الماتىنىڭ بوتانيكالىق باعىندا ميدى تىنىشتاندىرۋعا كومەكتەسەتىن گۇل وسەدى

الماتى. KAZINFORM - الماتىنىڭ بوتانيكالىق باعىندا «عاجايىپ ءشوپ» اتانعان گۇل وسەدى. شۇيگىنشوپتىڭ ەمدىك قاسيەتتەرى تۋرالى اۆيتسەننا، پليني، ديوسكوريد ايتىپ كەتكەن.

بوتانيكالىق باقتىڭ مالىمەتىنشە، دارىلىك شۇيگىنشوپ باقتىڭ وسىمدىكتەردى جيناۋ ايماعىندا جانە الپيناريدە وسەدى.

دارىلىك شۇيگىنشوپ - بيىكتىگى 60-150 س م بولاتىن كوپجىلدىق شوپتەسىن وسىمدىك. شۇيگىنشوپتىڭ كوپتەگەن قوڭىر-سارى باعىنىشتى تامىرلارى تىعىز ورنالاسقان قىسقا تىك تامىرى بار. تامىردىڭ ەرەكشە ءيىسى بولادى. ساباقتارى تىك، گۇل شوعىرعا جاقىن تارماقتالعان. گۇلدەر حوش ءيىستى، كىشكەنتاي، ديامەترى 4 م م-گە دەيىن، اق، بوزعىلت كۇلگىن نەمەسە قىزعىلت ءتۇستى. ماۋسىم- شىلدە ايلارىندا گۇلدەيدى.

وتانى - جەرورتا تەڭىزى.

«شۇيگىنشوپتىڭ ەمدىك قاسيەتتەرى ەجەلگى ۋاقىتتا بەلگىلى بولعان. اۆيتسەننا، پلينيي، ديوسكوريد شۇيگىنشوپتىڭ ويلاردى باسقارۋعا، ميدى تىنىشتاندىرۋعا جانە نىعايتۋعا قابىلەتتى دەپ ەسەپتەدى. حالىقتىق تاجىريبەدە وسىمدىك قايناتپالار، تۇنبالار، ۇنتاقتار، سىعىندىلار تۇرىندە قولدانىلعان. قازىرگى ەكسپەريمەنتتىك جانە كلينيكالىق زەرتتەۋلەر شۇيگىنشوپتى جانە ونىڭ پرەپاراتتارىن ءتيىمدى سەداتيۆتى، جۇمساق ۇيىقتاتاتىن جانە سپازموليتيكالىق ءدارى رەتىندە سيپاتتايدى. شۇيگىنشوپ ءشوپ شايلارىنا ءجيى كىرەدى جانە اسقازاندى، تىنىشتاندىراتىن جانە ديۋرەتيكالىق شايلاردىڭ تاپتىرماس كومپونەنتى»، - دەلىنگەن حابارلامادا.

اۆتور
الما مۇقانوۆا