الماتىلىق دارىگەرلەر سالماعى نەبارى 37 كەلى ناۋقاستى امان الىپ قالدى
كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ دارىگەرلەرى كرون اۋرۋىنا شالدىققان 50 جاستاعى ناۋقاستى امان الىپ قالدى، دەپ حابارلايدى Kazinform.
الماتى وبلىسىنىڭ تۇرعىنى الما نۇركەنوۆانىڭ ايتۋىنشا، ىشەكتەن قان كەتىپ، اۋىرعانىنا ەكى جىل بولعان. دارىگەرلەر دەرتتىڭ سەبەبىن انىقتاي الماعاندىقتان، ءحالى كۇننەن-كۇنگە ناشارلاپ سالماعى 37 كەلىگە دەيىن تۇسكەن.
ناۋقاسقا «كرون اۋرۋى مەن ويىق جارالى كوليت» دياگنوزىن كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ دارىگەرلەرى قويدى.
«بىزگە اۋىر جاعدايدا تۇسكەن 50 جاستاعى ناۋقاسقا مەديتسينالىق تەكسەرۋلەر جۇرگىزىلىپ، وعان ستەنوز تۇرىندە اۋرۋدىڭ اسقىنعان (ىشەكتىڭ تارىلۋى) كرون اۋرۋى دياگنوزى قويىلدى. №1-تەراپيا بولىمشەسىندە بىرنەشە رەت ستاتسيونارلىق ەم قابىلدادى. ەمدەۋدەن كەيىن پاتسيەنتتە اۋرۋدىڭ تۇراقتى رەميسسياسى بايقالادى. ول سونداي-اق ەندوسكوپيالىق بولىمشەدە ەمدەلدى، وعان بىرنەشە رەت توق ىشەكتىڭ باللوندىق ديلاتاتسياسى جاسالدى»، - دەپ اتاپ ءوتتى ەندوسكوپيا جانە ينتەرۆەنتسيالىق گاستروەنتەرولوگيا بولىمشەسىنىڭ مەڭگەرۋشىسى الما حابيجانوۆا.
دارىگەردىڭ سوزىنشە، كرون اۋرۋى مەن ويىق جارالى كوليت جازىلمايتىن اۋرۋلارعا جاتادى.
«سوعان قاراماستان، ولاردى ۋاقتىلى دۇرىس دياگنوستيكالاۋ جانە ەمدەۋ ارقىلى اۋرۋدىڭ اۋىر تۇرىنە وتۋىنە جول بەرمەي، تۇراقتى رەميسسياعا قول جەتكىزۋگە بولادى. وسىنىڭ ارقاسىندا ىشەكتىڭ قابىنۋ اۋرۋلارىنا شالدىققان ادامدار تولىققاندى ءومىر ءسۇرىپ، ەڭبەككە قابىلەتتىلىگىن ساقتاي الادى»، - دەيدى دارىگەر.
الما نۇركەنوۆا الداعى ۋاقىتتا ءۇشىنشى رەت باللوندىق ديلاتاتسياسىن جاساتادى (جابىسىپ قالعان ىشەكتەردى اشىپ، كەڭەيتۋ پروتسەدۋراسى).
«ءومىرىمدى ساقتاپ قالعان كاسىبي شەبەرلىگى جوعارى، بىلىكتى ماماندارعا العىسىم شەكسىز. قازىر دەنساۋلىعىم جاقسى، ءتىپتى سالماق قوستىم»، - دەيدى ول.