الماتىدا ستۋدەنتتەردى جاتاقحاناعا ورنالاستىرۋمەن اينالىساتىن شتاب قۇرىلدى

الماتى. KAZINFORM - الماتى اكىمى ەربولات دوسايەۆ جاڭا وقۋ جىلىنا دايىندىق جانە ستۋدەنتتەردى جاتاقحاناعا ورنالاستىرۋ ماسەلەسى بويىنشا جوعارى وقۋ ورىندارىنىڭ رەكتورلارىمەن كەزدەستى.

«ەلىمىزدىڭ ماڭدايالدى وقۋ ورىندارىنىڭ دەنى الماتىدا ورنالاسقان، جىل سايىن مىڭداعان ستۋدەنت جوعارى ءبىلىم الۋ ءۇشىن وسىندا كەلەدى. ءبىزدىڭ مىندەتىمىز - ولارعا ساپالى ءبىلىم بەرۋ جانە جايلى جاتاقحانامەن قامتاماسىز ەتۋ»، - دەدى قالا اكىمى ەربولات دوسايەۆ.

ايتۋىنشا، الماتىلىق ستۋدەنتتەردى جاتاقحاناعا ورنالاستىرۋ بويىنشا ارنايى شتاب قۇرىلدى. بۇدان بولەك، داعدارىس جانە جەدەل دەن قويۋ جونىندەگى احۋالدىق ورتالىقتار جۇمىس ىستەيدى.

داعدارىس ورتالىعى ALT ۋنيۆەرسيتەتىندە ورنالاسقان. ونىڭ مىندەتى باسقا وڭىردەن كەلگەن ستۋدەنتتەرگە جەدەل قولداۋ كورسەتۋ جانە ۋاقىتشا ورنالاستىرۋ. داعدارىس ورتالىعىندا 70 ورىن بار.

احۋالدىق ورتالىعى المالى اۋدانىنداعى جاستاردىڭ كوميۋنيتي ورتالىعىنىڭ بازاسىندا جۇمىس ىستەيدى. 1-تامىزدان باستاپ ورتالىق تاۋلىك بويى جۇمىس ىستەپ، ستۋدەنتتەرگە ورنالاستىرۋ ماسەلەسى بويىنشا جەدەل كومەك كورسەتۋدە. ورتالىق كۇن سايىن قازاقستاننىڭ تۇكپىر-تۇكپىرىنەن 1,5 مىڭنان استام قوڭىراۋ قابىلدايدى. سونىمەن قاتار، قالانىڭ ءاربىر جوعارى وقۋ ورنىندا ستۋدەنتتەرگە تىكەلەي قولداۋ كورسەتەتىن احۋالدىق ورتالىقتار اشىلدى.

ايتا كەتەتىن نارسە، الماتىداعى 35 جوعارى وقۋ ورنىندا 199 مىڭنان استام ستۋدەنت ءبىلىم الىپ جاتىر، ونىڭ 124 مىڭى - وزگە وڭىردەن كەلگەن ستۋدەنتتەر. قالادا 109 ستۋدەنتتىك جاتاقحانا بار، وندا 36,2 مىڭنان استام ستۋدەنت تۇرادى. جالپى قاجەتتىلىك 28,7 مىڭ ورىن.

الايدا قالا اكىمى قولداۋىمەن قابىلدانعان شارالاردىڭ ناتيجەسىندە تامىز ايىنىڭ سوڭىندا توسەك ورىن تاپشىلىعى 8,9 مىڭ ورىنعا دەيىن قىسقاردى.

وقۋ جىلى باستالعانعا دەيىن الماتىدا 1920 ورىندىق 6 جاتاقحانا اشىلادى، ال جىل سوڭىنا دەيىن الماتى قالاسى اكىمدىگىنىڭ جوبالىق كەڭسەسىنىڭ قولداۋىمەن 3105 ستۋدەنتكە ارنالعان 4 جاتاقحانانى پايدالانۋعا بەرۋ جوسپارلانىپ وتىر.

2024 -جىلى 10 جاتاقحانا، 2025-2026 -جىلدارى 33 جاتاقحانا پايدالانۋعا بەرىلمەك.

ەستەرىڭىزگە سالا كەتەيىك، جاتاقحانا قۇرىلىسىن ءتيىمدى ۇيلەستىرۋ ءۇشىن ستۋدەنتتىك جاتاقحانالار قۇرىلىسى بويىنشا جوبالىق كەڭسە جۇمىس ىستەپ تۇر. جوبالىق كەڭسەنىڭ نەگىزگى مىندەتى الماتى قالاسىندا جاتاقحانالار قۇرىلىسى بويىنشا مەملەكەتتىك باعدارلامانى ىسكە اسىرۋ جانە ستۋدەنتتەردى تۇرعىن ۇيمەن قامتاماسىز ەتۋ ءۇشىن قولايلى جاعداي جاساۋ. جوبالىق كەڭسە اشىلعاننان باستاپ 120 الەۋەتتى ينۆەستور جۇگىندى، ونىڭ 67- ءسى قازىر جۇمىسقا كىرىسكەن، بۇل قولداۋ مەحانيزمىنىڭ تارتىمدىلىعىن كورسەتەدى.

شاھار باسشىسى جاتاقحانا ماسەلەسى تىكەلەي باقىلاۋىندا ەكەنىن اتاپ ءوتتى.

اۆتور

الما مۇقانوۆا