الماتىدا قانات يسلامنىڭ ۇيىمداستىرۋىمەن بوكس كەشى وتەدى

  2024-جىلى 26-قاڭتار كۇنى الماتى قالاسىنداعى بالۋان شولاق اتىنداعى سپورت سارايىندا بەلگىلى بوكسشى قانات يسلامنىڭ ۇيىمداستىرۋىمەن بوكس كەشى وتەدى، دەپ حابارلايدى Kazinform.

بۇل تۋرالى ول ءوزىنىڭ Instagram الەۋمەتتىك جەلىسىندە جازدى.

«قۇرمەتتى قازاق ەلى! 2024 -جىلى 26-قاڭتار كۇنى بالۋان شولاق اتىنداعى سپورت سارايىندا رۋسلان مىرساتايەۆ باستاعان قازاقستاندىق بىلعارى قولعاپ شەبەرلەرى حالىقارالىق كاسىپقوي بوكس كەشىندە شارشى الاڭعا شىعادى. بۇل ۇلى جىبەك جولىنىڭ ون جىلدىعى اياسىندا ۇيىمداستىرىلاتىن ۇلكەن ءىس-شارا بولماق.

بوكس الەمىنە ءبىزدىڭ ۇجىم جانىبەك ءالىمحان ۇلى، ايدوس ەربوسىن ۇلى، الي احمەتوۆ سياقتى بوكسشىلاردى تانىتتى. وسىدان كەيىن كومپانيا ءجيى بوكس كەشتەرىن ۇيىمداستىرۋعا بەل بۋىپ وتىر.

ەلىمىز بويىنشا ءار وبلىستا 10 مىڭنان استام بوكسشىلار بوكس سەكسيالارىنا بارادى. ءبىزدىڭ ماقساتىمىز -حالىقارالىق دەڭگەيدەگى جارىستار ۇيىمداستىرا وتىرىپ، جاستاردىڭ سپورتقا قىزىعۋشىلىعىن تۋدىرۋ جانە بوكس كەشى ارقىلى قازاق باتىرلارىن الەمدىك كاسىپقوي شارشى الاڭىنا تانىتۋ. مەنىڭ ماقساتىم ارتىمنان ەرگەن جاستارعا قولىمنان كەلگەنشە كومەكتەسكىم كەلەدى. بۇل - مەنىڭ جۇمىسىم، مىندەتىم. وسى جارىستى ۇيىمداستىرۋعا دەمەۋشى بولۋعا دايىن ازاماتتار، كومپانيالار بولسا، بىرگە جۇمىس ىستەۋگە دايىنبىز»، - دەپ جازدى ول.

ەستەرىڭىزگە سالا كەتەيىك، وسىدان بىرەر كۇن بۇرىن الماتى قالاسىنداعى بالۋان شولاق اتىنداعى سپورت سارايىندا تاعى ءبىر بوكس كەشى وتكەن بولاتىن. سول كاسىپقوي بوكس كەشىنىڭ باستى جەكپە- جەگىندە جانقوش تۇراروۆ جاپوندىق قارسىلاسى اكيحيرو كوندونى ايقىن باسىمدىقپەن ۇتىپ، ەكىنشى چەمپيوندىق بەلدىككە قول جەتكىزگەن ەدى.

اۆتور

كۇنسۇلتان وتارباي