الماتىدا مەملەكەتكە قايتارىلعان اكتيۆتەردەن بيۋجەتكە قانشا قارجى ءتۇستى

الماتى. KAZINFORM - «قايتارىلعان اكتيۆتەردى باسقارۋ كومپانياسى» ج ش س مەملەكەت مەنشىگىنە الماتى قالاسىنان قايتارىلعان نىسانداردى اۋكسيوندا ساتىپ جاتىر. بۇگىنگە دەيىن الماتىدا ساتىلعان اكتيۆتەردەن 7,6 ميلليارد تەڭگەدەن استام تابىس تۇسكەن.

بۇل تۋرالى كومپانيا Kazinform ساۋالىنا جولداعان جاۋابىندا حابارلادى.

«قايتارىلعان اكتيۆتەردى باسقارۋ كومپانياسى» 2023-جىلعى 21-قىركۇيەكتە قۇرىلعان. تولىقتاي مەملەكەت مەنشىگىنە تيەسىلى كومپانيا مەملەكەتكە قايتارىلعان اكتيۆتەردى قابىلداپ، اكتيۆتەر ساتىلعانعا دەيىن ولاردى جالعا بەرۋ، سەنىمگەرلىك باسقارۋ، ءوز بەتىمەن باسقارۋ ارقىلى ۇزدىكسىز جۇمىس ىستەۋىن قامتاماسىز ەتەدى.

«قايتارىلعان اكتيۆتەردى باسقارۋ كومپانياسى» ج ش س مالىمەتىنە سايكەس، قازىرگە دەيىن الماتى قالاسى بويىنشا كومپانيا يەلىگىندە بولعان 3 نىسان اۋكسيوندا ساتىلعان. ولار: «بايتاق» شاعىن اۋدانىنداعى جەر ۋچاسكەسى، بايتۇرسىنوۆ كوشەسىنىڭ بويىنداعى اكىمشىلىك عيمارات جانە «وريون» بيزنەس-ورتالىعى.

- «بايتاق» شاعىن اۋدانىنداعى جەر ۋچاسكەسى اۋكتسيونعا 176 ميلليون تەڭگە باعامەن شىعارىلىپ، ناتيجەسىندە 657 ميلليون تەڭگەگە ساتىلعان.

- بايتۇرسىنوۆ كوشەسى، 46 مەكەنجايىندا ورنالاسقان اكىمشىلىك عيماراتتىڭ ساتىلىمعا شىعارىلعان باستاپقى باعاسى 663 ميلليون تەڭگە بولدى. ال اۋكسيوندا ساتۋدىڭ قورىتىندى باعاسى 732 ميلليون تەڭگەگە جەتتى.

- مەدەۋ اۋدانىندا ورنالاسقان قۇرىلىسى اياقتالماعان جەر ۋچاسكەسى («وريون» بيزنەس-ورتالىعىنىڭ اكىمشىلىك عيماراتى) باستاپقى باعادا - 6278384321 تەڭگەگە E- Qazyna پلاتفورماسىندا ساتىلدى.

«ساتىلىم اشىق ەلەكتروندىق ساۋدا-ساتتىق شەڭبەرىندە جۇرگىزىلدى، بۇل باستاپقى باعامەن سالىستىرعاندا، اكتيۆتەردىڭ قۇنىن ەداۋىر ارتتىرۋعا مۇمكىندىك بەردى»، - دەلىنگەن كومپانيا جاۋابىندا.

ەندىگى كەزەكتە «قايتارىلعان اكتيۆتەردى باسقارۋ كومپانياسى» ج ش س الماتى قالاسىنان كەلەسى نىسانداردى ەلەكتروندىق ساۋدا-ساتتىققا قويۋدى جوسپارلاپ وتىر:

1. جەتىسۋ اۋدانى، راتۋشنوگو، 64 گ مەكەنجايىندا ورنالاسقان وندىرىستىك بازا.

2. بوستاندىق اۋدانىندا «كوكتەم-2» شاعىن اۋدانى، 22 مەكەنجايىندا ورنالاسقان جىلجىمايتىن مۇلىك.

3. بوستاندىق اۋدانى، بايتۇرسىنوۆ، 104ا مەكەنجايىندا ورنالاسقان اكىمشىلىك عيمارات.

ەسكە سالايىق، بۇعان دەيىن قايتارىلعان اكتيۆتەردىڭ قانشاسى مەملەكەت مەنشىگىنە وتكەنىن جازعانبىز.

سونداي-اق قازاقستان قايتارىلعان اكتيۆتەردى ساتۋدان قانشا تابىس تاپقانى تۋرالى مالىمەت بەرىلگەن بولاتىن.