الماتىدا زاڭسىز سالىنعان تاعى ءبىر عيمارات بۇزىلدى
الماتى. KAZINFORM - الماتىدا قايرات شاعىناۋدانى داۋلەتكەرەي كوشەسى، 61- ءۇي مەكەنجايىندا ءىرى كۇردەلى قۇرىلىس بۇزىلدى. مەنشىك يەسى نىساندى رۇقساتسىز سالعان.
الماتىنىڭ قالا قۇرىلىسىن باقىلاۋ باسقارماسىنىڭ مالىمەتىنشە، جوسپاردان تىس تەكسەرۋ ناتيجەسى بويىنشا باسقارما مەنشىك يەسىنە قاتىستى قۇرىلىس- مونتاج جۇمىسىن توقتاتا تۇرۋعا جانە ۋچاسكەنى باستاپقى قالپىنا كەلتىرۋگە نۇسقاما بەرگەن.
الايدا، مەنشىك يەسى تالاپتى ورىندامادى، وسىعان بايلانىستى ءىس سوتقا جولداندى.
«2024 -جىلى 27-ناۋرىز كۇنى تۇركسىب اۋداندىق سوتىنىڭ شەشىمىمەن باسقارمانىڭ تالابى قاناعاتتاندىرىلدى. سوت شەشىمىن ورىنداۋ ءۇشىن مەنشىك يەسى نىساندى ءوز ەركىمەن بۇزدى»، - دەپ حابارلادى باسقارمادان.
ايتا كەتەيىك، بىلتىردان بەرى قالا بويىنشا 35 زاڭسىز نىسان بۇزىلدى.
ونىڭ ىشىندە بيزنەس ورتالىقتار، مەيرامحانالار، قوسالقى عيماراتتار مەن اۆتوسەرۆيستەر، سونداي-اق «مەچتا» جانە KHAN سياقتى ءىرى تۇرعىن ءۇي كەشەندەرى بار.
اۆتور
الما مۇقانوۆا