الماتىنىڭ جاڭا اكىمى جوسپارىمەن ءبولىستى

الماتى. KAZINFORM - بۇگىن مەملەكەت باسشىعىنىڭ جارلىعىمەن دارحان ساتىبالدى الماتى قالاسىنىڭ اكىمى بولىپ تاعايىندالدى.

پرەمەر-مينيستر ولجاس بەكتەنوۆ پەن پرەزيدەنت اكىمشىلىگىنىڭ باسشىسى ايبەك دادەباي قاتىسقان الماتى ءماسليحاتى جينالىسىندا جاڭا اكىم الماتىنىڭ باستى ماسەلەلەرىن اتاپ ءوتتى.

- الماتى - بۇل ەلىمىزدىڭ ءىرى مەگاپوليسى عانا ەمەس، سونىمەن قاتار مادەني، ەكونوميكالىق، عىلىمي جانە ءبىلىم بەرۋ ورتالىعى. بۇل باي تاريحى بار، رۋحى ەرەكشە جانە ۇلكەن مۇمكىندىكتەر قالاسى. سونداي-اق قالامىزدا ءبىرقاتار سىن-قاتەرلەر بار. بۇل، ەڭ الدىمەن، ەكولوگيالىق پروبلەمالار، كولىك جۇكتەمەسى، ساپالى جانە تۇراقتى سۋمەن جابدىقتاۋ ماسەلەلەرى، ينجەنەرلىك جەلىلەردىڭ توزۋى، تىعىز قۇرىلىس. ءبىزدىڭ الدىمىزدا قالانىڭ ودان ءارى تۇراقتى دامۋى جانە ءاربىر الماتىلىقتىڭ ءومىر ءسۇرۋ ساپاسىنا بايلانىستى مىندەتتەر تۇر، - دەدى ول.

الماتى قالاسىنىڭ جاڭا اكىمى كەلەسى باعىتتارعا باسىمدىق بەرەتىنىن اتاپ ءوتتى:

1. كولىك جۇيەسىن دامىتۋ جانە ەكولوگيانى جاقسارتۋ

ونىڭ ايتۋىنشا، قوعامدىق كولىكتى دامىتۋ اكىمدىك قىزمەتىنىڭ باسىم باعىتتارىنىڭ ءبىرى بولىپ قالا بەرەدى. كۇندەلىكتى كولىك كەپتەلىسى، جولداردىڭ شامادان تىس جۇكتەلۋى، اتموسفەرالىق اۋانىڭ لاستانۋى سىندى ماسەلەلەردى شەشۋ ءۇشىن زاماناۋي جانە ەكولوگيالىق اۆتوبۋستاردى ساتىپ الۋ، اۆتوبۋس جانە تروللەيبۋس جەلىلەرىن كەڭەيتۋ، مارشرۋتتاردى وڭتايلاندىرۋ جانە قوزعالىس ارالىقتارىن قىسقارتۋ قامتاماسىز ەتىلەتىن بولادى.

- مەتروپوليتەن قۇرىلىسى قارقىندى جۇرگىزىلىپ، BRT جەلىلەرى كەڭەيتىلەدى.
الماتى ەكولوگيالىق تۇراقتى مەگاپوليسكە اينالۋى ءتيىس. ول ءۇشىن ساپالى كوگالداندىرۋ، قوعامدىق كەڭىستىكتەردى دامىتۋ، قوقىستاردى بولەك جيناۋ جانە كادەگە جاراتۋ، ەنەرگيا تيىمدىلىگى جانە تابيعي رەسۋرستاردى ۇتىمدى پايدالانۋ جونىندەگى باستامانى قولداۋ، ەلەكتروموبيلدەر مەن ەكولوگيالىق تازا تەحنولوگيالارعا كوشۋ ءۇشىن ىنتالاندىرۋدى ەنگىزۋ قامتاماسىز ەتىلەدى، - دەدى اكىم.

2. تۇرعىنداردىڭ جايلىلىعى مەن قاۋىپسىزدىگى

دارحان ساتىبالدى سۋمەن قامتۋ، جىلۋمەن جابدىقتاۋ، ەلەكترمەن قامتاماسىز ەتۋ جەلىلەرىن جۇيەلى تۇرە جاڭارتىلاتىنىن اتاپ ءوتتى. ودان بولەك ايتۋىنشا، تۇرعىن ءۇي قورى مەن قوعامدىق عيماراتتاردىڭ سەيسميكالىق قاۋىپسىزدىگىنە ەرەكشە كوڭىل بولىنەدى.

