الماتىدا نايزاعاي ءتۇسىپ ءۇي ورتەندى

الماتى. KAZINFORM - الماتىدا نايزاعايدىڭ اسەرىنەن جەر ءۇي ورتەندى. ءورت سوندىرۋشىلەر ءورتتى ءسوندىرىپ، اۋماعىنداعى ءۇي-جايلار مەن كورشىلەس ۇيگە ءورتتىڭ تارالۋىنا جول بەرمەدى، دەپ حابارلايدى الماتى اكىمدىگىنىڭ Instagram پاراقشاسىنا سىلتەمە جاساپ.

ورتەنگەن ءۇيدىڭ ۆيدەوسى الەۋمەتتىك جەلىگە شىقتى. وندا «ۇلجان» شاعىناۋدانىندا ساعات 18:20-دا نايزاعاي ءتۇسۋى سالدارىنان جەر ءۇيىڭ ورتەنگەنى جازىلعان.

الماتى قالالىق توتەنشە جاعدايلار دەپارتامەنتىنىڭ مالىمەتىنشە، 28-ناۋرىز كۇنى ساعات 18:10-دا ءورت سوندىرۋشىلەر جەكە تۇرعىن ءۇيدىڭ ورتەنگەنى تۋرالى حابارلاما بويىنشا «ۇلجان-1» شاعىناۋدانى، اقجايىق كوشەسى، 17-ءۇي مەكەنجايىنا جىبەرىلدى.

«كەلگەن ساتتە 120 شارشى مەتر اۋماقتا جەر ءۇيدىڭ شاتىرى ورتەنگەنى انىقتالدى. دەرەۋ ءورت وقپاندارى ەنگىزىلىپ، اۆتوسيستەرنالار ءورت گيدرانتتارىنا ورناتىلادى. قابىلدانعان شارالاردىڭ ارقاسىندا ءورت ساعات 18:56-دا وقشاۋلانىپ، 19:06-دا ءسوندىرىلدى. ءورتتى سوندىرۋگە 14 تەحنيكا، جەكە قۇرامنىڭ 61 ادامى جۇمىلدىرىلدى»، - دەپ حابارلادى ت ج د-نىڭ باسپا ءسوز قىزمەتى.

سونداي-اق، ورتەنگەن ءۇيدىڭ اۋماعىنداعى ءۇي-جايلار مەن 2-3 مەتر قاشىقتىقتا سالىنعان كورشىلەس ۇيگە وتتىڭ تارالۋىنا جول بەرىلمەدى. ءورت سوندىرۋشىلەر ءورتتىڭ ناقتى نەدەن شىققانىن انىقتاپ جاتىر.

ەسكە سالايىق، بۇگىن الماتىدا جەل كۇشەيىپ، شاڭدى داۋىل تۇردى. ارتىنان نايزاعاي ويناپ، جاڭبىر جاۋدى.

وسىعان بايلانىستى قالانىڭ قۇتقارۋشىلارى مەن كوممۋنالدىق قىزمەتتەرى كۇشەيتىلگەن قىزمەتكە كوشتى.

اۆتور
دۋمان ارعىنگەلدى