الماتىدا سابيلەردى ساتۋمەن اينالىسقان قىلمىستىق توپ ۇستالدى
الماتى. KAZINFORM - ۇلتتىق قاۋىپسىزدىك كوميتەتىنىڭ الماتى قالاسى بويىنشا دەپارتامەنتى جانە قالالىق ۇيىمداسقان قىلمىسقا قارسى كۇرەس باسقارماسى قىزمەتكەرلەرى جاڭا تۋعان سابيلەردى ساتۋمەن اينالىسقان قىلمىستىق توپتىڭ ارەكەتىن اشكەرەلەدى.
الماتى قالاسى پوليسيا دەپارتامەنتىنىڭ مالىمەتىنشە، بۇل قىلمىستىق توپ بىرنەشە جىل بويى جۇمىس ىستەپ كەلگەن. كۇدىكتىلەر الەۋمەتتىك وسال توپتاعى ايەلدەردەن، سونىڭ ىشىندە شەتەل ازاماتتارىنان تۋعان سابيلەردى زاڭسىز جولمەن الىپ، ساتىپ وتىرعان.
- جەدەل ءىس-شارالار بارىسىندا جاڭا تۋعان ۇل بالانى قوماقتى اقشاعا ساتۋ ارەكەتى توقتاتىلدى. كۇدىكتىلەر قىلمىس ۇستىندە ۇستالدى. ءسابي ءتيىستى مەكەمەگە ورنالاستىرىلدى. اتالعان دەرەك بويىنشا قىلمىستىق ءىس قوزعالدى. كۇدىكتىلەر قاماۋعا الىندى. تەرگەۋ امالدارى جۇرگىزىلىپ جاتىر، سونداي-اق ەلدىڭ باسقا وڭىرلەرىندە وسىعان ۇقساس دەرەكتەردىڭ بولۋى مۇمكىندىگى دە تەكسەرىلىپ جاتىر، - دەپ حابارلادى پوليتسيادان.
ەسكە سالايىق، بۇعان دەيىن الماتىدا بالالار بايقاۋىن ۇيىمداستىرۋشى الاياقتىق جاسادى دەگەن كۇدىككە ىلىنگەنىن جازعانبىز.