تۇراقتى كەزدەسۋلەرىمەن قالاتىنى ءسوزسىز. 2022 -جىلى اكىم حالىقپەن 24 رەت (ءار توقسان سايىن 8 اۋداندا ءبىر كەزدەسۋ)، 2023 -جىلى 32 رەت كەزدەسكەن. 2024 -جىلدان باستاپ ەربولات دوسايەۆ حالىقپەن كەزدەسۋلەرىنىڭ فورماتىن وزگەرتىپ، كوشپەلى كەزدەسۋلەر ۇيىمداستىرا باستادى.
كوبىنە مەكتەپ نە ۋنيۆەرسيتەتتەردىڭ قابىرعاسىندا وتكەن كەزدەسۋلەردەگى سويلەۋ مانەرى ءۇشىن ەربولات دوسايەۆ قاتتى سىنعا ۇشىرادى. كەيىن ول حالىقپەن كەزدەسۋلەرى نەگە ەموتسينالدى وتەتىنىن ءتۇسىندىردى.
جول، كەپتەلىس جانە پەتيتسيا
2023 -جىل الماتىدا اۋقىمدى جول جوندەۋ جۇمىستارى باستالدى. ءبىراز ۋاقىتقا ماگيسترالدى كوشەلەر - اباي جانە ءال-فارابي داڭعىلدارى ءىشىنارا جابىلدى، سونىڭ سالدارىنان مەگاپوليستە كەپتەلىس كۇشەيدى. ال اكىمدىك اتالعان كوشەلەردە العاش رەت جاڭا تەحنولوگيالاردى قولدانا وتىرىپ جوندەۋ جۇرگىزىلگەنىن حابارلادى.
جالپى جوندەۋ جۇمىستارى 200 ك م بولاتىن 230 كوشەنى قامتىدى.
قالادا جول جوندەۋ جۇمىستارى باستالعاننان كەيىن الماتىلىقتار الەۋمەتتىك جەلىدە ءوز نارازىلىقتارىن بىلدىرە باستادى. ءتىپتى ەربولات دوسايەۆتىڭ قىزمەتتەن كەتۋىن تالاپ ەتەتىن پەتيتسيا جاريالاندى. اكىم كەيىنىرەك بۇل جاعدايعا تۇسىنىكتەمە بەردى. ول قالادا 2 ميلليوننان استام ادام تۇراتىنىن جانە پەتيتسياعا ساناۋلى عانا ادام، ونىڭ ىشىندە ج س ن-ى جوق ادامدار قول قويعانىن اتاپ ءوتتى.
باس جوسپار، مەكتەپ اۆتوبۋستارى جانە جاستار ورتالىقتارى
ەربولات دوسايەۆتىڭ تۇسىندا الماتىدا ءبىرشاما جاڭا شەشىمدەر دە قابىلداندى. مىسالى، 2023 -جىلى ەربولات دوسايەۆتىڭ باسشىلىعىمەن جاسالعان الماتى قالاسىنىڭ 2040 -جىلعا دەيىنگى باس جوسپارى بەكىتىلدى.
مەگاپوليس بولاشاعى ءۇشىن ماڭىزدى قۇجات قوعامدا، اسىرەسە ساراپشىلارى مەن قوعام بەلسەندىلەرى اراسىندا قىزۋ تالقىعا تۇسكەن بولاتىن.
سونداي-اق 2023 -جىلى قىركۇيەك ايىنان باستاپ الماتىدا العاش رەت وقۋشىلاردى وقۋ ورىندارىنا اپاراتىن مەكتەپ اۆتوبۋستارى قاتىناي باستادى.
ال 2024 -جىلى الماتىنىڭ 8 اۋدانىندا جاستارعا ارنالعان كوميۋنيتي ورتالىقتار اشىلدى. ول ءۇشىن اكىمدىك 2023 -جىلى عيمارات نە ارنايى كەڭسە ساتىپ الىپ، ولاردى جوندەۋدەن وتكىزگەن. مۇنداي ورتالىقتار كوپ اۋديتوريادان تۇرادى، ىڭعايلى كوۆوركينگ ايماقتارىمەن جانە ىڭعايلى ءارى ۋاقىتتى ءتيىمدى وتكىزۋ ءۇشىن قاجەتتى جابدىقتارمەن جابدىقتالعان.
سونىمەن قاتار ەربولات دوسايەۆ زاڭسىز قۇرىلىس ماسەلەسىنە دە ءمان بەردى. 2022 -جىلدىڭ باسىنان 2025 -جىلدىڭ مامىرىنا دەيىن مەگاپوليستە رۇقساتسىز سالىنعان 88 نىسان تولىعىمەن نەمەسە جارتىلاي بۇزىلدى.
مەملەكەت باسشىسى قاسىم-جومارت توقايەۆ 2022 -جىلى قاراشا ايىندا الماتىعا جۇمىس ساپارى كەزىندە قالاداعى وزەكتى ماسەلەلەردىڭ ءبىرى - اۋىز سۋ ماسەلەسىن شەشۋدى تاپسىرعان بولاتىن. اكىمنىڭ حالىقپەن كەزدەسۋلەرى كەزىندە دە الماتىلىقتار تاۋ بوكتەرىندەگى اۋىز سۋ ماسەلەسىن ءجيى كوتەردى.
سوندىقتان الماتى اكىمى بۇل باعىتقا دا كوڭىل ءبولدى. ناۋرىزباي جانە قاراساي اۋداندارىنىڭ 100 مىڭ تۇرعىنىن سۋمەن قامتاماسىز ەتەتىن «اقساي» سۋ جيناعىشتىڭ قۇرىلىسى باستالدى. ول 2025 -جىلدىڭ قاراشا ايىندا ىسكە قوسىلادى دەپ جوسپارلانىپ وتىر.
ال 2024 -جىلى مەدەۋ اۋدانىندا «بالقاش» تازا سۋ رەزەرۆۋارى پايدالانۋعا بەرىلدى.
بيىل ناۋرىز ايىندا ەربولات دوسايەۆ پرەزيدەنتكە قالانى وركەندەتۋ تۋرالى باياندادى. قالا اكىمىنە پرەزيدەنتكە جۇرگىزىلگەن جۇمىستار جانە قابىلدانعان شارالار تۋرالى ەكى اپتادا ءبىر رەت بايانداپ وتىرۋ تاپسىرىلعان ەدى.
اۆتور
دوسبول اتاجان