الماتىدا قالا كۇنى تويلانىپ جاتىر
الماتى. KAZINFORM - قىركۇيەكتىڭ ءۇشىنشى جەكسەنبىسى، ياعني بۇگىن الماتىلىقتار قالا كۇنىن تويلاپ جاتىر. مەگاپوليس مەرەكەسىنە وراي قالا تۇرعىندارى مەن قوناقتارى ءۇشىن ۇلكەن باعدارلاما جوسپارلانعان.
اربات اۋماعىندا كۇنى بويى «تۋعان كۇنىم، الماتىم» فەستيۆالى وتەدى. وندا الماتىلىقتار سۋرەتشىلەر كورمەسىنە، قولونەرشىلەر جارمەڭكەسىنە، شەبەرلىك ساباعىنا جانە باسقا دا ءىس- شارالارعا قاتىسا الادى.
سونىمەن قاتار، مۇندا جىل سايىنعى كىتاپ Fest فەستيۆالى ءوتىپ جاتىر.
سونداي-اق تۇڭعىش پرەزيدەنت اتىنداعى ساياباقتا جىل سايىنعى «الما Fest» فەستيۆالى باستالدى.
ساياباقتاعى باستى ساحنادا ساعات 14:30 دان باستاپ روزا رىمبايەۆا مەن الماتى اكىمىنىڭ ەسترادالىق-سيمفونيالىق وركەسترى ونەر كورسەتەدى.
ساعات 17:00 دە استانا الاڭىندا قازاقستاندىق ەسترادا جۇلدىزدارىنىڭ قاتىسۋىمەن Almaty Cover Show باستالادى.
ساحنادا ناعيما ەسقاليەۆا، مەيرامبەك بەسبايەۆ، Kalifarniya RaiM، نۇرلان مەن مۇرات، ARO، ەربولات قۇدايبەرگەن، قايرات تۋنتەكوۆ جانە باسقا دا انشىلەر ونەر كورسەتەدى.
قالا كۇنى كەشكە «كوكتوبە» تەلەمۇناراسىندا قۇتتىقتاۋ شامدارىنىڭ قوسىلۋىمەن قورىتىندىلانادى.