الماتىدا موپەدتەردىڭ قاتىسۋىمەن 233 جول اپاتى بولدى
الماتى. KAZINFORM - الماتىدا جىل باسىنان بەرى موپەدشىلەردىڭ كەسىرىنەن 233 جول اپاتى بولىپ، 243 ادام زارداپ شەكتى. بۇل تۋرالى وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتىندا قالالىق پوليتسيا دەپارتامەنتىنىڭ وكىلى سالتانات ازىربەك ءمالىم ەتتى.
سپيكەردىڭ سوزىنشە، «قاۋىپسىز جول» جەدەل-الدىن الۋ ءىس-شاراسى اياسىندا ءتارتىپ ساقشىلارى جولداعى قاۋىپسىزدىكتى قامتاماسىز ەتۋ ءۇشىن بەلسەندى جۇمىس ىستەپ جاتىر. اسىرەسە موپەد پەن موتوكولىك يەلەرى ەرەكشە نازارعا الىنعان.
سالتانات ازىربەك موپەد جۇرگىزەتىندەر ءتيىستى ساناتتاعى جۇرگىزۋشى كۋالىگىن، مەملەكەتتىك تىركەۋ ءنومىرىن، تەحنيكالىق پاسپورت پەن ساقتاندىرۋ ءپوليسىن الىپ، كولىگىن تەحنيكالىق بايقاۋدان وتكزۋى ءتيىس ەكەنىن ەسكە سالدى.
- بۇلاردى زاڭدى ورىنداۋ ءۇشىن عانا ەمەس، ادام ءومىرىن امان ساقتاپ قالۋ ءۇشىن دە قولعا الىپ وتىرمىز. بۇل جول اپاتىن ازايتىپ، ءتارتىپتى كۇشەيتۋگە باعىتتالعان. تۇسىندىرمە جۇمىسى جۇرگىزىلىپ جاتسادا، زاڭ بۇزاتىندار ءالى دە ازايماي وتىر. سوڭعى اپتادا الماتىدا وسىنداي 1,5 مىڭنان استام زاڭ بۇزۋشىلىق تىركەلدى، - دەپ اتاپ ءوتتى ول.
بۇدان بولەك، الماتىدا وسى موپەدشىلەردىڭ كەسىرىنەن 233 جول اپاتى بولىپ، 243 ادام زارداپ شەككەن. 500 گە جۋىق موپەد ايىپ تۇراعىنا قويىلعان.
- جولدا ابايلاپ جۇرمەسە بولمايدى. ول موپەد، ماشينا دەپ ەشكىمدى بولمەيدى. سوندىقتان جول ءجۇرۋ ەرەجەسىن ساقتاۋ - اركىمنىڭ ازاماتتىق بورىشى بولۋى ءتيىس. قازىر 12 مىڭنان استام ادام كولىك قۇرالىن زاڭداستىرىپ، مەملەكەتتىك تىركەۋ ءنومىرىن، جۇرگىزۋشى كۋالىگىن الىپ، ساقتاندىرۋ ءپوليسىن راسىمدەپ ۇلگەردى، - دەپ قوستى سالتانات ازىربەك.
بۇعان دەيىن موپەدتەرىن تىركەمەگەندەرگە قانداي جاۋاپكەرشىلىك كوزدەلگەنى تۋرالى جانە موپەد يەلەرى ەندى A1 ساناتىنداعى جۇرگىزۋشى كۋالىگىن الۋعا مىندەتتەلگەنى تۋرالى جازعان ەدىك.