- اۋدانداردى اباتتاندىرۋ، اۋلالاردى، كوشە جارىعىن، تروتۋارلاردى، حالىقتىڭ ءجۇرىپ-تۇرۋى قيىن توپتارى ءۇشىن قولجەتىمدى ورتانى قۇرۋ - مۇنىڭ ءبارى ءجاي عانا ۋادە ەمەس، ناقتى مەرزىمدەرى مەن ناتيجەلەرى بار جوسپار بولادى، - دەدى ول.

3. ەكونوميكانىڭ تۇراقتى دامۋى جانە كاسىپكەرلىكتى قولداۋ

- الماتى - باستاماشىل جانە تاپقىر ادامداردىڭ قالاسى. ءبىز شاعىن جانە ورتا بيزنەسكە جاڭا قارجى قۇرالدارى، جەڭىلدەتىلگەن اكىمشىلىك راسىمدەر جانە يندۋستريالىق ايماقتاردى دامىتۋ ارقىلى قولداۋ كورسەتەمىز، - دەپ ۋادە ەتتى اكىم.

دارحان ساتىبالدى قالا IT-سالانى، ستارتاپتاردى، كرەاتيۆتى يندۋستريالاردى، تۋريستىك جانە ءبىلىم بەرۋ قىزمەتتەرىن دامىتۋ الاڭىنا اينالاتىنىن ايتتى.

4. قولجەتىمدى جانە ساپالى ءبىلىم بەرۋ، دەنساۋلىق ساقتاۋ جانە الەۋمەتتىك قورعاۋ

الماتى اكىمى بەلسەندى دامىپ كەلە جاتقان اۋدانداردا جاڭا مەكتەپتەر مەن بالاباقشالار سالۋعا، جۇمىس ىستەپ تۇرعان وقۋ ورىندارىن جاڭعىرتىپ، سيفرلىق ءبىلىم بەرۋ تەحنولوگيالارىن ەنگىزۋگە ۋادە بەردى.

ايتۋىنشا، دەنساۋلىق ساقتاۋ جۇيەسى - ەمحانالاردى جاڭارتۋ، شالعايداعى شاعىن اۋدانداردا جاڭا مەديتسينالىق پۋنكتتەر سالۋ، قىزمەتتەردى سيفرلاندىرۋ جانە سالالىق ماماندارعا قولجەتىمدىلىك ارقىلى كۇشەيتىلەتىن بولادى. ال حالىقتىڭ وسال توپتارى - كوپبالالى، قارت، مۇگەدەكتىگى بار ادامداردى الەۋمەتتىك قولداۋعا ەرەكشە نازار اۋدارىلادى.

5. الماتى - جاستار قالاسى

- الماتى - ءبىلىم الۋدى، دامۋدى، جاسامپازدىقتى، ەلدى وزگەرتۋدى قالايتىندار ءۇشىن تارتىلىس نۇكتەسى. جاستاردى، ولاردىڭ باستامالارىن قولداۋ، ءبىلىم الۋ، بيزنەستى باستاۋ، شىعارماشىلىق جوبالاردى ىسكە اسىرۋ ءۇشىن ينفراقۇرىلىمدى دامىتۋ - مەنىڭ جۇمىسىمنىڭ نەگىزگى باسىمدىقتارىنىڭ ءبىرى بولادى، - دەدى قالا اكىمى.

6. اشىقتىق، ديالوگ جانە ەسەپ بەرۋ

دارحان ساتىبالدى الدىن الا دايىندالعان مارشرۋتتارعا ەمەس، اۋلالارعا، مەكتەپتەرگە، بازارلار مەن كوشەلەرگە، ياعني شىنايى الماتىعا ۇنەمى شىعىپ تۇراتىنىن اتاپ ءوتتى.

- باسقارۋداعى مەنىڭ باستى قاعيداتتارىمنىڭ ءبىرى - جەرگىلىكتى اتقارۋشى ورگانداردىڭ اشىقتىعى جانە تۇرعىندارمەن تۇراقتى ديالوگ جۇرگىزۋ بولادى. قارقىندى دامىپ كەلە جاتقان مەگاپوليستە تەك كەرى بايلانىس، ازاماتتاردىڭ سەنىمى مەن قولداۋى ارقىلى تۇراقتى جانە ءادىل قالالىق ساياسات قۇرۋعا بولادى، - دەدى ول.

ەسكە سالايىق، بۇگىن مەملەكەت باسشىسىنىڭ جارلىعىمەن ەربولات دوسايەۆ الماتى قالاسىنىڭ اكىمى قىزمەتىنەن كەتتى.

اۆتور

دوسبول اتاجان