الماتىداعى بالالار ۇيىنەن كەتىپ قالعان قىزدار امان-ەسەن تابىلدى

الماتى. KAZINFORM - پوليتسيا قىزمەتكەرلەرى مەكەمەدەن ءوز بەتىمەن كەتكەن بالالاردى تاپتى.

الماتى قالاسى پوليتسيا دەپارتامەنتىنىڭ مالىمەتىنشە، «باعاناشىلداعى» بالالار ۇيىنەن كەتىپ قالعان 14 جانە 16 جاستاعى تاربيەلەنۋشىلەردى كريمينالدىق پوليتسيا قىزمەتكەرلەرى تاپقان.

- جەدەل-ىزدەستىرۋ شارالارى بارىسىندا قىزدار الماتى وبلىسى اۋماعىندا انىقتالدى. قازىرگى ۋاقىتتا ەكەۋى دە جاعدايدىڭ بارلىق ءمان-جايىن انىقتاۋ ءۇشىن بوستاندىق اۋداندىق پوليتسيا باسقارماسىنا جەتكىزىلدى. كامەلەتكە تولماعانداردىڭ قاۋىپسىزدىگىن قامتاماسىز ەتۋ - پوليتسيا جۇمىسىنىڭ باستى باعىتتارىنىڭ ءبىرى بولىپ قالا بەرەدى، - دەپ حابارلادى دەپارتامەنتتەن.

ەسكە سالايىق، بۇعان دەيىن الماتىدا بالالار ۇيىنەن كەتىپ قالعان ەكى قىز ىزدەستىرىلىپ جاتقانىن جازعانبىز.