الماتىدا پوليسيا اتىن جامىلىپ، الاياقتىق جاساعان كۇدىكتىلەر ۇستالدى

الماتى. KAZINFORM - الماتىدا ءتارتىپ ساقشىلارى الاياقتىق جاسادى دەگەن كۇدىككە ىلىنگەن توپتىڭ ارەكەتىن توقتاتتى.

الماتى قالاسى پوليتسيا دەپارتامەنتىنىڭ مالىمەتىنشە، ۇستالعان ازاماتتار وزدەرىن ءتارتىپ ساقشىلارى رەتىندە تانىستىرىپ، «قىلمىستىق جاۋاپكەرشىلىككە تارتامىز» دەپ قورقىتىپ، تۇرعىننىڭ قولما-قول اقشاسىن جانە كولىگىن يەمدەنگەن. شىعىن سوماسى 12 ميلليون تەڭگەدەن اسقان.

- اتالعان دەرەك بويىنشا قىلمىستىق ءىس قوزعالدى. الماتى قالاسى مەن الماتى وبلىسى پوليتسيا بولىمشەلەرىنىڭ بىرلەسىپ جۇرگىزىلگەن ماقساتتى جەدەل-ىزدەستىرۋ شارالارىنىڭ ناتيجەسىندە التى ادام ۇستالدى. ءتىنتۋ كەزىندە جالعان قىزمەتتىك كۋالىكتەر، پروتسەسسۋالدىق قۇجات بلانكىلەرى، نىساندى كيىم ەلەمەنتتەرى، وق-دارىلەر، مورلەر، سۋىق قارۋلار، سونداي- اق ءتۇرلى ەلدەردەن كەلگەن مەملەكەتتىك ءنومىر بەلگىلەرى تاركىلەندى. بارلىق كۇدىكتىلەر ۋاقىتشا ۇستاۋ يزولياتورىنا قامالدى. تەرگەۋ جالعاسىپ جاتىر، - دەپ حابارلادى دەپارتامەنتتەن.

ەسكە سالايىق، بۇعان دەيىن تاكسي جۇرگىزۋشىسىن ۇرعان جولاۋشىلار 15 كۇنگە قامالعانىن جازعانبىز.