الماتىلىقتار مەرەكەلىك كونتسەرتتەن كەيىن قوقىستى جيناپ كەتتى
الماتى. KAZINFORM - الماتىلىقتار «تازا قازاقستان» باعدارلاماسىنا بەلسەندى قاتىسىپ جاتىر. مەگاپوليستىڭ ورتالىق ستاديونىندا بولعان كونسەرتتەن كەيىن تۇرعىندار ستاديون اۋماعىن تازالاۋعا جاپپاي قاتىستى.
ورتالىق ستاديوننىڭ اۋماعىن تازالاۋعا الماتى جاستارى دا قاتىستى. مۇندا 300 گە جۋىق ەرىكتى بولدى. جاستار قوقىستى جيناپ، كونتەينەرلەرگە تاستادى.
«قالاعا دەگەن سۇيىسپەنشىلىك تابيعاتقا دەگەن سۇيىسپەنشىلىكتەن باستالادى. وسىلايشا ءبىز ورتاق ءۇيىمىزدىڭ ادەمى كورىنىسىن بارىنشا ساقتاي الامىز! ءبىز كوپپىز، ال قالا جالعىز. اركىم ءوزىنىڭ ورتاق ۇيىنە قامقورلىق جاساعاندا، قالانىڭ سۇلۋلىعى مەن جايلىلىعى ساقتالادى. تابيعات پەن قالانىڭ ۇيلەسىمدىلىگى ءارقايسىمىزدىڭ قولىمىزدا. كىشكەنتاي قادامدار مەن جاۋاپكەرشىلىكپەن ءبىز قالا ءومىرىنىڭ ساپاسىن جاقسارتا الامىز، سونىمەن قاتار تابيعاتقا دەگەن سۇيىسپەنشىلىگىمىزدى كورسەتە الامىز. ءبىزدىڭ ءارقايسىمىزدىڭ ءىس- ارەكەتىمىز قالامىزدىڭ بولاشاعىنا ۇلكەن اسەر ەتەدى»، - دەدى الماتىلىق ەرىكتى ەلدار بايعابىلوۆ.
ەسكە سالايىق، بۇعان دەيىن الماتىدا قالا كۇنى قارساڭىندا 130 توننا قوقىس جينالعانىن جازعانبىز.