الماتىداعى بەينەكامەرالار سانى 2025-جىلى 50 مىڭعا جەتەدى
الماتى. KAZINFORM - الماتىدا «اقىلدى قالا» باعىتى اياسىندا ءتۇرلى جوبالار ىسكە اسىرىلىپ جاتىر. ولاردىڭ قاتارىندا - «ءبىرىڭعاي بەينەمونيتورينگ جۇيەسى»، «كەشەندى قاۋىپسىزدىك جۇيەسى» جوبالارى بار.
«اقىلدى قالا» جوباسى اياسىندا ىسكە اسىرىلىپ جاتقان جۇمىستارعا ساي 2024-جىلى الماتى قالاسىنداعى بەينەكامەرالار سانىن 50 مىڭعا جەتكىزۋ كوزدەلگەن. بيىل جىل سوڭىنا دەيىن 3000 كامەرا ورناتۋ جوسپارلانعان. ال قالعان 3000 ى 2025-جىلدىڭ ناۋرىز ايىنىڭ سوڭىنا دەيىن ورناتىلادى.
- 2022-جىلدىڭ تامىز ايىنان باستاپ الماتى قالاسىندا «ءبىرىڭعاي بەينەمونيتورينگ جۇيەسى» جوباسى ىسكە اسىرىلىپ كەلەدى. ونىڭ باستى مىندەتى - بارلىق قالالىق بەينەباقىلاۋ كامەراسىن ءبىر پلاتفورمادا بىرىكتىرۋ جانە الىنعان بەينەماتەريالعا ناقتى ۋاقىت رەجيمىندە ساراپتاما جاساۋ، - دەپ حابارلادى الماتى قالاسى سيفرلاندىرۋ باسقارماسىنان.
ايتا كەتەيىك، بۇعان دەيىن الماتىدا ءبىرىڭعاي جۇيەگە 45 مىڭ كامەرا قوسىلعانىن جازعانبىز. ونىڭ ىشىندە قالادا 9034 بەينەكامەرادان تۇراتىن 1641 «سەرگەك» كەشەنى جۇمىس ىستەپ تۇر.
سونداي-اق ۆەدومستۆو مالىمەتىنە سايكەس، «اقىلدى قالا» جوباسى اياسىندا كەشەندى قاۋىپسىزدىك جۇيەسى بۇگىنگى كۇنى 214 جالپى ءبىلىم بەرۋ مەكەمەلەرىندە جانە 193 مەكتەپكە دەيىنگى ۇيىمداردا ورناتىلعان. بۇل جوبا اياسىندا بەينەباقىلاۋ جۇيەسى، ءورت-كۇزەت دابىل جۇيەسى، كىرۋدى باقىلاۋ جانە باسقارۋ جۇيەسى، س و س دابىل تۇيمەسى، دوموفون بايلانىسى جۇيەسى ورناتىلادى.
- 2024-جىلدىڭ سوڭىنا دەيىن دەنساۋلىق ساقتاۋ مەكەمەلەرىندە كەشەندى قاۋىپسىزدىك جۇيەسى جوباسىن ىسكە اسىرۋ جوسپارلانىپ وتىر، - دەپ حابارلادى سيفرلاندىرۋ باسقارماسىنان.
ەسكە سالايىق، 2023-جىلى تامىز ايىندا الماتىنىڭ مەكتەپتەرى كەشەندى قاۋىپسىزدىك جۇيەسىنە قوسىلاتىنىن جازعان ەدىك.