الماتىدا ساۋدا ورتالىعىندا بولعان ۇرىپ-سوعۋ فاكتىسىنە قاتىستى تەرگەۋ باستالدى

الماتى. KAZINFORM - الماتى پوليتسياسى الەۋمەتتىك جەلىدە «ادەم» ساۋدا ءۇيىنىڭ اكىمشىلىگى تاراپىنان ساتۋشىلارعا «قىسىم» كورسەتىلىپ جاتىر دەگەن ۆيدەوعا قاتىستى پىكىر ءبىلدىردى.

الەۋمەتتىك جەلىدە «ادەم» ساۋدا ورتالىعىنىڭ يەسى ادامداردى ۇرىپ-سوعىپ جاتىر دەپ ايىپتاعان ۆيدەو پايدا بولدى.

«ولار سالىقتان جالتارىپ، كىرىستەرىن جاسىرادى. جالعا الۋشىلاردان ەلەكتر ەنەرگياسىنا ءار شارشى مەتر ءۇشىن اقى الادى. جۇمىسشىلاردى ەڭبەك كودەكسىنە سايكەس تىركەمەيدى. بارلىق قۇزىرلى ورگانداردان تەرگەۋ جۇرگىزىپ، كىنالىلەردى جازالاۋلارىڭىزدى سۇرايمىز»، - دەلىنگەن حابارلامادا.

الماتى قالالىق پوليتسيا دەپارتامەنتى قازىرگى ۋاقىتتا جەتىسۋ اۋداندىق پوليتسيا باسقارماسى جالعا الۋشىلاردىڭ ءبىرىنىڭ ارىزى بويىنشا ساۋدا ءۇيىنىڭ كۇزەتشىسىنە قاتىستى سوتقا دەيىنگى تەرگەۋ امالدارىن جۇرگىزىپ جاتقانىن مالىمدەدى.

«ول ۇستالدى جانە تەرگەۋ ارەكەتتەرىن جۇرگىزۋ ءۇشىن پوليتسياعا جەتكىزىلدى. قىلمىستىق ءىس اياسىندا سوت-مەديتسينالىق ساراپتاما تاعايىندالدى. قاقتىعىستىڭ ءمان-جايى انىقتالىپ جاتىر»، - دەپ حابارلادى ۆەدومستۆودان.

قازىر پوليتسيا دەپارتامەنتىنىڭ جەدەل بولىمشەلەرى وتكەن جازدا ورىن العان قارۋ قولدانۋ ەپيزودىن تەكسەرىپ جاتىر.

«ايتا كەتەيىك، بۇعان دەيىن بۇل دەرەك بويىنشا پوليتسياعا ەشقانداي ارىز نەمەسە ءوتىنىش كەلىپ تۇسكەن جوق»، - دەپ ناقتىلادى پوليسيادان.