الماتى. KAZINFORM - الماتىدا لاي باسىپ قالعان جەردەن ءبىر ادامنىڭ دەنەسى تابىلدى. الماتى قالالىق توتەنشە جاعدايلار دەپارتامەنتىنىڭ مالىمەتىنشە، ساعات 10:36-داعى اقپارات بويىنشا، لاي كوشكىنى جۇرگەن جەردە جەدەل شتاب قۇرىلدى.
قازىرگى ۋاقىتتا جەكە تۇرعىن ءۇيدى لايدان تازارتۋ جانە ادامداردى ىزدەۋ جۇمىستارى جۇرگىزىلۋدە. وعان 182 مامان مەن 32 تەحنيكا جۇمىلدىرىلدى. جەدەل جاردەم بريگادالارى جۇمىس ىستەپ جاتىر. تۋىستارى مەن كورشىلەرىنە جەدەل پسيحولوگيالىق كومەك كورسەتىلدى.
«الماتى قالاسى توتەنشە جاعدايلار دەپارتامەنتى مەن رەسپۋبليكالىق جەدەل-قۇتقارۋ جاساعىنىڭ كۇشتەرى ءۇيىندى استىنان ءبىر ەر ادامنىڭ دەنەسىن تاپتى»، - دەپ حابارلادى دەپارتامەنتتەن.
ىزدەۋ-قۇتقارۋ جۇمىستارى جالعاسۋدا.
ەستەرىڭىزگە سالا كەتەيىك، 8-اقپاندا مەدەۋ اۋدانىنىڭ «تاۋ سامالى» شاعىن اۋدانىنداعى وليمپيسكي كوشەسى بويىندا تەحنوگەندىك سيپاتتاعى توپىراقتىڭ لايلانۋى سالدارىنان لاي كوشكىنى بولدى.
اۆتور
الما مۇقانوۆا
بەيسەن سۇلتان
Сұлтан Бейсен Әл-Фараби атындағы ҚазҰУ-дың журналистика факультетінің түлегі. Еңбек жолын 2007 жылы "Жазушы" баспасында редактор болып бастаған. 2008 жылы "Ара" журналында, 2010-2011 жылы Алматы облысының "Талдықорған кеші" газетінде тілші, 2012 жылы "Талдықорған Севен" газетінде тілші болып жұмыс істеген. 2013 жылы сәуір айынан бастап "ҚазАқпарат" ХАА-нде Төте жазу редакциясында шығарушы редактор болып жұмысқа орналасқан