الماتىدا تۇركى دۇنيەسىنىڭ حالىقارالىق پوەزيا فەستيۆالى

استانا. KAZINFORM - الماتى قالاسىندا 2024 -جىلعى 26 - قىركۇيەكتە تۇركى الەمىندەگى جاس اقىنداردىڭ حالىقارالىق پوەزيا فەستيۆالى وتەدى. وعان تۇركيا، قازاقستان، قىرعىزستان، وزبەكستان، ازەربايجان جانە تۇرىكمەنستاننىڭ اقىندارى قاتىسادى. بۇل تۋرالى حالىقارالىق «تۇرىكسوي» ۇيىمىنىڭ باسپا ءسوز قىزمەتى ءمالىم ەتتى.

فەستيۆالدىڭ باستى ماقساتى - تۇركى الەمىنىڭ بىرلىگى مەن مادەنيەتىن نىعايتۋ، جاس اقىنداردىڭ شىعارماشىلىق كوكجيەگىن كەڭەيتۋ. ءىس- شارا تۇركسوي ۇيىمىنىڭ، الماتى قالاسى اكىمدىگى مەن «تۇلعا- دوستىق» قوعامدىق قورىنىڭ قولداۋىمەن وتەدى.

فەستيۆالدىڭ اشىلۋى ساعات 11:00 دە «پوەزيا اللەياسىندا» (سەيرىكوۆ كوشەسى، 2ا) وتەدى. اشىلۋ سالتاناتىندا تۇركسوي باس حاتشىسى سۇلتان رايەۆ، تۇركى مەملەكەتتەرى جازۋشىلار وداعىنىڭ ءتوراعاسى ۇلىقبەك ەسداۋلەت، قازاقستان جازۋشىلار وداعى ءتوراعاسىنىڭ ورىنباسارى قاسىمحان بەگىمانوۆ، قىرعىزستان جازۋشىلار وداعىنىڭ ءتوراعاسى قانىبەك يماناليەۆ، قازاقستاننىڭ قوعام قايراتكەرى، «پاراسات» جانە «دوستىق» وردەندەرىنىڭ يەگەرى اسىل وسمان جانە باسقا دا زيالى زيالى قاۋىم وكىلدەرى، قوعام قايراتكەرلەرى، جازۋشىلار مەن مەتسەناتتار ءسوز سويلەيدى.

ال فەستيۆالگە قاتىسۋشى اقىندار ساعات 17:00 دە «الاتاۋ» ءداستۇرلى ونەر تەاترىنىڭ ساحناسىندا (نۇركەنت ىقشاماۋدانى، 6) ونەر كورسەتەدى.

قاتىسۋشىلار: مۋحيتتين گۇمۇش (تۇركيا)، ارايلىم مۇراتاليەۆا (قازاقستان)، داۋرەن تىلەۋحان (قازاقستان)، ۆيليام مولوتوۆ (قازاقستان)، ەرقانات كەڭەسبەك ۇلى (قازاقستان)، ىرىسگۇل يزاتوۆا (قىرعىزستان)، اكجول دورانبەك ۋۋلۋ (قىرعىزستان)، كاناتبەك تاالايبەك ۋۋلۋ (قىرعىزستان) ، شۋحرات اريف (وزبەكستان)، مانسۋر جۋمايەۆ (وزبەكستان)، حۋلكار شەرزودوۆا (وزبەكستان) ، ينتيگام ياشار ۇلى (ازەربايجان) ، حوشگەلديەۆا ماحىم (تۇرىكمەنستان) .

سونىمەن قاتار، فەستيۆال بارىسىندا «الاتاۋ سەرىلەرى» ءانسامبلى، بيبىگۇل قيلىمحان، اسەت ەسجان، ەردەن جاقسىبەك، سونداي- اق «الاتاۋ» ەتنو- فولكلورلىق ءانسامبلى سىندى قازاقستاندىق تانىمال ونەر ۇجىمدارى مەن ورىنداۋشىلار ءان شاشۋىن ۇسىنادى.