الماتىدا مەرزىمى ءوتىپ كەتكەن ازىق-تۇلىك تومەن باعادا ساۋدالانىپ جاتىر
الماتى. KAZINFORM - الماتىدا جارامدىلىق مەرزىمى ءوتىپ كەتكەن ازىق-تۇلىك ساتاتىن دۇكەن جۇمىس ىستەيدى. Kazinform ءتىلشىسى اتالعان ساۋدا ورنىنا بارىپ، كوردى.
وپتوماركەت دۇكەنى - الماتىنىڭ ورتالىعىندا جاڭادان بوي كوتەرگەن تۇرعىن ءۇي كەشەنىندە ورنالاسقان. ناقتىراق ايتار بولساق، نازاربايەۆ پەن مامەتوۆا كوشەسىنىڭ قيىلىسى. «ءۇش قوڭىر» ت ءۇ.
وپتوماركەتتە تەك مەرزىمى ءوتىپ كەتكەن ازىق-تۇلىك جانە كۇندەلىكتى تۇرمىستا قولداناتىن زاتتار ساتىلادى. باعاسى تومەن بولعاندىقتان، ساتىپ الۋشىلارى دا بار. سولاردىڭ ءبىرى الماتىلىق ايدىن راقىمبەك. ايتۋىنشا، بۇل جەردىڭ اشىلعانىنا ءبىر جىلعا جۋىقتاعان.
«بۇل جەردى دۇكەن ەمەس، قويما دەگەن دۇرىس شىعار. مەن وسى ماڭدا تۇرامىن. بىلتىر قىستا اشىلدى. ىشىندەگى تاۋارلاردىڭ باعاسى قالتا كوتەرەدى. جاسىراتىنى جوق، جارامدىلىق مەرزىمى ءوتىپ كەتكەن نەمەسە بىتۋىنە از قالعان. باستاپقىدا بىلمەي قىتاي كەسپەسىن ساتىپ الىپ، ۇيگە بارىپ قاراسام مەرزىمىنىڭ ءوتىپ كەتكەنىنە ءبىر جىل بولعان ەكەن. سوندىقتان قايتا اكەلىپ، وتكىزىپ تاستادىم. ءقازىر بۇل جەردەن ازىق- تۇلىك المايمىن، تەك مايلىق، سابىن سياقتى دۇنيەلەردى الامىن»، - دەيدى تۇرعىن.
دۇكەن سورەسىندە تۇزدالعان قىزاناق پەن كوكونىس يكراسى ءتىزىلىپ تۇر. باعاسى باسقا ساۋدا نۇكتەلەرىمەن سالىستىرعاندا ەكى ەسە ارزان. ساتۋشىسى ونىڭ سەبەبىن تۇسىندىرۋدەن باس تارتتى.
بانكانىڭ سىرتىندا تۇزدالعان كوكونىستىڭ جارامدىلىق مەرزىمى - 3 جىل دەپ جازىلعان. دەمەك، 2021 -جىلدىڭ تامىز ايىندا شىققان تۇزدىقتاردىڭ قولدانۋ مەرىزىمى ەكى اي بۇرىن بىتكەن.
وسى جاعداي بويىنشا قالالىق اكىمدىككە ساۋال جولداعان ەدىك. قىسقا عانا جاۋاپ الدىق.
«دۇكەندەگى تاۋارلاردى تەكسەرۋگە قۇقىعىمىز جوق»، - دەپ حابارلادى اكىمدىكتەن.
سونىمەن قاتار، Kazinform رەداكسياسى الماتى قالالىق سانيتارلىق-ەپيدەميولوگيالىق باقىلاۋ دەپارتامەنتىنە رەسمي ساۋال جولداپ قويدى.
وسىعان دەيىن «جاڭا ادامدار» قوزعالىسىنىڭ بەلسەندىلەرى «ۆرەميا يستەكلو» جوباسى شەڭبەرىندە ازىق-تۇلىك دۇكەندەرىن تەكسەرىپ، مەرزىمى وتكەن تاۋارلاردى انىقتاپ جاتقانى تۋرالى جازعان ەدىك.
اۆتور
الما مۇقانوۆا