الماتىدا سەيسميكالىق قاۋىپسىزدىك ءۇشىن جاپونيا تاجىريبەسى قولدانىلادى

الماتى. KAZINFORM - الماتى قالاسى ءماسليحاتىنىڭ دەپۋتاتتارى جاڭادان قۇرىلعان سەيسميكالىق قاۋىپسىزدىك جانە جۇمىلدىرۋ دايىندىعى باسقارما باسشىسىنىڭ م. ا. باتىرحان سۇلەيمەنوۆتى قابىلداپ، سەيسميكالىق قاۋىپسىزدىكتى ارتتىرۋ جونىندەگى جاڭا شارالاردى تالقىلادى.

باسقارما باسشىسى جاپونيانىڭ اپاتتاردىڭ الدىن الۋ جانە تاۋەكەلدەردى باسقارۋ سالاسىنداعى وزىق تاجىريبەسىنە نەگىزدەلگەن ءبىرقاتار باستامالاردى ۇسىندى. ولار:

جالپى قالالىق سەيسميكالىق جاتتىعۋلاردى 2024 -جىلى 3 ەسەگە دەيىن جانە 2025 -جىلى 4 ەسەگە دەيىن ۇلعايتۋ؛

800 مىڭنان استام ادامدى ينتەراكتيۆتى ساباقتار مەن جاتتىعۋلارمەن دايىنداۋ؛

2025 -جىلدىڭ تامىزىنا قاراي الاتاۋ اۋدانىندا سيمۋلياتسيالىق وقۋ- ادىستەمەلىك ورتالىعىن سالۋ؛

ۇيالى تەلەفون ابونەنتتەرىنە جەدەل حابارلاۋ ءۇشىن Cell Broadcast تەحنولوگياسىن قولدانا وتىرىپ، «Mass Alert» جۇيەسىن ىسكە قوسۋ. تولىق ىسكە قوسۋ - 2024 -جىلدىڭ ماۋسىمى؛

سەيسميكالىق قاۋىپتى باعالاۋ جانە باقىلاۋ ءۇشىن 1986 -جىلى سالىنعان سەيسمولوگيا عىلىمي ورتالىعىن جوندەۋ جانە جابدىقتاۋ.

ايتا كەتەيىك، بۇعان دەيىن الماتىنىڭ جەر استىندا قالا سالۋدى ۇسىنعان سەيسمولوگپەن سۇحبات جاريالانعان بولاتىنبىز.