الماتىدا ۇستەل تەننيسىنەن الەمدىك تۋرنير وتەدى

استانا. KAZINFORM - الماتىدا ۇستەل تەننيسىنەن WTT Youth Contender حالىقارالىق تۋرنيرى وتەدى.

اتالعان جارىس 23-26-شىلدە ارالىعىنا جوسپارلانعان. تۋرنيرگە الەمنىڭ 15 مەملەكەتىنەن 235 جاس تەننيسشى قاتىسادى دەپ كۇتىلۋدە.

اتاپ ايتار بولساق، الاتاۋ تورىندە گونكونگ، ءۇندىستان، قاتار، قىتايلىق تايپەي، قىرعىزستان، مالايزيا، موڭعوليا، بىرىككەن اراب امىرلىكتەرى، ساۋد ارابياسى، ا ق ش، تۇرىكمەنستان، وزبەكستان، وڭتۇستىك كورەيا، جاپونيا، قازاقستان سپورتشىلارى ءوزارا باق سىنايدى.

جارىستى قابىلداۋشى مەملەكەت قازاقستان ساپىنان ءتۇرلى جاس ساناتىنداعى 86 سپورتشى سىنعا تۇسەدى.

حالىقارالىق ۇستەل تەننيسى فەدەراتسياسى (ITTF) مەن الەمدىك ۇستەل تەننيسى (WTT) قولداۋىمەن وتەتىن تۋرنير جاس وسپىرىمدەر سەرياسىنىڭ كۇنتىزبەسىنە ەنگەن جانە الەمدىك رەيتينگ بويىنشا ۇپاي تاراتادى.

ۇستەل تەننيسىنەن WTT Youth Contender تۋرنيرىندە مىنا جاس ەرەكشەلىكتەرى بويىنشا جۇلدەلەر ويناتىلادى:

11 جاسقا دەيىنگى قىزدار مەن ۇلدار، جەكەلەي سىن؛

2. 13 جاسقا دەيىنگى قىزدار مەن ۇلدار، جەكەلەي سىن؛

3. 15 جاسقا دەيىنگى جاس ءوسپىرىم ۇل-قىزدار، جەكەلەي سىن؛

4. 17 جاسقا دەيىنگى جاس ءوسپىرىم ۇل-قىزدار، جەكەلەي سىن؛

5. 19 جاسقا دەيىنگى جاس ءوسپىرىم ۇل-قىزدار، جەكەلەي سىن؛

6. 15 جاسقا دەيىنگى سپورتشىلار اراسىندا ارالاس جۇپتىق سىن.

تۋرنير الماتى قالاسىن نۇركەنت، 14 ب مەكەنجايىندا ورنالاسقان ADD Ustel Tennis Ortalygy كەشەنىندە وتەدى. كىرۋ تەگىن.

سونداي-اق جارىس تىكەلەي ەفيردە Qazsport ارناسىنان كورسەتىلەدى.