الماتىدا قازاقستان مەن قىتاي اراسىنداعى ستراتەگيالىق ديالوگتىڭ ەكىنشى وتىرىسى ءوتتى

الماتى. KAZINFORM - ق ر پرەمەر-ءمينيسترىنىڭ ورىنباسارى -سىرتقى ىستەر ءمينيسترى مۇرات نۇرتىلەۋ جانە ق ك پ  و ك ساياسي بيۋروسىنىڭ مۇشەسى، قىتاي حالىق رەسپۋبليكاسىنىڭ سىرتقى ىستەر ءمينيسترى ۋاڭ ي قازاقستان مەن قىتاي اراسىنداعى ستراتەگيالىق ديالوگتىڭ ەكىنشى وتىرىسىنا قاتىستى.

ستراتەگيالىق ديالوگ وتىرىسى بارىسىندا تاراپتار ساياسي، ساۋدا- ەكونوميكالىق جانە مادەني- گۋمانيتارلىق ىنتىماقتاستىقتىڭ كەڭ اۋقىمدى ماسەلەلەرىن تالقىلادى. مينيسترلەر بيىك جانە جوعارى دەڭگەيلەردە قول جەتكىزىلگەن ۋاعدالاستىقتاردىڭ ىسكە اسىرىلۋ بارىسىن قاراستىردى، سونداي-اق ەكىجاقتى ءوزارا ءىس-قيمىلدىڭ بارلىق سپەكترى بويىنشا قازاق-قىتاي قاتىناستارى دامۋىنىڭ وڭ سەرپىنىن اتاپ ءوتتى.

ساۋدا-ەكونوميكالىق بايلانىستاردى ارتتىرۋ بويىنشا بىرلەسكەن كۇش-جىگەرگە ەرەكشە نازار اۋدارىلدى. قازاقستاننىڭ قىتايعا شيكىزاتتىق ەمەس ەكسپورتىن ۇلعايتۋدى قوسا العاندا، يندۋستريالىق-ينۆەستيتسيالىق، ەنەرگەتيكالىق، ترانزيت-كولىكتىك جانە يننوۆاتسيالىق ىنتىماقتاستىقتى بىرلەسىپ دامىتۋدا جاڭا تاسىلدەردى ازىرلەۋ قاجەتتىلىگى باسا ايتىلدى.

- ءارقاشان دامي بەرەتىن بايلانىسىمىز گەوساياسي سىن-قاتەرلەر مەن كونيۋنكتۋرالىق ۇردىستەرگە ۇشىرامايدى. قىتاي ءبىز ءۇشىن مەيىرىمدى كورشى جانە سەنىمدى دوس قانا ەمەس، سونىمەن قاتار جان-جاقتى بايلانىسى بار جاقىن ەل، - دەپ مالىمدەدى م. نۇرتىلەۋ.

بىلتىر ەكىجاقتى تاۋار اينالىمى رەكوردتىق كورسەتكىش - 43,8 ميلليارد ا ق ش دوللارىن قۇرادى. ەكى مەملەكەت تە جاقىن ارادا ءوزارا ساۋدا كولەمىن ەكى ەسەگە ارتتىرۋعا ۇمتىلۋدا. قازاق-قىتاي ينۆەستيتسيالىق پۋلى شامامەن 66,4 ميلليارد ا ق ش دوللارى سوماسىنا 224 جوبانى قامتيدى.

- ءبىز قازاقستاندى قىتايدىڭ كورشىلەس مەملەكەتتەرمەن قارىم-قاتىناسىندا باستى سەرىكتەس رەتىندە قاراستىرامىز. قىتاي قازاقستاننىڭ اۋماقتىق تۇتاستىعىن، ەگەمەندىگىن جانە قاۋىپسىزدىگىن قورعاۋدا، سونداي-اق ۇلتتىق ەرەكشەلىكتەرىنە سايكەس ەلدىڭ دامۋىنا باعىتتالعان كۇش-جىگەرىن نىق قولدايدى، - دەپ اتاپ ءوتتى ۋاڭ ي.

سىرتقى ساياسي ۆەدومستۆولارىنىڭ باسشىلارى بيىل جوسپارلانعان ەكىجاقتى ساپارلار مەن ءىس-شارالار كەستەسىن تالقىلادى، سونداي-اق حالىقارالىق كۇن تارتىبىندەگى وزەكتى ماسەلەلەر بويىنشا «ساعاتتاردى تەڭەستىردى».

كەزدەسۋ قورىتىندىسى بويىنشا ق ر- ق ح ر سىرتقى ىستەر مينيسترلىكتەرى اراسىندا 2026-2028 -جىلدارعا ارنالعان ىنتىماقتاستىق تۋرالى مەموراندۋمعا قول قويىلدى جانە گۋاڭجوۋ قالاسىندا قازاقستان رەسپۋبليكاسىنىڭ باس كونسۋلدىعىن قۇرۋ تۋرالى نوتالارمەن الماسۋ ءراسىمى ءوتتى.

ايتا كەتەيىك قىتاي س ءى م باسشىسى 26- ساۋىردە وتەتىن «ورتالىق ازيا - قىتاي» فورماتىنداعى سىرتقى ىستەر مينيسترلەرىنىڭ كەزدەسۋىنە قاتىسۋ ءۇشىن الماتىعا جۇمىس ساپارىمەن كەلدى.

ەسكە سالايىق، بۇعان دەيىن قازاقستان مەن قىتاي ەكونوميكالىق ىنتىماقتاستىقتىڭ جاڭا جول كارتاسىن ازىرلەۋگە دايىن ەكەنى حابارلانعان بولاتىن.